Urugaga rw’amadini mu kubungabunga ubuzima rwasabye Abanyarwanda kubahiriza ingamba zo guhashya COVID-19

Yanditswe na Habimana James
Kuya 26 Werurwe 2020 saa 09:42
Yasuwe :
0 0

Urugaga rw’Amadini n’Amatorero mu kubungabunga Ubuzima (RICH), rwavuze ko Abanyarwanda bagomba kwirinda ibikorwa byose bishobora gutuma bandura icyorezo cya COVID-19 giterwa na Coronavirus, bakirinda ibikorwa birimo guhoberana no kuramukanya abantu bahana ibiganza.

Imibare ya Minisiteri y’Ubuzima mu Rwanda igaragaza ko abantu 41 aribo bamaze kwandura iki cyorezo cyibasiye Isi.

Umuyobozi wa RICH, Musenyeri Antoine Kambanda, unayobora Arkidiyosezi ya Kigali, yashimiye ingamba zafashwe na Leta mu kwirinda no gukumira ko COVID-19 no kwita ku bamaze kwandura.

Yavuze ko nk’Urugaga rw’Amadini n’Amatorero mu kubungabunga Ubuzima bafite inshingano zikomeye mu guhagarika ikwirakwizwa rya Coronavirus.

Yakomeje ati “Mu rwego rwo gukurikiza ingamba za leta turasaba buri wese gukurikiza amabwiriza yose zashyizweho mu gukumira ikwirakwizwa ry’iyi virus. Turashishikariza abayobozi b’amadini n’amatorero n’abandi bafatanyabikorwa kugeza izi ngamba ku bavandimwe.”

Musenyeri Kambanda kandi yavuze ko abantu bagomba kwirinda amakuru y’ibihuha, bagakurikiza gusa amakuru atangwa n’Ikigo cy’Igihugu cy’Ubuzima, RBC, Minisiteri y’Ubuzima n’Ishami ry’Umuryango w’Abibumbye ryita ku Buzima, OMS.

Yavuze ko abantu bakwiye gusenga kugira ngo iki cyorezo kirandurwe, kandi haboneke umuti wacyo.

Yagize ati “Dukomeze gusengera abantu bose bari kugerwaho n’ingaruka za Coronavirus. Imana idufashe guhagarika iki cyorezo, ikize abarwayi kandi ifashe abashakashatsi kubona umuti n’urukingo vuba.”

RICH igizwe n’amadini n’amatorero yibumbiye mu miryango itandatu ari yo Kiliziya Gatolika, Itorero ry’Abangilikani mu Rwanda, Inama y’Abaporotesitanti mu Rwanda, Ihuriro ry’amatorero y’ivugabutumwa mu Rwanda, Umuryango w’Abayisilamu mu Rwanda n’Impuzamatorero y’Abaporotesitanti bavuguruye mu Rwanda.

U Rwanda rwafashe ingamba zirimo gufunga amashuri, insengero n’ibikorwa bihuza abantu benshi. Mu ngamba zatangiye kubahirizwa uhereye ku wa Gatandatu zirimo ko ingendo zitari ngombwa zihagarikwa.

Itangazo rya Minisitiri w’Intebe rivuga ko "Gusohoka mu rugo nta mpamvu zihutirwa birabujijwe, keretse abajya gutanga no gushaka serivisi z’ingenzi harimo kwivuza, guhaha, serivizi za banki n’izindi."

Abanyarwanda basabwa gukurikiza ibikorwa birimo kwirinda ingendo zitari ngombwa no gusohoka mu ngo nta mpamvu, kwirinda gukoranaho, kwirinda kuramukanya abantu bahoberana cyangwa bahana ibiganza, gushyira aho gukarabira ahantu hahurira abantu benshi.

Umuntu wagaragaweho n’ibimenyetso bya Coronavirus asabwa kuguma mu rugo ahubwo agahamagara nimero itishyurwa ya 114 cyangwa agahamagara abajyanama b’ubuzima.

Umuyobozi w’Urugaga rw’Amadini n’Amatorero mu kubungabunga Ubuzima (RICH), Musenyeri Antoine Kambanda, yashimiye ingamba zafashwe na Leta mu kwirinda no gukumira ko COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .