00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rwa PAM Rwanda rwiyemeje kurwanya abahakana Jenoside

Yanditswe na Tuyishimire Raymond
Kuya 25 Mata 2021 saa 11:07
Yasuwe :
0 0

Urubyiruko rwo mu mashuri makuru na kaminuza rwibumbiye mu Muryango uharanira ubwigenge, agaciro n’Iterambere by’Umunyafurika, Ishami ry’u Rwanda (Pan African Movement), kuri iki Cyumweru, tariki ya 25 Mata 2021, rwasuye Ingoro Ndangamateka y’Urugamba rwo guhagarika Jenoside, iherereye mu nyubako y’Inteko Ishinga Amategeko y’u Rwanda ku Kimihurura.

Uru rubyiruko rwatemberejwe ibyumba bigera kuri 11 bikubiyemo amateka yihariye y’urwo rugamba.

Uwiringiyimana Jacqueline, wiga mu Ishami ry’Amategeko muri Kaminuza ya Kigali (UoK) akaba n’umwe mu bagize PAM Rwanda, yavuze ko nyumayo gusura Ingoro y’Amateka y’Urugamba rwo kubohora igihugu byatumye yunguka byinshi birimo no kuba yirebeye ubwitange budasanzwe bw’ingabo za RPA zabohoye u Rwanda.

Yavuze ko nyuma yo gusobanurirwa aya mateka agiye guharanira uburyo yafatanya na bagenzi be mu kurwanya abashaka guhakana no gupfobya Jenoside.

Ati “Mu by’ukuri nk’uko badusobanuriye, Jenoside yakozwe n’urubyiruko, kugeza ubu nitwe mbaraga z’igihugu zikenewe kugira ngo turwane nabo bahakana n’abapfobya Jenoside yakorewe Abatutsi. Njye na bagenzi banjye twiteguye kurwanya abahakana n’abapfobya Jenoside yakorewe Abatutsi ndetse n’abagenzi banjye turi kumwe.”

Umuyobozi uhagarariye abanyeshuri muri kaminuza ya UTB, Maniraguha Lazaro, yavuze ko na we nyuma yo gusura iyi ngoro agasobanurirwa amateka, bigiye kumufasha kurushaho gukunda igihugu.

Ati “Gukunda igihugu ni cyo cya mbere. Abenshi bahagaritse Jenoside bari mu myaka yacu, bari bato, ntabwo bikunze ahubwo bakunze igihugu muri rusange. Rero natwe kuri uyu munsi nanone hari byinshi igihugu kidukeneyeho kandi hari byinshi byadufasha kugera ku ntego zacu.”

Umwe mu bagize Komisiyo y’Urubyiruko muri PAM Rwanda, Nsabimana Jean Marie, wari uyoboye iri tsinda, yavuze ko hategurwa iki gikorwa hari hagamijwe gushishikariza urubyiruko kumenya amateka y’igihugu cyabo.

Ati “Ikigamijwe cyane ni ugukomeza kwigisha amateka yo kubohora igihugu ariko twiga cyane amateka ya Jenoside yakorewe Abatutsi kugira ngo urubyiruko rwacu, ruyige ariko rudushyira muri wa murongo wo kurwanya abapfobya n’abahakana Jenoside yakorewe Abatutsi , ariko turukangurira kujya mu murongo wo guhangana n’abagifite ingengabitekerezo yayo kugira ngo tube urubyiruko rwubaka."

Yasabye abanyamuryango ba PAM Rwanda ndetse n’urubyiruko muri rusange gusigasira ibyagezweho.

Ati “Turasaba abanyamuryango ba PAM Rwanda, gukunda igihugu, gusigasira ibyagezweho, tukarwanya uwo ari we wese ushaka kudusubiza mu mateka mabi ushaka kuzana ivangura.”

Komiseri w’urubyiruko muri Pan African Movement Rwanda, Shyaka Michael Nyarwaya, yavuze ko biyemeje gusura ingoro y’amateka y’urugamba rwo guhagarika Jenoside kugira ngo bamenye neza amateka u Rwanda rwanyuzemo, bayubakireho bubaka ejo hazaza.

Ati “Amateka azadufasha kugira ngo dusigasire ibyagezweho. Ikindi ni ukugira ngo tutabeshywa no kugira ngo twifatanye n’abanyarwanda muri iki gihe cyo kwibuka abacu bazize Jenoside yakorewe Abatutsi.”

Muri iyi minsi hakomeje kugaragara abahakana cyangwa abapfobya Jenoside yakorewe Abatutsi. Shyaka avuga ko nk’urubyiruko kumenya amateka ariyo ntwaro ikomeye yo guhashya abayagoreka.

Ati “Ni ukugira ngo twige amateka adufasha kurwanya abahakana n’abapfobya Jenoside yakorewe Abatutsi. Twubakire ku mateka n’umuco kuko urubyiruko nitutamenya amateka, igihugu cyacu gishobora kuzimira.”

Yongeyeho ati “Ntabwo twakubaka u Rwanda cyangwa Afurika tutubakiye ku mateka, ngo tumenye abatubanjirije ibyo bakoze neza natwe dukomeze kubikora neza kurushaho. Ibyo bakoze nabi nk’ababeshywe bagakora Jenoside, tubereke ko bidakwiriye twifashishije gukora ibyiza.”

Urubyiruko rugize Pan African Movement rufite gahunda yo gukomeza gusura ahari amateka y’urugamba rwo guhagarika Jenoside nka Kagitumba aho urugamba rwatangiriye, Mulindi n’ahandi.

Umuryango Pan African Movement, Ishami ry’u Rwanda watangiye ku wa 8 Kanama 2015 n’Abanyarwanda bagamije gufatanya n’abandi Banyafurika guharanira agaciro no kwigira kw’abatuye uyu mugabane.

Basobanuriwe igishushanyo cyerekana imwe mu misozi ingabo za RPA zagiye zifata zihangana n'interahamwe ndetse n'ingabo za FAR
Basonaburiwe ibihe by'ingenzi byaranze urugamba rwo kubohora u Rwanda
Aba banyeshuri bo mu mashuri makuru na kaminuza bibumbiye muri PAM Rwanda bishimiye ko basobanuriwe amateka azabafasha kurwanya abashaka gupfobya Jenoside yakorewe Abatutsi
Uwiringiyimana Jacqueline yavuze ko yishimiye kumenya ubwitange bw'ababohoye Igihugu ndetse yemeza ko bigiye kumufasha kurushaho guhangana n'abahakana Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .