Uruganda rwa mbere rukora imiti mu Rwanda rwahawe icyemezo cyo gukora

Yanditswe na IGIHE
Kuya 18 Gashyantare 2020 saa 03:45
Yasuwe :
0 0

Ikigo gishinzwe kugenzura Ibiribwa n’Imiti mu Rwanda (FDA) cyishimiye gutangaza ko cyemereye uruganda rwa mbere rukora imiti mu Rwanda gukora.

Nk’uko FDA ibitangaza, uruganda rwa Apex Biotech Ltd, ruzajya rukora ubwoko 34 bw’imiti burimo; ibinini, imiti yo mu bwoko bw’ifu ndetse n’iyisukika.

Uru ruganda ruzajya rukora imiti irimo ikoreshwa mu kuvura indwara ziterwa n’udukoko (bacteries) izwi nka ‘antibiotiques’, imiti igabanya uburibwe, imiti ya malaria, imiti ivura igituntu n’igabanya ubukana bwa Sida.

Uru ruganda rwubatswe mu cyanya cyagenewe inganda, Kigali Special Economic Zone.

Biteganywa ko mu mwaka wa mbere w’ibikorwa, Apex Biotech Ltd izaha akazi abakozi barenga 100 b’imbere mu gihugu kugira ngo bagire ubumenyi n’ubunararibonye mu bikorwa by’uru ruganda.

Uwari Minisitiri w’Ubuzima, Dr Diane Gashumba, ubwo uru ruganda rwatangiraga kubakwa yabwiye IGIHE ko ubusanzwe imiti irenga 90 % u Rwanda rwayitumizaga mu mahanga, ku buryo uru ruganda ruzafasha mu kuziba icyo cyuho usanga kigendana n’ikiguzi gihanitse.

Ati “Imiti izajya ikorerwa aha, urumva n’igiciro kizagabanyuka, n’ubuziranenge bwiyongere kuko tugiye no kugira ikigo kizajya gipima ubuziranenge, noneho byanakorewe hano, igenzura rizaba ryoroshye. Ikindi bizatanga akazi ku bantu benshi, n’imiti iboneke vuba hatarinze kujyaho kirya gihe cy’ubwikorezi cyajyaga gituma abantu bashobora nko kumara umuti runaka indi itarahagera.”

Yakomeje agira ati “Tugira nka miliyari 30 Frw ku mwaka zo kugura imiti, kuyibika no kuyitwara mu mavuriro hirya no hino mu gihugu. Twavuga ko kuyigura byonyine bitwara nka miliyari 25Frw. Ubwo tugize inganda nyinshi atari na ruriya rwonyine, hagabanyuka byinshi cyane.”

Apex Biotech Ltd, yizeza ko imiti ikora iba yujuje ubuziranenge kuko hari uburyo bugezweho bwo kuyisuzuma hagendewe ku mahame mpuzamahanga ku buryo nta mpungenge zikwiye kuba ku mirimo yarwo.

Uru ruganda ruri mu cyanya cyahariwe inganda i Masoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .