Urugendo rwa Amb. Nduhungirehe, wabaye umwarimu w’imisoro mbere yo kwinjira muri dipolomasi (Video)

Yanditswe na Philbert Girinema
Kuya 11 Ugushyingo 2020 saa 11:14
Yasuwe :
0 0

Amb Nduhungirehe Olivier, ni umwe mu bihebeye politiki akiri muto, kuko yakurikije Se wari mu bashinze ishyaka rya PSD ari naryo na we abarizwamo. Ubu amaze imyaka igera kuri 13 yinjiye mu bya dipolimasi, aho yabaye Ambasaderi w’u Rwanda mu Bubiligi ndetse mu minsi ishize yoherejwe guhagararira inyungu z’u Rwanda mu Buholandi.

Nubwo ari Umudipolomate, yize ibijyanye n’imisoro kuko yabonye Master’s mu bijyanye n’amategeko yayo, ayikuye muri Solvay Brussels School mu Bubiligi.

Iyo muganiriye akubwira ko nubwo yakuze akunda politiki, bishoboka ko iyo ataza kwinjira mu bya dipolomasi ubu aba ari nk’umukozi mu bya gasutamo, kuko ubwo yavaga kwiga mu Bubiligi agarutse mu Rwanda, yari yaramaze gusaba akazi mu Kigo cy’Igihugu gishinzwe Imisoro n’Amahoro.

Ibyo yize yamaze imyaka igera kuri ine abyigisha muri Kaminiza zitandukanye zo mu Rwanda, imyaka yishimira bikomeye bitewe n’umusanzu ugaragara yatanze mu burezi bw’u Rwanda. Asobanura ko kwigisha bitera ishema, cyane iyo uhaye ubumenyi umuntu akabukoresha neza.

Magingo aya, Amb Nduhungirehe aherutse kugirwa Ambasaderi w’u Rwanda mu Buholandi nyuma y’uko muri Mata uyu mwaka yari yahagaritswe ku mirimo nk’Umunyamabanga wa Leta muri Minisiteri y’Ububanyi n’Amahanga.

Ikiganiro kirambuye Amb Nduhungireye yagiranye na IGIHE

IGIHE: Wakiriye ute icyizere wongeye kugirirwa cyo kuba Ambasaderi w’u Rwanda mu Buholandi?

Amb Nduhungirehe: Nabyakiriye neza n’ibyishimo, kuko Perezida wa Repubulika yongeye kungirira icyizere cyo kungira Ambasaderi. Ni umurimo nari narigeze gukora, aho nari Ambasaderi mu Bubiligi, nkaba nari maze muri dipolomasi imyaka 13. Byaranshimishije ko nongera gukora ako kazi.

IGIHE: Ubundi ku muntu utazi neza urugendo rwawe muri Politiki, ni ryari wayinjiyemo?

Amb Nduhungirehe: Ubundi hari politiki na dipolomasi. Biratandukanye gato nubwo hari aho bihurira. Politiki nayinjiyemo kera na mbere ya Jenoside kuko nari mu ishyaka rya PSD, hanyuma na nyuma ya Jenoside ibikorwa byarakomeje.

Dipolomasi yo nayinjiyemo mu 2007 aho Inama y’Abaminisitiri yangize Umujyanama wa Mbere muri Ambasade y’u Rwanda muri Ethiopia. Ariko politiki nayinjiyemo kera nkiri n’umwana, mu 1991.

IGIHE: Ni iki cyagukururiye kwinjira muri politiki mu myaka yawe mike, ukiri urubyiruko?

Amb Nduhungirehe: Nari nkiri muto ariko papa umbyara na we yari muri politiki, ari mu bashinze iryo shyaka rya PSD kubera ibibazo byari bihari icyo gihe. Hari ubukene, ivanguramoko n’ivangurakerere, hanyuma rero aba mu bashinze iryo shyaka rya PSD nanjye rero ngakurikira, ngarukira ibiganirwa n’ibivugwa, hanyuma binjyamo ndabikomeza.

IGIHE: Wabaye muri Ambasade z’u Rwanda mu Bubiligi, muri Ethiopia, ubu ugiye mu Buholandi; ni izihe nshingano z’ibanze za Ambasaderi.

Amb Nduhungirehe: Hari byinshi ambasaderi akora, icya mbere cy’ingenzi ni ukureba ko ibyo bihugu byombi bigirana umubano mwiza, kuko niwo ugenga byose, niwo utuma ibihugu bigira umutekano, ubutwererane, ishoramari.

Hakaba rero n’ibyo dushinzwe cyane cyane nka ba Ambasaderi b’u Rwanda aricyo cyo kwita ku banyarwanda batuye muri ibyo bihugu. Aho Ambasaderi aba yabaye nka Meya, aba ashinzwe abanyarwanda, agomba kureba ko bahawe ibyo bagenerwa, impapuro, ibyo bafiteho uburenganzira, ko babanye neza.

Amb Nduhungireye yatangaje ko yiteguye gukomeza guteza imbere umubano mwiza u Rwanda rufitanye n'u Buholandi nyuma yo kugirwa Ambasaderi mushya

IGIHE: Ibihugu byinshi by’i Burayi birimo umubare munini w’abakekwaho uruhare muri Jenoside yakorewe Abatutsi. Urugero ni nk’u Bubiligi aho wabaye. Guhuza umuryango urimo abantu babiri badahuje imyumvire mubishobozwa n’iki?

Amb Nduhungirehe: Ni byo koko hari ibihugu cyane cyane iby’i Burayi na Amerika aho hari abanyarwanda batari bake bakurikiranyweho icyaha cya Jenoside, ndetse n’u Rwanda rwohereje impapuro zo kubafata, hakaba n’abandi batari bake bakirangwa n’ingengabitekerezo ya Jenoside.

Ibyo biterwa n’umuco wo kudahana wabaye nyuma ya Jenoside yakorewe Abatutsi, hari abanyarwanda benshi bahunze, bahungira mu bihugu by’i Burayi na Amerika. Cyane cyane mu Bubiligi, mu Bufaransa ariko hari abari mu Buholandi, Canada n’ahandi. Abo bantu bahungiye muri ibyo bihugu nibo banakwirakwije ingengabitekerezo ya Jenoside.

Bayishyize mu bana babo, mu bo babana bo muri ibyo bihugu [...] Iyo tuvuga ingengabitekerezo ya Jenoside mu 2020 mu mahanga, kenshi ni ikosa ry’ibihugu bitumvise ko ari ngombwa gukurikirana abanyarwanda bakoze Jenoside.

Ariko tugomba kugira icyo tubikoraho, nka Guverinoma, nka za Ambasade. Ni ugukomeza kubakurikirana ku bufatanye bw’inzego z’ubutabera ndetse n’ibyo bihugu. Mwabonye ko hari ibihugu byagiye bifata abanyarwanda bikabohereza mu Rwanda cyangwa se bikabacira imanza.

Rero nk’urubyiruko, icyangombwa ni ukubaganiriza, ni ukubabwira u Rwanda bakarumenya, bakumva Jenoside yakorewe Abatutsi uko yateguwe kugira ngo twumve ko hari aho bashobora kumva ukuri.

Hari bamwe banangiye, banashyigikira imitwe yitwaje intwaro. Abo ni ukubarwanya twifashishije inkiko n’inzego z’ubutabera zo mu Rwanda n’izo muri ibyo bihugu.

Hakaba n’ibindi bikorwa byagiye bikorwa bijyanye no guhamagarira abanyarwanda gutaha. Hari nka Rwanda Day, gahunda za Come and See, Ndi Umunyarwanda n’izindi zituma abanyarwanda bumva neza uko igihugu giteye. Hari n’ibyakozwe nko mu Bubiligi byo gushyiraho amategeko ahana ingengabitekerezo ya Jenoside yakorewe Abatutsi.

IGIHE: Ukigera mu Bubiligi wasanze imyumvire abanyarwanda bari bafite ari iyihe? Wabasize he?

Amb. Nduhungirehe: Diaspora ntabwo igizwe n’abafite ingengabitekerezo gusa. Hari abandi benshi biga, bakora, bashyigikiye ibikorwa bya Ambasade, biga bashyigikira ibikorwa dukoresha n’indi minsi nk’iminsi yo Kwibuka. Bakora n’ibikorwa bibabeshaho bo ubwabo.

Nko mu Bubiligi, hari abanyarwanda bari ku murongo, bafite ibikorwa bakora, uruhare rwa Ambasade ni ukubafasha ibyo bikorwa bigatuma igihugu gitera imbere.

IGIHE: Mu 2010 wari muri dipolomasi. Ni cyo gihe u Rwanda rwari rwokejwe igitutu ku buryo bukomeye n’amahanga. Ni bwo rwahagarikiwe inkunga, nibwo hasohotse raporo nka za Mapping Report. Ibyo bintu byaturukaga kuki?

Amb. Nduhungirehe: Nakoze muri Ambasade y’u Rwanda mu Muryango w’Abibumbye. Nkihagera hashize amezi abiri gusa Mapping Report irasohoka, nyuma haza n’ibindi birego bijyanye n’intambara zo muri Congo ndetse na raporo zihoraho z’amashyirahamwe amwe avuga ko aharanira uburenganzira bwa muntu.

Hari imiryango iba ibiri inyuma, hari ibihugu biba bibiri inyuma ndetse n’abantu ku giti cyabo bagamije guha isura mbi u Rwanda. Kuko ibyo twumva ko twagezeho byiza kuva mu 1994, byo guharanira ubumwe n’ubwiyunge mu Banyarwanda, nyuma ya Jenoside yishe abantu barenga miliyoni muri iki gihugu, hari abumvaga ko u Rwanda rutazabaho.

Hari n’abatugiraga inama yo gukatamo ibice abanyarwanda hakabamo igice cy’abatutsi n’icy’abahutu. Kuba u Rwanda rwarabashije kwiyubaka, rugasana imitima ndetse ntiruhe urubuga abanyamahanga ngo batubwire ibyo tugomba gukora, ni ibintu bitishimirwa na buri wese.

Muribuka ko hari abanyamahanga cyane cyane n’iyi miryango itari iya leta yazaga hano kugira ngo itubwire ibyo tugomba gukora, ariko Guverinoma y’u Rwanda yavuze ko umurongo wayo ari uwo guharanira ubumwe bw’abanyarwanda, guharanira ko twasana igihugu ariko tukarenzaho tugahindura ubukungu bw’igihugu, tukaba tugeze aho tugeze [...] kumva ko ari ibintu byiza nk’abanyarwanda ntabwo biba bivuze ko hari ababyishimiye, hari imiryango mpuzamahanga, hari n’ibihugu. Ni uko ubona ibirego bidafite ishingiro bigenda biza hirya no hino.

Amb Nduhungireye yavuze ko mu myaka ya 2010 u Rwanda rwibasirwaga cyane n'imiryango hamwe n'ibihugu bitishimiraga iterambere ryarwo

IGIHE: Ni ibiki mushyize imbere nka Ambasaderi w’u Rwanda mu Buholandi?

Amb Nduhungirehe: U Buholandi ni igihugu tubanye neza, cyanafunguye Ambasade nyuma gato ya Jenoside yakorewe Abatutsi mu 1995, badufasha mu ngeri zitandukanye, harimo n’ubutabera, mu guhugura abacamanza n’ibindi.
Badufasha mu bijyanye n’ubuhinzi, ibijyanye n’amazi, dufitanye ubutwererane bumaze imyaka, ariko ikindi cy’umwihariko kiri ku Buholandi ni uko duhahirana.

Hari ibicuruzwa twoherezayo nk’indabo, ni igihugu cy’abacuruzi, twoherezayo imbuto ndetse n’ikawa n’icyayi. Hakaba n’ibindi bigomba kuzakorwa, Amsterdam ni nk’isoko ry’imari rikomeye, natwe turashaka kwiteza imbere mu byerekeye imari mu karere, ni ahantu twagirana ubutwererane tukabigiraho.

Abaholandi bashora imari mu Rwanda mu bintu binyuranye. Nka Heineken yashoye imari muri Bralirwa, indege ya KLM iza mu Rwanda, Sosiyete yitwa Unilever yashoye imari mu cyayi, hari Royal DSM yashoye imari muri sosiyete yitwa African Improved Food, bivuze ko ku byerekeye umubano tubanye neza, ubutwererane naho bimeze neza. Ishoramari nabyo byifashe neza.

Ubu u Buholandi bwifuje ko ibyerekeye ubutwererane nyir’izina byagenda bigabanuka, ahubwo tugashyira ingufu mu ishoramari, ari nabyo bihuye na gahunda y’u Rwanda.

IGIHE: Nk’Umunyarwanda ufite amafaranga ushaka aho ayashora, ni gute yabyaza amahirwe umubano mwiza w’u Rwanda n’u Buholandi?

Amb Nduhungirehe: Hari inzego dukorana, NAEB, PSF, RDB, izo nzego zisanzwe zikorana na Ambasade mu kureba amahirwe dufite mu isoko ryo mu Buholandi.

Hari nka Sosiyete zikora ubuhinzi bw’indabo nka Bella Flowers. Rero nitwe nka leta dukorana nabo kugira ngo turebe uko tuborohereza bagere kuri iryo soko.

IGIHE: Reka turebe ku zindi ngingo zitari politiki na dipolomasi, wenda ibikwerekeyeho ku giti cyawe. Wumva dipolomasi na politiki ari ibintu waraga umwana wawe?

Amb Nduhungirehe: Ubundi politiki na dipolomasi bijyanye no gukunda igihugu no kukivuganira, kugira ngo gitere imbere. Hari abumva ko ari ikintu kibi cy’abantu bamwe, ariko iyo ukunda politiki, dipolomasi, ni ugushakira ineza umuturage w’umunyarwanda.

Ni ukumushakira ubukungu, iyo duharanira ko ishoramari ryiyongera, riva mu mahanga, ibyo byose ni uguharanira inyungu z’umuturage.

Rero abantu ntibagatinye politiki, ntibagatinye dipolomasi, kubera ko ni ibintu bifitiye inyungu abanyarwanda kugera ku muturage wo hasi.

Abakiri bato bagomba guhitamo umwuga bifuza, n’abanjye baracyari bato ntabwo politiki barayumva neza bibereye mu bindi, ariko abifuza politiki bayijyamo ni umurimo mwiza.

IGIHE: Utekereza ari iyihe mpamvu abakiri bato batinya ibijyanye na politiki?

Amb Nduhungirehe: Ntabwo ari ibintu byo mu Rwanda gusa ni ibyo ku Isi hose. Urubyiruko ntabwo rukunda politiki. No mu bindi bihugu uzarebe hari aho rutanitabira n’amatora, ugasanga abafite munsi y’imyaka 30 cyangwa 25 ntabwo bitabira amatora.

Ntabwo ari n’urubyiruko, hari ababona ubuzima babayemo umunsi ku wundi bakabona bari mu bukene kandi hari abanyapolitiki batoye babahagarariye.

Bakumva ko ari ikosa ryabo, ko politiki ntacyo imaze, ahubwo hari abanyapolitiki bamwe baba badakora inshingano zabo neza mu bihugu byinshi turabibona, ugasanga baraharanira inyungu zabo [bwite], ugasanga hari ruswa yamunze igihugu, aho umuhanda wakagombye gukorwa ugasanga ntibyakozwe kubera iyo miyoborere mibi na ruswa. Rero icyo ni cyo gituma mu bihugu byinshi usanga hari abantu batitabira politiki.

Mu Rwanda iyo urebye ukuntu imiyoborere ihagaze, mu guteza imbere umuturage, ngira ngo biha umuturage icyizere n’urubyiruko ko politiki ifite akamaro, ko ifite icyo yabagejejeho.

Iyo ubonye umuhanda, uruganda rwashyizweho, Mutuelle de Santé abantu bivuza bafite ubwo bwishingizi, ibyo byose ni uko habaye icyo cyemezo cya politiki.

Niyo mpamvu urubyiruko rukwiye kumva ko politiki ari ingirakamaro cyane iyo ikozwe neza.

Amb Nduhungirehe watangiye kwinjira muri politiki akiri muto, yasabye urubyiruko kuyitinyuka kuko ari nziza mu gihe cyose ikozwe neza

IGIHE: Kera zari zo ndoto zawe cyangwa hari ibindi washaka gukora?

Amb Nduhungirehe: Yego numvaga nzaba umunyapolitiki. Kuva amashyaka menshi yaza nibwo nakunze politiki, ni ibya kera.

IGIHE: Umunsi wa mbere winjira mu Nama y’Abaminisitiri, niba ubyibuka, wiyumvise ute?

Amb Nduhungirehe: Nagiye muri Guverinoma ya mbere nyuma y’amatora ya Perezida wa Repubulika mu 2017, hari Minisitiri w’Intebe mushya, twagiye hariya mu Rugwiro, ntawe uririmbira abaminisitiri bashya, ariko uba wumva ufite ishema ryo kujya muri icyo cyumba gikorerwamo iyo Nama y’Abaminisitiri [...] byabaye ishema kuri njye.

Tuba turi abaminisitiri 30 muri miliyoni 12 z’abanyarwanda, biba bivuze ko ari inshingano zikomeye tuba dufite kugira ngo dufate ibyemezo bibereye abanyarwanda, ariko ibyo byoroshywa cyane n’abatuyobora cyane Perezida wa Repubulika.

IGIHE: Kuri wowe ibyishimo byuzuye ubisobanura ute?

Amb Nduhungirehe: Iyo Mukura yatsinze [aseka].

IGIHE: Ubwo ijoro ribi ni iryo Mukura yatsinzwe?

Amb. Nduhungirehe: Buriya iyo ikipe yawe yatsinzwe ntabwo wavuga ngo wagize ijoro ribi cyane ngo ubikabirize, ahubwo akenshi ubivanamo amasomo kubera ko ubuzima buzakomeza, haba hari indi mikino izaba, icyangombwa ni ukubyigiraho. N’ahandi mu buzima busanzwe ni ko bimeze. Buri gihe iyo habaye ibibazo ni ukuvanamo amasomo kugira ngo ubutaha bizamere neza.

IGIHE: Hari intsinzi n’intsinzwi ya Mukura utazibagirwa mu buzima bwawe?

Amb. Nduhungirehe: Hari igikombe bitaha Trophée President Habyarimana cyo ku itariki ya 5 Nyakanga 1986. Umukino nari nagiye kuwureba, Mukura yatsinze Panther Noir ibitego 2-1. Uwo mukino waranshimishije n’ubu ndacyawibuka.

Hari n’indi mikino Mukura yatsinzeho ikipe yo muri Eswatini, hari n’ejo bundi mu 2018 aho Mukura yatwaye igikombe cy’amahoro.

Buriya umupira w’amaguru, ni ibintu byiza ku banyarwanda, buriya iyo abafana bishimye kubera ko ikipe yabo yatsinze, ubona n’abafite ibibazo bisanzwe mu buzima bibaha ishema ku buryo iyo rimwe na rimwe ubonye haje ubushyamirane, ubona atari ibintu byiza. Njye icyo nzira ni ubushyamirane hagati y’abafana.

IGIHE: Bibaye ho ko Mukura isenyuka, wahagarika gufana?

Amb. Nduhungirehe: Ibyo ntabwo bizabaho. Ni ikipe ifite amateka, ni yo kipe mu ziriho imaze imyaka myinshi, buriya yashinzwe muri za 1930 n’Ababiligi.

Yagiye yitwa amazina menshi, yiswe Victoria, nyuma iza kwitwa Mukura mu 1963. Ni yo kipe imaze imyaka myinshi, nubwo atari yo kipe yo mu Rwanda yashinzwe mbere y’andi kuko nk’Amagaju yashinzwe mbere ya Mukura ariko yamaze igihe kinini yarahagaze.

IGIHE: Ukuntu uvuga umupira w’amaguru, umuntu yakeka ko hari irindi sano ufitanye nawo...

Amb Nduhungirehe: Umupira narawukinnye mu ikipe yo muri Quartier yitwaga Jaguar. Yaje kujyamo n’abakinnyi bakinnye mu makipe akomeye nka ba Desiré Mbonabucya, Frédéric Ntare, ariko nanayikunze mbere nkiri umwana kuko nka Papa wambyaye yarayikurikiraga kuva kera kuko ari ikipe y’iwabo i Butare.

IGIHE: Ni iyihe ndangagaciro ubona ku muntu uwo ariwe wese ukumva urayishimiye?

Amb Nduhungirehe: Indangagaciro ya buri wese ni ukurangwa no kuvugisha ukuri, kutaryarya, kutagira uburiganya. Hari igihe usanga umuntu muba muganira neza ariko nyuma akakuvuga ibindi.

IGIHE: Ni uwuhe muntu ufatiraho urugero, nubwo utamera nkawe ariko umwigiraho byinshi?

Amb Nduhungirehe: Iyo urebye iki gihugu ahantu kigeze, ubona ko bifite aho byaturutse, kuko iyo u Rwanda rugira indi miyoborere cyangwa se abandi bantu baruyobora, rushobora kuba rwariyubatse ariko rutageze aho rugeze.

Buriya twe abanyarwanda dufite ibintu byiza twagezeho kubera ko hari Perezida Paul Kagame wabashije gukora ibyo benshi batakekaga.

Hari ibijyanye no gusana imitima, urumva Jenoside, hapfuye abantu barenga miliyoni kandi ntabwo ari ingabo n’interahamwe gusa baje ngo bice abantu. Ni abaturanyi, ni abavandimwe bishe benewabo.

Bivuze ko igihugu n’imibanire y’abantu byari byarazambye ariko hagaragaye ubushake bwo gusana imitima, ubumwe n’ubwiyunge ndetse n’impunzi zari zarahungiye muri Congo, nyinshi zirataha.

Hakiyongeraho ibyo guteza imbere igihugu kugira ngo kibe intangarugero muri byinshi gikora. Hari uwakubwira ko ari ibintu byari byitezwe ku wo ariwe wese, ntabwo ari uko bimeze.

Twese turabizi ababaye muri iyi leta, ibyo byose byakozwe kubera ubuyobozi bwiza burangajwe imbere na Perezida wa Repubulika. Rero ku munyarwanda wese ureba iki gihugu aho kigeze, ahubwo areba ibyabaye mu 1994, si nanjye ubivuga gusa, n’urubyiruko rw’abanyafurika rurabivuga ko ari icyitegererezo.

Amb Nduhungirehe yishimira imyaka yamaze ari umwarimu w'amategeko y'imisoro muri Kaminuza zitandukanye zo mu Rwanda

IGIHE: Akazi ka mbere wakoze ukirangiza amashuri wahembwe amafaranga angahe?

Amb Nduhungirehe: Buriya umushahara si byiza kuwuvuga [...] akazi ka mbere nakoze, hari stage nakoze mu Bubiligi ku bintu bijyanye n’imisoro [nize ibijyanye n’imisoro].

Ariko akazi ka mbere nakoze ni ako kwigisha, nigishaga muri UNILAK na ULK na ICK ya Kabgayi ku byerekeye amategeko y’imisoro.

Ariko nabikoze igihe gito ndi umukozi uhoraho mu 2004 nyuma mpita mba Umunyamabanga wihariye w’Umunyamabanga wa Leta muri Minisiteri y’Ubucurizi n’Inganda ushinzwe inganda no guteza imbere ishoraramari. Ariko nakomeje kwigisha nimugoroba no muri weekend kugera mu 2007.

Nyuma njya mu kanama kihariye gashinzwe kuvugurura amategeko y’ubucuruzi, ni akanama kari kagizwe n’abantu batandatu.

Nyuma nagiye muri Ambasade y’u Rwanda i Addis Ababa, nyuma nimurirwa i New York, ntangira ndi umujyanama wa mbere ariko nyuma mba Minister Counselor, icyo gihe twari tugiye kwinjira mu Kanama k’Umutekano ka Loni.

I New York nahamaze imyaka itanu hanyuma ndataha mu 2015, aho nabaye Umuyobozi Mukuru muri Minafett ushinzwe imiryango mpuzamahanga, nahamaze amezi atandatu, arindwi, hanyuma ngirwa Ambasaderi w’u Rwanda mu Bubiligi.

IGIHE: Ni iki wakunze mu gihe gito wamaze uri umwarimu?

Amb Nduhungirehe: Gutanga ubumenyi ni ikintu cyiza. Wumva hari ikintu wakoze kigaragara, kumva ko wigishije umuntu ikintu akagifata, akakimenya akazagikoresha mu buzima.

Ni ibintu byiza. Cyane mu byo nize by’amategeko y’imisoro kuko ni ibintu bigira akamaro mu bihugu byose, ariko icyo gihe nta bantu benshi bari barabyize mu Rwanda. Byampaye ishema ryo kubyigisha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .