00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rwitabiriye #CHOGM rwasabwe kwishakamo ibizubizo no kutihunza inshingano

Yanditswe na Ntabareshya Jean de Dieu
Kuya 19 June 2022 saa 01:54
Yasuwe :

Minisitiri w’Urubyiruko n’Umuco mu Rwanda, Rosemary Mbabazi, yatangije ku mugaragaro inama y’ihuriro ry’urubyiruko rwo mu bihugu bigize Umuryango w’Ibihugu bikoresha ururimi rw’Icyongereza, Commonwealth, asaba abitabiriye guharanira gutegura ahazaza mu rwego rwo kwiteza imbere.

Iyi nama y’urubyiruko iri kubera i Kigali mu Intare Arena, yitabiriwe n’urubyiruko rusaga 350 rwo mu bihugu 54 bigize umuryango wa Commonwealth. Ifite intego igira iti “Taking charge of our Future” ugenekereje mu Kinyarwanda ni “ukugira uruhare mu gutegura ahazaza hacu”.

Minisitiri Rosemary Mbabazi yagaragaje ko urubyiruko rw’u Rwanda rwashyizwe imbere kandi rukagaragaza ubushake bukomeye mu gukora iyo bwabaga kugira ngo igihugu gikomeze kuba ku isonga.

Yagize ati “Mu Rwanda urubyiruko twarushyize ku ruhembe kandi ibi byabafashije kongera ubushobozi bwabo mu guhanga udushya no gufungura ibitekerezo byabo. Iyi nama y’urubyiruko yashyiriweho guhuza ibitekerezo by’urubyiruko.”

Yasabye uru rubyiruko rwitabiriye iyi nama kwiga gufata imyanzuro no kwemera inshingano mu gihe bahanganye n’ikibazo runaka, cyane ko izigirwamo byinshi bitandukanye birimo ibirebana n’uruhare rw’urubyiruko mu gufata ibyemezo, ubucuruzi, kwihangira imirimo, kubungabunga ibidukikije n’ ikoranabuhanga.

Ati “Ndabasaba gushaka ubucuti buzabafasha mu kubona isoko ririrambye ry’ibyo mukora. Muhange udushya tugamije gushakira hamwe ibisubizo byugarije sosiyete yacu, nizeye ko muzava aha mufite byinshi muhakuye bigamije iterambere.”

Yasabye ko uru rubyiruko rukwiye kumva neza icyo bivuze gutegura ahazaza harwo mu iterambere, aho kumva ko hari undi ushobora kurutegurira ejo heza.

Ati “Ndagira ngo mbasabe dutangire gutekereza ku cyo bivuze mu gutegura ahazaza ku rubyiruko. Ntibikwiye kuba mu magambo ahubwo bikwiye kuba mu bikorwa. Ndashaka ku babaza ibibazo bike ariko namwe mukomeze kubitekerezaho. Ese ubuzima bwacu buri mu maboko yacu cyangwa mu biganza by’undi muntu? Ese twaba turi gukora ibikwiriye cyangwa turi kwihunza inshingano? Ese waba uri gukora ibikwiye gukorwa mu gutegura ejo hawe hazaza? turi gutekereza icyo gutegura ahazaza bifuze kuri twe?”

Minisitiri Mbabazi yagaragaje ko hari imyumvire ikwiye kuranga abantu bafite gahunda yo gutegura neza ahazaza habo mu rwego rwo guharanira iterambere ku giti cyabo aho kuritegereza ku bandi.

Ati “Nizeye ko abo ari bantu bari mu bintu n’umutima wabo wose. Bategura neza ubuzima bwabo, bubaha igihe cyabo kandi bafata inshingano. Ntimukwiye gufata ibintu mu buryo mwumva ko ari ibisanzwe. Nibyo bashobora gukosa ariko ayo makosa yakozwe barayemera kandi bakayigiraho kugira ngo bagire indi ntambwe batera. Iyo utagize icyo uharanira nta n’icyo ugereho."

Bimwe mu bibazo bibangamiye urubyiruko kuri harimo ubushomeri bwanatijwe umurindi n’icyorezo cya COVID-19.

Biteganyijwe ko muri iri huriro ry’urubyiruko hazareberwa hamwe ingamba zishobora no kuzagezwa ku bakuru b’ibihugu na za guverinoma ku munsi wa nyuma wo gusoza iyi nama.

Uru rubyiruko kandi ruzanagira amahirwe yo guhura n’abakuru b’ibihugu na za guverinoma mu biganiro bitandukanye.

Iyi nama y’ihuriro ry’urubyiruko rwo mu muryango wa Commonwealth izibanda ku ngingo zitandukanye zirimo imiyoborere myiza, ikoranabuhanga, ubumenyi, guhanga udushya, iterambere rirambye, ubuzima, Covid-19 ndetse n’ubucuruzi.

Umwe mu bayobozi w’Umuryango Mpuzamahanga w’urubyiruko International Youth Task Force ugizwe n’urubyiruko 21 bo mu bihugu bigize Commonwealth, Iradukunda Alodie yagarutse cyane ku kamaro ku rubyiruko by’umwihariko mu Rwanda uburyo rwitwaye mu gihe cy’icyorezo.

Ati “Mu Rwanda urubyiruko rw’abakorera bushake rwagaragaje ubuhanga ndetse n’imbaraga zarwo mu guhangana n’icyorezo cya Covid-19 . No mu bindi bihugu bigize umuryango wa Commonwealth muri iki gihe bakoze ibishoboka byose mu gufasha ibihugu byabo guhangana n’icyorezo. Urubyiruko nitwe zingiro ry’iterambere ry’igihugu cyacu.”

Yagaragaje ko inama y’ihuriro ry’urubyiruko rwo mu Muryango wa Commonwealth yitezweho guhindura byinshi mu byabangamiraga urubyiruko rugize uyu muryango kandi ko ari amahirwe akomeye rubonye yo gutegurira hamwe ejo heza hifuzwa.

Umuyobozi Mukuru w’Ihuriro ry’Urubyiruko rugize Commonwealth, Kim Allen yavuze ko muri iyi nama bazagaruka ku bibazo bikibangamiye urubyiruko, ibisubizo n’ingamba zafatwa mu guteza imbere urubyiruko.

Yagaragaje ko rimwe na rimwe imbogamizi cyangwa ibibazo bishobora kuvamo amahirwe. Aha yagarutse cyane ku bibazo byugarije isi birimo ihindagurika ry’ikerere, ubukungu butifashe neza ndetse n’ubusumbane bukigaragara mu burezi.

Umunyamabanga Mukuru wungirije w’Umuryango wa Commonwealth, Dr Arjoon Suddhoo yagarutse ku gaciro ko guha umwanya urubyiruko cyane ko rugize umubare munini w’abaturage bagize umuryango wa Commonwealth, aho bagize 60% by’abaturage bose.

Ati “Iyi nama irarebera hamwe ahazaza hacu, iri huriro ry’urubyiryuko ni ingenzi kuko moteri y’iterambere ari urubyiruko. Buri mwaka urubyiruko rugira umwanya. Guhereza urubyiruko imbaranga ntidukwiye kwibagirwa abo mu bihugu bikiri mu nzira y’amajyambere. Uku kwangirika gukomeye kw’ikiremwamuntu bigira ingaruka zikomeye kuri twese.”

Iri huriro ry’urubyiruko ni umwanya mwiza rubonye wo kugaragaza zimwe mu mbogamizi zikirubangamiye ndetse no kwerekana ibyifuzo byarwo kuri za guverinoma mu gutegura ahazaza heza h’umuryango wa Commonwealth.

Minisitiri Mbabazi yavuze ko urubyiruko rukwiriye kumenya neza icyo rushaka kugira ngo rumenye aho rugana
Kuba Commonwealth igizwe na 60 % by'urubyiruko, inzobere zagaragaje ko ari amahirwe adasanzwe
Minisitiri Mbabazi yasabye urubyiruko rwa Commonwealth kugira uruhare mu gutegura ejo heza
Makeda Mahadeo niwe wari umusangiza w'amagambo muri iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .