Urubyiruko rwahawe umwihariko mu kwizihiza Umunsi w’Intwari uzabimburirwa n’icyumweru cyihariye

Yanditswe na Evariste Nsengimana
Kuya 24 Mutarama 2020 saa 03:21
Yasuwe :
0 0

Urwego rushinzwe Intwari z’Igihugu, Imidari n’Impeta by’Ishimwe (CHENO) rwatangaje ko abana n’urubyiruko bahawe umwihariko mu bikorwa byo kwizihiza Umunsi w’Intwari z’u Rwanda mu rwego rwo kubatoza gukurana umuco w’Ubutwari mu byo bakora byose.

Uyu munsi usanzwe wizihizwa ku wa 1 Gashyantare buri mwaka, uwa 2020 uzabimburirwa n’icyumweru cy’Ubutwari cyatangiye ku wa 24 Mutarama 2020 gisozwe ku wa 31 uku kwezi.

Mu kiganiro n’Itangazamakuru kuri uyu wa Gatanu, Umuyobozi wa CHENO, Dr Habumuremyi Pierre Damien, yavuze ko icyo cyumweru cyihariye kizakorwamo ibiganiro binyuze mu itangazamakuru, mu baturage no mu bigo bya Leta. Hazaba kandi amarushanwa amenyerewe nk’Agaciro Tournament, azakorwa mu byiciro bitandukanye.

Nko mu mupira w’amaguru ku bagabo amakipe ane ya mbere ku rutonde rwa shampiyona iheruka ariyo Rayon Sports, APR FC, Mukura VS na Police Fc azahura mu gihe mu bagore Scandinavia na AS Kigali arizo zizahurira muri aya marushanwa. Hazaba kandi indi mikino irimo iy’amaboko nka Volleyball, Basketball, Handball, Sitting Volleyball no gusiganwa ku magare.

Ku wa 31 Mutarama 2020 hateganyijwe igitaramo gisingiza Intwari z’Igihugu muri Camp Kigali kizitabirwa n’Abanyakigali no mu nkengero zayo.

Ku wa 30 Mutarama uyu mwaka kandi hazaba ibiganiro bihuza urubyiruko aho bizatangirwamo ubutumwa

Dr Habumuremyi yavuze ko uyu munsi ugiye kwizihizwa ku nshuro ya 26 uzaba ufite insanganyamatsiko nk’uko bisanzwe igira iti “Ubutwari mu Banyarwanda, agaciro kacu.”

Iyi nsanganyamatsiko ishaka gusobanura ko buri Munyarwanda agomba kurangwa n’ubutwari mu byo akora byose mu rwego rwo kurushaho kwihesha agaciro, ikaba ishushanya urugendo rw’u Rwanda kuva rubayeho, igihe cyo kurubohora n’inzira y’iterambere.

Ati “Imbaraga turifuza ko zishyirwa mu rubyiruko kuko nirwo Rwanda rw’ejo, ubutwari bushimangiwe mu rubyiruko twaba twizeye neza u Rwanda rw’ejo hazaza.Turifuza ko ruba umusemburo w’umuco w’ubutwari.”

Ku bana ngo bazigishwa binyuze mu Nama Nkuru y’Urubyiruko n’izindi nzego zibahagarariye guhera mu nzego z’ibanze.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yagize ati “Umuntu wese wifuza ko icyiza kiri mu muryango we cyaramba akwiye kugitoza umuto wahavutse kuko ni we uba uzahamara igihe kinini.”

Umuyobozi wa Rwanda Peace Academy wari uhagarariye Minisiteri y’Ingabo, Col Jill Rutaremara, yagarutse ku gisobanuro cy’ubutwari, aho kenshi bushingira ku gikorwa umuntu aba yakoze kitamufitiye inyungu wenyine ahubwo kizungukirwamo n’abantu benshi.

Intwari z’Igihugu zigabanyijwemo ibyiciro bitatu birimo Imanzi, Imena n’Ingenzi.

Mu cyiciro cy’Imanzi harimo Umusirikare utazwi ari yo ingabo ihagarariye izindi ngabo zitangiye igihugu zikagwa ku rugamba mu bihe byashize, iby’ubu n’ibizaza ndetse na Gen. Maj Fred Gisa Rwigema.

Mu cyiciro cy’Imena harimo Umwami Mutara wa III Rudahigwa, Rwagasana Michel, Uwilingiyimana Agathe, Niyitegeka Felicité n’abanyeshuri b’i Nyange.

Kugeza ubu mu cyiciro cy’Ingenzi nta ntwari zari zashyirwamo, aho ngo hagikorwa ubushakashatsi.

Dr Habumuremyi yavuze ko urubyiruko rwahawe umwihariko mu kwizihiza Umunsi w’Intwari uzabimburirwa n’icyumweru cyihariye
Umunyamabanga wa Leta muri Minisiteri y'Urubyiruko n'Umuco, Bamporiki Edouard n'Umuyobozi wa CHENO, Dr Habumuremyi bari mu kiganiro
Umuyobozi wa Rwanda Peace Academy wari uhagarariye Minisiteri y’Ingabo, Col Jill Rutaremara, yagarutse ku gisobanuro cy’ubutwari
Abayobozi batanze ikiganiro cy'aho imyiteguro y'Umunsi w'Intwari igeze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza