Urugendo Minisitiri Dr Sezibera yagiriye mu Misiri rwatangiye gusoromwaho imbuto

Yanditswe na IGIHE
Kuya 23 Kamena 2019 saa 12:47
Yasuwe :
0 0

Umubano wa Misiri n’u Rwanda watangiye mu myaka yo hambere ubwo u Rwanda rwafunguraga Ambasade yarwo i Cairo n’iki gihugu cyo mu Majyaruguru y’Uburasirazuba bwa Afurika kigafungura iyacyo mu rwa Gasabo nyuma gato yo kubona ubwigenge.

Ibihugu byombi byubakiye ubucuti bwabyo mu bijyanye n’ishoramari ribumbatiwe n’ingeri eshatu zirimo ubucuruzi, uburezi n’ubuzima.

Umwaka wa 2019 watangiranye isura nshya mu mubano w’u Rwanda na Misiri. Ni wo Perezida Kagame wari ukuriye Umuryango wa Afurika Yunze Ubumwe mu 2018, yashyikirijemo mugenzi we wa Misiri, Abdel Fattah El Sisi inkoni yo kuwuyobora.

Ntibyagarukiye aho gusa kuko n’abayobozi bakuru mu nzego za leta, bakomeje guhura mu kubaka umubano utajegajega uhuriweho.

Mu ntangiriro za Kamena 2019, Minisitiri w’Ububanyi n’Amahanga w’u Rwanda, Dr Sezibera Richard, yagiriye uruzinduko i Cairo mu Misiri aho yakiriwe na mugenzi we wa Misiri, Sameh Shoukry, baganira ku kunoza umubano w’ibihugu byombi.

Abayobozi bombi mu byo baganiriyeho bikije cyane ku iterambere ry’ishoramari no gufungurirana amarembo.

Ambasaderi w’u Rwanda mu Misiri, Sheikh Habimana Saleh, yabwiye IGIHE ko imbuto zakomotse muri urwo rugendo zatangiye kugaragara.

Dr Sezibera na Sameh Shoukry bemeranyijwe ko mu mpera z’umwaka bazongera guhura bagasuzuma uko amahirwe y’ishoramari abyazwa umusaruro.

Ambasaderi Habimana yakomeje avuga ko “Bemeje ko bazahurira i Kigali bagasinya amasezerano ahuriweho. Azashingira ku bwisanzure bw’ishoramari hagati y’ibihugu byombi no kuzarebera hamwe uko bakemura ibibazo bizagaragazwa n’abashoramari.’’

Nyuma y’urugendo rwa Minisitiri Dr Sezibera, abashoramari bo mu bihugu byombi batangiye kugenderanira no kureba ahari amahirwe babyaza umusaruro.

Babifashijwemo na Ambasade y’u Rwanda mu Misiri, abashoramari bo mu rwego rw’ubwikorezi mu gihugu, bagiriye urugendo i Cairo ku wa 20 Kamena 2019.

Bahuye na Banki Nyafurika iteza imbere Ubucuruzi ya Afreximbank, ibasaba kwihuza ngo bahabwe ubufasha mu kuvugurura ubwikorezi mu Rwanda.

Iyi nama yitabiriwe n’abahagarariye sosiyete z’ubwikorezi bw’abantu n’ibintu mu gihugu nka ATPR (Association des Transporteurs des Personnes au Rwanda); Jali Holdings Company na RITCO.

Umuyobozi wa ATPR, Mwunguzi Théoneste, yabwiye IGIHE ko urugendoshuri rwo kunoza ishoramari bakoreye mu Misiri biteze kurwungikiramo.

Yagize ati “Twaganiriye na Afreximbank, batubwiye ko nk’abantu bishyize hamwe, bashobora kudutera inkunga dukeneye ngo gutwara abantu tubikore bigezweho.’’

Muri uku kwihuza hazashyirwaho umuvugizi umwe wa sosiyete zitwara abantu, uzakorana n’Umujyanama muri Ambasade y’u Rwanda mu Misiri, Eric Kayoge n’umukozi wa Afreximbank mu gutegura no kunoza neza umushinga uzabemerera kubona inguzanyo.

Mwunguzi na bagenzi be basangije Afreximbank aho u Rwanda ruhagaze mu bwikorezi bwinjijwemo ikoranabuhanga mu kugurisha amatike, gutegesha ikarita ya Tap and Go no gufasha abagenzi gukoresha internet y’ubuntu mu modoka.

Mu cyerekezo cya Afreximbank ishaka ko ubwikorezi buhuza ibihugu bya Afurika bigafasha abaturage koroherwa no kugenderana no guhahirana.

Ati “Twasanze batwizera kurushaho. Dukurikije ibiganiro twagiranye bo ntibashaka gutanga amafaranga make. Dukeneye nka miliyari 50 Frw. Turashaka gukora ubwikorezi bushobora no gusohoka bukarenga igihugu. Muri ayo mafaranga tuyabonye harimo ayakoreshwa mu kugura imodoka n’ibindi bikoresho byisumbuyeho.’’

Abanyenganda bo mu Misiri batangiye kurambagiza amahirwe y’ishoramari mu Rwanda

Ambasade ya Misiri mu Rwanda, Urugaga rw’Abikorera (PSF) n’Ikigo cy’Igihugu cy’Iterambere (RDB) byahuje abanyenganda bo mu Misiri n’abikorera bo mu Rwanda mu gikorwa kigamije kubafasha kumenya aho bafatanya mu ishoramari.

Iki gikorwa cyabereye mu Mujyi wa Kigali ku wa 21 Kamena 2019. Byitezwe ko abashoramari ku mpande zombi bashobora gukorana mu kohererezanya ibicuruzwa, ubufatanye mu kubyaza umusaruro ibikomoka ku buhinzi n’ibindi.

Umuyobozi ushinzwe Abanyamuryango ba PSF, Kaneza Natacha, yavuze ko iki gikorwa kigamije gushimangira imikoranire mu bucuruzi buhuriweho.

Yagize ati “Iki gikorwa kiri guhuza abashoramari mu nganda zo mu Misiri n’abacuruzi bo mu Rwanda, kigamije kubafasha kureba ibyo inganda za bo zikora kandi bikenerwa cyane ku isoko ryo mu Rwanda. Hari kandi amahirwe y’uko bazubaka inganda zabo mu Rwanda.”

Abashoramari bo mu Misiri bafite inganda zikomeye zitunganya ibikoresho n’ibicuruzwa bitandukanye zigera kuri 16 ni zo zahujwe n’abikorera mu Rwanda.

Uwari uhagarariye abashoramari bo mu nganda bo mu Misiri, Dina Helal, yavuze ko bafite intego yo koroshya ubucuruzi hagati y’ibihugu byombi.

Ati “Hari byinshi bishoboka cyane kuko niba hari n’ikibazo cy’amafaranga, dushobora kuvugana n’amabanki y’iwacu tukayereka amahirwe ari mu gushora imari mu Rwanda, amafaranga akaboneka.’’

Yakomeje avuga ko “Icyo dushaka ni ugukora ibishoboka byose ku buryo mu myaka izaza tuzubaka inganda hano, tukajya tugemura ibicuruzwa mu bindi bihugu byo hafi hano ariko byakorewe mu Rwanda. Turacyabyigaho, turacyashaka n’abafatanyabikora hano ariko turizera ko bizagenda neza.”

Ambasaderi wa Misiri mu Rwanda, Ahmed Samy Mohamed El-Ansar, yavuze ko nyuma y’uruzinduko Minisitiri Sezibera yagiriye mu Misiri ubu igishyizwe imbere ni ukubaka ubukungu bw’ibihugu.

Ati “Iki ni kimwe mu mikoranire ikwiye kuranga imikoranire ihuriweho mu rwego rw’ubucuruzi. Hari byinshi ibihugu byombi bizakorana nk’ibinyamuryango bya Afurika Yunze Ubumwe na COMESA n’izindi mpamvu. Turabizi ko u Rwanda rworohereza abashoramari, birashoboka ko hari inganda z’Abanyamisiri zizubakwa hano. Hari abo twavuganye bari kubyigaho.”

Raporo ya Banki y’Isi yo mu Ukwakira 2018, yagaragaje ko mu koroshya ubucuruzi, u Rwanda ruri ku mwanya wa 29 mu bihugu 190 ku Isi, n’uwa kabiri muri Afurika inyuma y’Ibirwa bya Maurice.

Abanyarwanda bagiranye ibiganiro na Afleximbank biganisha ku buryo bahabwa inkunga yo guteza imbere urwego rw'ubwikorezi
Ibi biganiro byateguwe na Ambasade y'u Rwanda mu Misiri
Abakora mu rwego rw'ubwikorezi mu Rwanda, basuye uruganda rwo mu Misiri ruteranya imodoka za Benz Mercedes
Abanyarwanda beretswe imodoka ziteranyirizwa mu Misiri zishobora kwifashishwa mu gutwara abantu benshi
Abikorera bo mu Rwanda bagiranye ibiganiro na bagenzi babo bo mu Misiri mu mpera z'iki cyumweru. Ambasaderi wa Misiri mu Rwanda, Ahmed Samy Mohamed El-Ansar aha yari ari kuganira n'Umuyobozi wa PSF, Stephen Ruzibiza
Dina Helal wari uhagarariye abanyenganda bo mu Misiri
Ambasaderi wa Misiri mu Rwanda, Ahmed Samy Mohamed El-Ansar, yavuze ko nyuma y’uruzinduko Minisitiri Sezibera yagiriye mu Misiri ubu igishyizwe imbere ni ukubaka ubukungu bw’ibihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza