00:00:00 IGIHE NETWORK KN KINYARWANDA EN ENGLISH FR FRANCAIS

Uruhare rwa ’Nihombere’ mu gusubiza inyuma abahinzi b’imboga no kwenyegeza imirire mibi muri Rubavu

Yanditswe na IGIHE
Kuya 29 Ukuboza 2022 saa 01:12
Yasuwe :

Intara y’Amajyaruguru n’Uburengerazuba zifite ibikenewe byose mu kunoza imirire ariko zikaza ku isonga mu kugira umubare munini w’abana bari munsi y’imyaka itanu bagwingiye.

Ubushakashatsi ku buzima n’imibereho y’abaturage bwakozwe n’Ikigo cy’Igihugu cy’Ibarurishamibare (2019/2020) bwagaragaje ko kugeza mu mpera za 2020, abana bagwingiye bari bageze kuri 33% aho Intara y’Amajyaruguru yari yihariye 41%, iy’Iburengerazuba ikagira 40%.

Abakurikiranira hafi iki kibazo bavuga ko bitumvikana uburyo iki gice cy’igihugu cyeramo imboga n’imbuto z’ubwoko butandukanye kikagira n’ibikomoka ku matungo kiri mu byibasiwe n’igwingira.

Uburyo bwiswe ‘nihombere’ bukoreshwa mu kugurisha imyaka itarera ni kimwe mu byatunzwe agatoki ko bugira uruhare mu gutuma abaturage badashobora kurya kuri bimwe mu byo beza birimo imboga n’imbuto cyangwa bagakuramo bike ugereranyije n’ibyo baba bashoye.

Ni bimwe mu byagarutsweho mu nama yahuje abahinzi n’abacuruzi b’imboga na Minisiteri y’Ubuhinzi n’Ubworozi, iy’Ubucuruzi n’Inganda, iy’Ubuzima, Ikigo Gishinzwe Ubuziranenge n’izindi nzego, yateguwe ku bufatanye bw’umuryango urengera inyungu z’abaguzi (ADECOR) mu rwego rwo guteza imbere abari muri uru ruhererekane, ku wa 28 Ukuboza 2022, i Kigali.

‘Nihombere’ ni uburyo bukoreshwa mu kugurisha umusaruro utarageza igihe cyo kwera. Urugero nk’umuhinzi wari ufite umurima wa karoti iyo amaze kuwugurisha muri ubwo buryo usigara ucungwa n’uwawegukanye ku buryo abana be badashobora kubona n’iyo guhekenya. Biri mu bituma hari abahinga imboga n’imbuto ariko ntibibuze abana babo kugira imirire mibi.

Utagurishije muri ubwo buryo na we ashobora guhendeshwa biturutse ku kuba kugeza ubu hagikoreshwa umufuka mu kugura umusaruro w’abahinzi nyamara wagera ku yandi masoko ukagurishwa ku kilo kandi ku giciro gihanitse.

Umuhuzabikorwa w’ihuriro ry’abahinzi n’abacuruzi b’imboga mu Karere ka Rubavu, Iradukunda Jerome, yavuze ko ku masoko y’i Kigali imboga ziba ziri ku giciro cyo hejuru nyamara abahinzi bataka ko nta mafaranga bari kubikuramo, abandi babuze aho bazigurisha.

Yagize ati “Turacyagurisha ku mifuka; ni ko abahinzi bakuze bagurisha kugeza ubu ntibarahindura imyumvire. Usibye no kugurisha ku mufuka hari n’abagurisha mu byo bita ‘nihombere’, umuntu akaza akareba uko umurima ungana akagereranya umusaruro ashobora gukuramo ubundi mukumvikana amafaranga akayakwishyura akazisarurira.”

Iradukunda yavuze ko Minisiteri y’Ubucuruzi n’Inganda ikwiye gufasha abahinzi mu gushaka amasoko hirya no hino ndetse hagakemurwa ikibazo cyo kugeza umusaruro ku isoko dore ko iyo ari ku mwero ibiciro by’imodoka birushaho kuzamurwa.

Ati “Na RURA ntabwo igena ngo ikilo cy’umusaruro kugitwara byishyurwa angahe. Urumva umuhinzi yahombeye mu murima n’ibyo gutwara umusaruro ntabwo bifite umurongo, usanga umuntu aguca amafaranga akurikije ko ukeneye kubona uko utwara umusaruro.”

Umuyobozi ushinzwe ibikorwa mu muryango ushinzwe kurengera abaguzi mu Rwanda, ADECOR, Paul Mbonyi, yavuze ko muri gahunda yo guhuza ubutaka imboga na zo zikwiye kwitabwaho hakagenwa ubuso zigomba guhingwaho kandi abahinzi bakibutswa ko zose zitajyanwa ku isoko.

Ati “Nta bisobanuro twabona by’uko Rubavu na Nyabihu ari uturere tukigaragaramo ikigero cy’imirire mibi kiri hejuru cyane cyane ku bijyanye n’igwingira ry’abana nk’ahantu hari ibikomoka ku matungo n’imboga zifasha mu kurinda indwara zirahari.”

Ku kibazo cy’ibura ry’amasoko y’imboga by’umwihariko mu Karere ka Rubavu, Monyi yavuze ko mu bigitera harimo kuba abahinzi bose berekeza amaso ku Mujyi wa Kigali gusa ntibatekereze no ku tundi turere.

Ikindi ni ingengabihe y’ihinga itorohereza ibihingwa kuba byagera ku isoko bifite agaciro aho abahinzi baterera imbuto mu cyumweru kimwe umusaruro ukazabonekera rimwe ari mwinshi mu gihe imiterere y’ikirere muri kariya gace ikwiye gutuma bamwe batera muri uku kwezi abandi bagatera mu gukurikiyeho.

Yavuze ko bimwe muri ibyo bibazo bizabonerwa ibisubizo binyuze mu bikorwa by’umushinga wiswe “Imirire Myiza Iwacu’ ukorera mu Karere ka Rubavu, ugamije gufasha abahinzi kuzamura umusaruro mu bwinshi no mu bwiza, gufasha mu kubona amasoko y’umusaruro kugira ngo abahinzi bungukire mu byo bakora no kubaka ubushobozi bw’abafite uruhare mu buhinzi bw’imboga hamwe no gukora n’ubuvugizi kugira ngo ibibazo bibonekamo bibashe kubonerwa ibisubizo.

Yasabye ubufatanye bw’inzego zitandukanye hirindwa gutatanya ingufu abarebwa n’imirire ku rwego rw’igihugu bose bakicara hamwe bagasuzuma uko politiki nziza igihugu gifite zishyirwa mu bikorwa.

Ati “Tujya gutekereza kuri uyu mushinga twasanze iyo utekereje ibikorwa byuzuzanya kuva mu murima kugera ku isahani nibwo uba ushobora gukemura ikibazo kijyanye n’imirire mibi kubera ko umusaruro ushobora kuboneka ari mwinshi ariko abaturage ntibashobore kubihaha ku isoko [ku batabyeza] cyangwa ababyeza ntibasobore kubitegura ku mafunguro yabo.”

Umuyobozi ushinzwe gukurikirana ibijyanye n’ubuhinzi bw’imboga, imbuto n’indabo muri Minisiteri y’Ubucuruzi n’Inganda, Mukaniyonzima Dathiva, yavuze ko ingengabihe y’ubuhinzi idafatika ituma bigorana kubonera abahinzi amasoko bityo ko hakenewe ubufatanye bwa Minagri na Minicom mu kuzamura uru rwego.

Umuhuzabikorwa w’ihuriro ry’abahinzi n’abacuruzi b’imboga mu Karere ka Rubavu, Iradukunda Jerome avuga ko abagurishiriza imyaka mu murima bagira uruhare mu igwingira
Umuyobozi ushinzwe ibikorwa mu muryango ushinzwe kurengera abaguzi mu Rwanda, ADECOR, Paul Mbonyi yavuze ko bifuza gukemura ikibazo gisubiza inyuma abahinzi b'imboga n'imbuto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .