00:00:00 IGIHE NETWORK KN KINYARWANDA EN ENGLISH FR FRANCAIS

Uko uruhare rw’abahinzi mu itegurwa ry’imihigo rwatumye umusaruro wiyongera

Yanditswe na Kanamugire Emmanuel
Kuya 29 July 2022 saa 10:27
Yasuwe :

Abahinzi bo mu Turere twa Kayonza na Nyanza, bagaragaje ko uruhare rwabo mu itegurwa n’ishyirwa mu bikorwa ry’imihigo yo muri iyi ngeri rwatumye umusaruro wabo wiyongera.

Aba ni abakoranye n’umushinga wa Transparency International Rwanda wari ugamije kubaka ubushobozi bufasha abaturage kugira uruhare mu mihigo yerekeye ubuhinzi ku rwego rw’uturere.

Uwo mushinga washowemo miliyoni 900 z’amafaranga y’u Rwanda mu myaka itanu ukaba waratekerejwe hashingiwe ku bipimo by’ubushakashatsi bwagaragaje ko uruhare rw’umuturage mu igenamigambi rwari rukiri hasi cyane.

Umuyobozi Nshingwabikorwa wa Transparency International Rwanda, Appolinaire Mupiganyi, yavuze ko abagera kuri 20% nta ruhare bagiraga mu itegurwa ry’imihigo ahubwo bagezwagaho amakuru mu gihe yabaga iri gushyirwa mu bikorwa.

Ikindi ni uko wasangaga uko imihigo yabaga yatekerejwe bitabaga bijyanye n’ibibazo abahinzi ubwabo bafite hakaba n’aho bategekwa ibyo bagomba guhinga bigatuma babikora nabi umusaruro ntuboneke.

Ubwo hasozwaga ibikorwa by’uyu mushinga, Transparency Rwanda yavuze ko abahinzi bahawe ubumenyi bwo kumenya ibibazo bafite, gushyira ku murongo ibyihutirwa no kubigeza ku nzego zibishinzwe kugira ngo bishyirwe mu mihigo.

Mupiganyi yavuze ko ibitekerezo by’abahinzi bigera kuri 50% mu byo batanze byashyizwe mu mihigo y’uturere umushinga wakoreragamo (Kayonza na Nyanza).

Ati “Byatanze umusaruro n’abaterankunga bandi babona ko uyu mushinga ukenewe bituma abo mu Bwongereza bifuza ko ukorerwa mu tundi turere dutatu ari two Kamonyi, Burera na Rubavu.”

Umuyobozi mukuru w’igenamigambi muri Minisiteri y’ubuhinzi n’ubworozi, Dr Semwaga Octave, yavuze ko gufasha abaturage kugira uruhare mu bibakorerwa ari gahunda nziza bakangurira inzego zose z’ibanze n’abandi bose babifitemo uruhare kugira ngo bajye bashyira mu mihigo ibyo abaturage bashaka.

Ati “Icyo tuba twifuza ari na cyo uyu mushinga wagaragaje ni uko mu gihe hari gahunda ku rwego rw’igihugu, abaturage bakomeza bakagira uruhare mu bibakorerwa, ibyifuzo byabo bakabishyira mu mihigo kubera ko ishyirwa mu bikorwa ribera ku rwego rw’Uturere.”

“Iyo umuhinzi akorewe icyo yifuza bikorwa neza, ibijyanye no gukurikirana ntabwo bihenda cyane kuko ba nyirabyo baba bari aho kandi ibikorwa bifatwa neza bikabasha gutanga umusaruro.”

Rugerimisare Nicodème, umuhinzi wo mu Karere ka Nyanza, yavuze ko mbere yo gukorana n’uyu mushinga batari bazi uko imihigo itegurwa n’uko ishyirwa mu bikorwa ariko ubu basigaye babigiramo uruhare ndetse ubuhinzi bwabo bukagenda neza.

Ati “Twatangiye dutegura imihigo tukayinyuza mu matsinda, ubuyobozi bwayo bukadufasha kuyigeza ku Murenge, impuzamatsinda ikayizamura ikayigeza ku Karere. Mu bitekerezo 33 twatanze 23 byinjijwe mu mihigo kandi bishyira mu bikorwa.”

“Imyumvire yarazamutse umusaruro uriyongera. Hari igihe badutegekaga guhinga icyo tudashaka, ubu byarahindutse ibyo dukeneye ni byo duhinga. Imihigo itangirira hasi mu bahinzi, twerekanye ibigomba guhingwa, umuturage akabasha kweza.”

Umuyobozi wa Banki y’Isi mu Rwanda, Rolande Simone Pryce, yavuze ko ubuhinzi ari urwego rw’ingenzi mu gihugu muri gahunda yo kugabanya ubukene no guharanira kwihaza mu biribwa, ikaba ari yo mpamvu Banki y’Isi izakomeza kugira uruhare mu gushyigikira uru rwego haba mu gihe cya vuba n’ikirambye.

Abahinzi bagera ku 7476 ni bo bakoranye n’uyu mushinga mu turere twombi. Mu myaka itanu batanze ibitekerezo 141 ibigera kuri 53 bishyirwa mu mihigo y’uturere.

Minagri ivuga ko abaturage bari mu mwuga w’ubuhinzi bagera kuri miliyoni 3,8 mu gihugu. Ni mu gihe 66% by’imirimo iboneka mu buhinzi. By’umwihariko uru rwego ni ingenzi ku bagore kubera ko abagera ku 8% bafite imirimo bakora ibijyanye n’ubuhinzi.

Bamwe mu bitabiriye inama isoza umushinga wa Transparency International Rwanda wari ugamije kubaka ubushobozi bufasha abaturage kugira uruhare mu mihigo
Umuyobozi wa Banki y’Isi mu Rwanda, Rolande Simone Pryce, Umuyobozi Nshingwabikorwa wa Transparency International Rwanda, Appolinaire Mupiganyi n’Umuyobozi Mukuru w’igenamigambi muri Minisiteri y’ubuhinzi n’ubworozi, Dr Semwaga Octave
Bamwe mu bahinzi bakoranye n'uyu mushinga bavuze ko wabafashije gutanga ibitekerezo mu mihigo y'uturere kandi ko byatanze umusaruro mu mirimo yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .