Urugo rushya! Sobanukirwa ubuzima bw’abana bafungiye muri gereza ya Nyagatare

Yanditswe na Hakizimana Jean Paul
Kuya 24 Kanama 2019 saa 05:46
Yasuwe :
0 0

Gereza y’abana ya Nyagatare. Ni gereza imwe rukumbi u Rwanda rufite ifungirwamo abana bari mu kigero cy’imyaka 14- 18, kuri ubu ifungiwemo abana 454 barimo abakobwa 23, byinshi mu byaha bafungiye byiganjemo gufata ku ngufu bagenzi babo, ibiyobyabwenge, gukuramo inda n’ibindi.

Ukiyigeramo ukareba ubuzima abo bana babayemo, wakwibagirwa ko bafunzwe ahubwo ukayita urugo rushya.

Umwana ukiyinjiramo mbere y’ibindi byose abanza guhabwa inyigisho zimara ibyumweru bibiri ahumurizwa, yerekwa ko nubwo ari muri iyi gereza amategeko ye yose azubahirizwa haba kurya gatatu ku munsi, kwiga, kwidagadura n’ibindi byose umwana akenera ku mubyeyi.

Nyuma y’ibyo byumweru bibiri ngo harebwa iminsi uwo mwana azamara muri iyi gereza kugira ngo ashakirwe ibyo yakwiga byazamugirira umumaro mu gihe arangije igihano cye.

Nyuma yo kubwirwa ko yakomeza amashuri ahereye mu abanza n’icyiciro rusange, iyo atabishatse yihitiramo umwe mu myuga akaba ariwo akomeza harimo; Kubaka, Kubaza, Gusudira, Kudoda, Kogosha ndetse n’undi mushya w’ikoranabuhanga (ICT) ugiye kuhatangizwa nyuma yo guhabwa na REB mudasobwa 105 za Positivo NA 67 za Xo.

Ni irihe banga rikoreshwa ngo batsinde ibizamini bya leta?

Mu myaka itatu abana bafungiwe muri iyi gereza bamaze gukora ibizamini bya leta birimo ibisoza amashuri abanza ndetse n’ibisoza icyiciro rusange. Abagera kuri 55 nibo bamaze gukora ibizami barimo 16 bigaga mu cyiciro rusange na 29 bigaga mu mashuri abanza aba bana bose bakaba barabitsinze ku rwego rwo hejuru.

Uzabumwana Jean Nepomuscène, umwe mu mfungwa zatoranyijwe kugira ngo zize kwigisha aba bana akaba anashinzwe amasomo muri iyi gereza, yabwiye IGIHE ko mu bituma abana batsinda neza harimo ubushake hagati y’umwarimu n’umunyeshuri.

Ati “Icya mbere ni uko abarimu bigisha babishaka kandi bafite n’ubumenyi, ikindi nuko abarimu bakunda kubona ibyo bigishirizamo mbese tuba dufite ibitabo bihagije, ikindi abana twigisha nta kindi kibarangaza ubona biga babishaka cyane.”

Yakomeje agira ati “Abenshi mu bana bazanwa hano baba barafashwe barataye amashuri ku mpamvu zirimo ubukene bw’imiryango, kunanira ababyeyi n’ibindi, rero iyo bageze hano nta kindi bakora kuko baba babayeho neza, bo icyo basabwa ari ugukurikira amasomo gusa bigatuma biga neza.”

Imbabazi bahabwa na Perezida Kagame zibaha imbaraga

Kuva aba bana batangira gukora ibizamini bya leta mu 2018, abatsinze neza bahabwa imbabazi na Perezida wa Repubulika Paul Kagame, bakajya gukomereza amasomo mu bigo bya leta biri hanze ya gereza ndetse bakanababarirwa.

Ibi ngo bituma bagira ubushake bwo kwiga cyane kandi bagatsinda kugira ngo bazarekurwe. Nkundirimana Hussein wiga mu mwaka wa gatatu w’icyiciro rusange yabwiye IGIHE ko gukunda umwarimu n’imbabazi za Perezida bituma bagira ubushake bwo kwiga.

Ati “Icya mbere njye nk’umunyeshuri iyo nkunze kwiga, nkakunda ibyo ndimo narangiza nkakunda umwarimu nkamwubaha bituma ntsinda cyane, ikindi iyo twiga tuzi neza ko nutsinda ikizamini cya leta Perezida wa Repubulika azaguha imbabazi ukajya kwigira hanze nabyo bitwongerera imbaraga nyinshi.”

Nta byera ngo de!

Umuyobozi Mukuru wa RCS, CG George Rwigamba, avuga ko abana baba bararangije amashuri abanza n’ayisumbuye bagahabwa imbabazi na Perezida wa Repubulika bamwe muri bo bashoboye gukomeza kwiga kuko bakurikiranwe n’ababyeyi babo cyangwa abandi bantu gusa, ngo hari n’abagenda bakongera kwishora mu biyobyabwenge.

Ati “Iyo dukurikiranye dusanga hari abandi bagiye bagasanga mu miryango yabo haracyarimo ibibazo bigatuma badashobora gukomeza kwiga bake muri bo bagasubira mu byaha bikaba byatuma bagarurwa hano”.

Rwigamba yakomeje agira ati “Turasaba inzego z’ibanze kudufasha bakajya babakurikirana bagashobora gutera imbere nk’abandi banyarwanda.”

Muri iyi gereza y’abana ya Nyagatare kuri ubu abagera kuri 330 biga mu mashuri abanza, 16 bakiga mu cyiciro rusange, 87 nibo biga imyuga mu gihe 21 bari gutegurwa muri bya byumweru bibiri kugira ngo babanze bamenyerezwe ubuzima bwo muri iyi gereza.

Bamwe mu biga ubwubatsi muri gereza y'abana ya Nyagatare
Minisitiri w'Ubutabera Busingye yerekwa uko mudasobwa zikoreshwa n'abiga ikoranabuhanga
Izi mudasobwa zikoreshwa n'abiga ikoranabuhanga muri gereza y'abana ya Nyagatare
Imikino itandukanye irangwa muri gereza y'abana ya Nyagatare
Abiga ububaji nabo babyiga mu buryo bw'umwuga
Abiga kudoda babyiga mu buryo buzatuma bihangira imirimo
Abiga gusudira bakora inzu n'amadirishya
CG Rwigamba avuga ko hari abarekurwa bakareka amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza