Urubyiruko rwatanze umukoro wo kubakwamo ‘ubunyarwanda’ rwigishwa amateka nyayo y’u Rwanda

Yanditswe na Uwimana Abraham
Kuya 31 Ukwakira 2020 saa 06:16
Yasuwe :
0 0

Mu gusoza ihuriro rya 13 rya Unity Club Intwararumuri, ryari rifite insanganyamatsiko igira iti “Ndi Umunyarwanda, igitekerezo-ngenga cy’ukubaho kwacu”, abanyamuryango bitabiriye iri huriro baba abo mu Rwanda n’abo hanze y’u Rwanda, bagaragaje ko hari byinshi bigikwiriye gushyirwamo imbaraga mu gutoza urubyiruko “Ndi Umunyarwanda”.

Mu gusoza ihuriro rya 13 rya Unity Club Intwararumuri, ryari rifite insanganyamatsiko igira iti “Ndi Umunyarwanda, igitekerezo-ngenga cy’ukubaho kwacu”, abanyamuryango bitabiriye iri huriro baba abo mu Rwanda n’abo hanze y’u Rwanda, bagaragaje ko hari byinshi bigikwiriye gushyirwamo imbaraga mu gutoza urubyiruko “Ndi Umunyarwanda”.

Abanyarwanda batandukanye biganjemo urubyiruko by’umwihariko urwo muri Diaspora rwatanze ibitekerezo muri iri huriro, rwagaragaje ko hakwiye kurushaho gukazwa ingamba zo kwigisha urubyiruko ukuri ku mateka y’u Rwanda, no kurwigisha ubumwe n’ubwiyunge kuko hari benshi baruyobya.

Agasaro Aurore wo mu karere ka Karongi, mu gitekerezo yatanze yagaragaje ko bafite inyota yo kumenya amateka y’ukuri yaranze igihugu, kugira ngo birinde ababayobya.

Ati “Turabasaba rero abakuze ko bakomeza kuduha umwanya wo kutwigisha amateka y’igihugu cyacu, haba mu miryango aho duhererwa uburere, ndetse no mu mashuri aho turahura ubumenyi, kuko dufite inyota yo kubimenya. Ibi bizadufasha kwirinda ba bandi baza badushuka bagoreka amateka y’igihugu cyacu.”

Ange Aisha wari uhagarariye urubyiruko rw’u Rwanda ruba muri Koreya y’Epfo, yavuze ko bumva hajyaho umunsi uhuza urubyiruko rw’u Rwanda rwo muri Diaspora rwose, kugira ngo baganirizwe ku mateka y’igihugu no kuri gahunda ya Ndi Umunyarwanda.

Ati “Hakwiye kubaho umunsi ngarukamwaka, uhuza urubyiruko, rw’abanyarwanda ruherereye mu bihugu bitandukanye, kugira ngo tuganire ndetse tukanarushaho gucengerwa na gahunda ya Ndi Umunyarwanda. Hanakwiriye gukorwa urubuga rwa Ndi Umunyarwanda rugafasha umuntu wese aho ari hose kubona amakuru y’ukuri kandi byihuse kugira ngo tubashe kunyomoza abakwirakwiza amakuru atari ukuri.”

Bimwe mu byemezo-ngiro abanyamuryango bitabiriye iyi nama bagaragaje nk’ibyo bagiye gushyira imbere harimo komorana ibikomere by’amateka urubyiruko rw’abanyarwanda baba mu mahanga bakura ku babyeyi na bakuru babo bakibeshywa n’ingengabitekerezo ya Jenoside.

Harimo kandi gukoresha ibiganiro bihuza urubyiruko kugira ngo rugire umwanya wo kuganira no gusobanurirwa n’abakuru amateka nyayo yaranze u Rwanda, hashyirwa imbaraga mu kongera ireme n’ingano za gahunda zihugura urubyiruko ku mateka y’u Rwanda hifashishijwe ikoranabuhanga.

Mu bindi kandi biyemeje harimo gushishikariza imiryango y’Abanyarwanda baba mu mahanga gusigasira ubumwe bw’Abanyarwanda, batoza abana indangagaciro za Ndi Umunyarwanda, n’ibindi.

Umuyobozi Mukuru Wungirije wa unity Club Intwararumuri, Dr Nsanzabaganwa Monique, yavuze ko Ndi Umunyarwanda ikwiye kurushaho kwimakazwa aho ari ho hose, kuko ari igihango gikomeye.

Ati “Ndi Umunyarwanda iduherekeze aho turi hose, itwinjize mu ikoranabuhanga no ku mbuga nkoranyambaga; kuko uwambaye Ubunyarwanda agendana ubudahangarwa mu ngamba z’ubumenyi n’ubukungu, akamenya kurinda iby’u Rwanda, ibya none n’ejo hazaza.”

Yongeyeho ati “Tuzagaruka kenshi ku nsanganyamatsiko zishimangira Ndi Umunyarwanda, tuzirikana za nkingi eshatu yubakiyeho, ari zo kwiyumvamo Ubunyarwanda, komora ibikomere by’amateka, no kwimakaza indangagaciro na kirazira z’umuco nyarwanda.”

Dr Nsanzabaganwa kandi yashimangiye ko urubyiruko rutanga icyizere muri gahunda ya Ndi Umunyarwanda, aho yagiye agaruka ku ngero za bamwe bagiye bavuga amagambo atanga icyizere kandi bikajyana n’ibikorwa.

Umwe muri bo ni Gasore Serge wagize ati “Ukwemera gusumba ukundi kuri twe nk’urubyiruko ni ukwemera ko u Rwanda ari urwacu natwe tukaba ab’u Rwanda, kandi tukamenya ko kugira u Rwanda rwiza ruteye imbere ari cyo twahisemo.”

Mizero Irene we yagize ati “urubyiruko turishimira ko twakuriye mu gihugu gifite amateka mashya y’umudendezo, ashingiye ku ihame ry’Ubunyarwanda, mu bumwe bw’Abanyarwanda twabonyemo umuti w’ibikomere by’amateka twanyuzemo, ndetse butubera umusingi ukomeye mu kubaka u Rwanda twifuza.”

Aba bombi bafite amateka atandukanye akomeye ariko babirenzeho bayoboka iya Ndi Umunyarwanda no kubaka igihugu.

Gasore Serge, umurinzi w’igihango, ababyeyi be bose bishwe muri Jenoside yakorewe Abatutsi, naho Mizero Irene, ababyeyi be bombi bafungiye kugira uruhare muri Jenoside Yakorewe Abatutsi.

Dr Nsanzabaganwa yavuze ko ibyo bagezeho ari icyemezo bafashe cy’ubudaheranwa bakaba intwari, bakagera kuri byinshi bagaragaje.

Ihuriro ngarukamwaka rya 13 rya Unity Club Intwararumuri, ryitabiriwe n’abayobozi bakuru mu nzego nkuru z’Igihugu, abanyamadini, sosiyete sivile,abikorera ndetse n’urubyiruko, harimo n’abaryitabiriye hifashishijwe ikoranabuhanga bari mu ntara zitandukanye ndetse n’abari muri Diaspora.

Umuryango Unity Club Intwararumuri washinzwe muri Gashyantare 1996 ugamije gutanga umusanzu mu kubaka ubumwe bw’Abanyarwanda. Wihaye intego yo ‘kwimakaza umuco w’ubumwe n’amahoro, byo nkingi z’iterambere rirambye’. Ugizwe n’abayobozi bari muri Guverinoma n’abayihozemo ndetse n’abo bashakanye.

Uharanira gushyira mu bikorwa intego wiyemeje mu rugamba rwo kubera Abanyarwanda urumuri ‘Intwararumuri’, aho hamaze kubakwa inzu mu turere twa Huye, Rulindo, Kamonyi na Kayonza, zigenewe Ababyeyi b’Intwaza bagizwe incike na Jenoside yakorewe abatutsi muri mata 1994.

Madamu Jeannette Kagame yagaragaje ko ubumwe yo nkingi ya Ndi Umunyarwanda ari bwo bwafashije igihugu kongera kubaho nyuma ya Jenoside yakorewe Abatutsi
Perezida wa Komisiyo y'Igihugu y'Ubumwe n'Ubwiyunge, Musenyeri John Rucyahana, atanga ikiganiro
Senateri Dr Havugimana Emmanuel atanga ikiganiro, yagarutse ku mateka yaranze igihugu n’uburyo amacakubiri yagiye akongezwa akaza kugeza kuri Jenoside yakorewe Abatutsi
Umunyamakuru wa RBA, Basile Uwimana, niwe wari uyoboye ikiganiro
Minisitiri w'Uburinganire n'Iterambere ry'Umuryango, Jeannette Bayisenge, ari mu batanze ikiganiro cyiswe "Ndi Umunyarwanda: Igitekerezo-ngenga cy’Ukubaho kwacu”
Patrick Kurumvune yatanze ubuhamya bw’uburyo Ndi Umunyarwanda yamufashije kuva mu ipfunwe yaterwaga no kuba se yari afungiwe ubusahuzi yakoze muri Jenoside yakorewe Abatutsi
Uwacu Julienne uyobora Ikigega gishinzwe gutera inkunga abacitse ku icumu rya Jenoside, FARG, ageza ijambo ku bari bitabiriye iri huriro
Umuyobozi Mukuru Wungirije wa Unity Club Intwararumuri, Dr Nsanzabaganwa Monique, yavuze ko Ndi Umunyarwanda ikwiye kurushaho kwimakazwa hose kuko ari igihango gikomeye
Bernard Makuza wahoze ari Perezida wa Sena ni umwe mu bitabiriye iri huriro
Minisitiri wa Siporo, Aurore Munyangaju Mimosa, nawe ni umwe mu bagize Guverinoma witabiriye iri huriro
Minisitiri w'Ubutegetsi bw'Igihugu, Prof Shyaka Anastase
Umuyobozi Mukuru wa Polisi y'u Rwanda, IGP Dan Munyuza, akurikiye ibiganiro byatangwaga
Umujyanama wa Perezida wa Repubulika mu by'umutekano, Gen James Kabarebe
Depite Muhongayire Christine akurikiye ibiganiro
Minisitiri w'Ibikorwa remezo, Claver Gatete, akurikiye ibiganiro
Mu ntara y'amajyaruguru mu karere ka Musanze ubwo bari bakurikiranye Ihuriro rya Unity Club Intwararumuri

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .