Urubyiruko rwaje imbere mu bahabwa akato kurusha abandi bazira ko banduye virusi itera Sida

Yanditswe na Uwimana Abraham
Kuya 11 Ugushyingo 2020 saa 03:11
Yasuwe :
0 0

Ubushakashatsi bw’Ikigo cy’Igihugu cy’Ubuzima, RBC, bwagaragaje ko icyiciro cy’urubyiruko ari cyo gihura n’akato n’ihezwa bikorerwa abafite virusi itera Sida, kurusha ibindi.

Ubu bushakashatsi bwakorewe ku bafite virusi itera Sida bo mu byiciro bitandukanye hirya no hino mu Rwanda, bwerekana ko mu mezi 12 ashize, urubyiruko ruri hagati y’imyaka 25 na 34 rwahuye n’akato n’ihezwa ku kigero cya 48%, ari nacyo cyiciro cyibasiwe cyane.

Nubwo muri rusange ubu bushakashatsi bwerekana ko akato n’ihezwa bikorerwa abafite virusi itera Sida byagabanutse ku kigero cya 80% ugereranyije n’ubushakashatsi bwaherukaga mu 2009, haracyagaragara ahakwiye kongerwamo imbaraga kugira ngo bicike burundu.

Uhagarariye abakoze ubu bushakashatsi bwatangajwe kuri uyu wa Kabiri, Dr Ndahimana Jean d’Amour, yavuze ko urubyiruko ari cyo cyiciro cyibasiwe n’ihezwa n’akato kurusha ibindi, hakiyongeraho ko na bo biheza ubwabo, kuko abagera kuri 98% muri bo ari ababa barayivukanye.

Yagize ati “Ihezwa n’akato muri bo riri hejuru cyane, cyane bishingiye ku byerekeranye n’ubuzima bw’urubyiruko. Ntabwo baba baragira ubuzima bwo kwigenga, rimwe aba ari ku ishuri, cyangwa se akeneye umuntu bazashakana, ugasanga ntari bubwire umuntu wese ko yanduye.”

Ku rubyiruko ngo biba bitandukanye no ku bantu bakuru, kuko ngo iyo ari umuntu mukuru ufite virusi itera Sida aba yigenga ashobora no kwikorera byose, ariko urubyiruko ruba rutaragira ubushobozi, ugasanga bitanga urwaho rwo kwiha cyangwa guhabwa akato.

Ati “Ibyo bintu byose byo kutagira ukwihaza bituma bahura n’akato gakabije, niba bamushyize mu ishuri yiga aba mu kigo usanga ari ikibazo, igihe azanywera imiti ni ryari, kuko ategetswe kuba ahantu ku isaha, ugasanga biragoye.”

Umunyamabanga Nshingwabikorwa w’Urugaga Nyarwanda rw’Abafite Virusi Itera Sida (RRP+), Sage Semafara, yavuze ko akato n’ihezwa mu rubyiruko bikunze kugaragara cyane cyane mu mashuri, aho batabona ubwisanzure bwo gufata imiti, kuko bamara igihembwe ku ishuri bikabasaba kuyijyanayo, bigatuma biha urwaho bagenzi babo rwo kubaha akato.

Haniyongeraho kandi abana bavuka ku babyeyi bafite virusi itera Sida ariko bo ntayo bavukanye, ugasanga nabo bahabwa akato bitewe n’uko ababyeyi babo bayifite, kandi bo ubwabo ari bazima.

Semafara yavuze ko kugira ngo aka kato n’ihezwa mu rubyiruko, cyane uruba ruri ku ishuri bicike, hakwiye gushyirwaho uburyo bwaborohereza gufata imiti yabo nta rwikekwe.

Ati “Icyakorwa ni uko mu bigo by’amashuri hashyirwaho icyumba cyihariye, kitari icy’abafite virusi itera Sida gusa, bagashyiraho umuntu ushinzwe iby’ubuzima muri rusange, noneho n’abo bana bafite virusi itera Sida nabo bakisanzura muri ubwo buryo, bakajya kubonana n’uwo ushinzwe ubuzima nk’abandi bose, ibyo byagabanya akato.”

“Bisaba kwigisha abaturage no kumenyesha urwo rubyiruko uburenganzira bwabo, no kubigisha kwivana muri ako kato, kuko hari igihe nabo bishyira mu kato.”

Mu bindi bikomeye bahura nabyo nk’uko byanagaragajwe n’ubu bushakashatsi harimo kuvutswa uburenganzira ku buzima bw’imyororokere, kugirwa inama zo kudakora imibonano mpuzabitsina, kudashaka no kutabyara n’ibindi.

Semafara yavuze ko ibi nabyo ari akato gakomeye, kuko abafite virusi itera Sida nabo bafite uburenganzira nk’abandi bantu, nubwo baba basabwa kwitwararika.

Yagize ati “Umuntu ufite virusi itera Sida ntabwo bivuga yuko agomba guhabwa akato mu buzima bw’imyororokere, na we afite uburenganzira bwo gukora imibonano mpuzabitsina uretse ko agomba kwirinda no kurinda abandi.”

“Niba bazi yuko umwana runaka afite virusi itera Sida bikaba ikiganiro, niba ari umukobwa abahungu bose bakamenya yuko batagomba kumukoraho, batagomba kumuvugisha, ako ni akato. Bafite uburenganzira mu kubaka ingo, bafite uburenganzira mu kubyara, bafite uburenganzira mu buzima bw’imyororokere.”

Mu byo ubu bushakashati bugaragaza ko bikwiye kongerwamo imbaraga, harimo kwigisha abafite virusi itera bakamenya uburenganzira bwabo, kuborohereza kugerwaho na serivisi zibagenewe no kwigisha abantu muri rusange guhindura imyumvire, bakirinda kubaha akato.

Umunyamabanga Nshingwabikorwa wa RRP+, Sage Semafara, yavuze ko kugira ngo akato n’ihezwa mu rubyiruko ruri ku ishuri bicike, hakwiye gushyirwaho uburyo bwaborohereza gufata imiti igabanya ubukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .