00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rw’i Nyagatare rwibukijwe kudahishira abasambanya abana n’ababashora mu biyobyabwenge

Yanditswe na Akayezu Jean de Dieu
Kuya 9 May 2022 saa 10:06
Yasuwe :

Ubuyobozi bw’Urwego rw’Igihugu rw’Ubugenzacyaha, RIB, bwasabye abanyeshuri n’urubyiruko rwo mu Karere ka Nyagatare kwirinda guhishira abasambanya abana no kwitandukanya n’ababyeyi cyangwa abayobozi bashobora kunga abakoze ibyo byaha n’abo babikoreye.

Byagarutsweho mu bukangurambaga bugamije gusobanurira urubyiruko ibyaha, imiterere yabyo, ingaruka zabyo n’uburyo rushobora kubyirinda. Bwateguwe na RIB, Minisiteri y’Uburezi, Inzego z’Ibanze n’izindi nzego.

Ku wa 6 Gicurasi 2022, ubu bukangurambaga bwabereye mu Ishuri ry’Imyuga n’Ubumenyingiro rya Cleveland Technical School Matimba mu Karere ka Nyagatare.

Ubuyobozi bw’Ishami rishinzwe gukumira ibyaha muri RIB bugaragaza ko imibare yerekana ko ibyaha byibasiye urubyiruko by’umwihariko mu Karere ka Nyagatare harimo icyaha cyo gusambanya abana, ibiyobyabwenge n’ibindi.

Akarere ka Nyagatare ni ko gakunze kuza imbere mu mibare y’abana basambanywa aho mu mu 2019, hamenyekanye abana 1600 babyaye, mu 2020 hamenyekana 1500, mu gihe mu 2021 mbere y’uko urangira barengaga 1400.
Umuvugizi w’Urwego rw’Ubugenzacyaha, RIB, Dr Murangira B. Thierry, avuga ko mu butumwa bahaye abanyeshuri n’abayobozi muri Nyagatare harimo gushishikariza urubyiruko kwirinda kwishora mu bikorwa byatuma bakora ibyaha.

Avuga ko abanyeshuri banasabwe kwirinda guhishira abashobora gusambanya abana ariko hari n’ubundi butumwa bwahawe ababyeyi n’abayobozi bwo kwirinda kunga abasambanyijwe n’abo basambanyije.

Ati “Icyo tuba dukeneye ni ukugira ngo babyirinde niba hari ibyakozwe babimenyekanishe mu buyobozi kugira ngo abahanwa bahanwe.”

Yakomeje agira ati “Noneho abanyeshuri bo, hari abo usanga biriya byaha babyishoramo, hari ababikorerwa cyangwa bakanabikora, ariko icyo dusaba bariya bana ni ukwirinda ingeso mbi zose zishobora kubakururira ibyago byo kuba basambanywa cyangwa bagahura n’ababaha ibiyobyabwenge.”

Ubuyobozi bw’Akarere ka Nyagatare bugaragaza ko mu bibazo bihangayikishije harimo ikibazo cyo gusambanya abana kandi kibangamiye imibereho myiza y’abaturage nyamara gishobora gucika burundu abagize umuryango babigizemo uruhare runini.

Umuyobozi Wungirije w’Akarere ka Nyagatare ushinzwe Imibereho Myiza y’Abaturage, Murekatete Juliet, yagize ati “Akarere kibasiwe n’icyaha cyo gusambanya abana, icuruzwa ry’abantu kuko baturiye umupaka, n’ikiyobyabwenge cyitwa Rwiziringa.”

Murekatete yashimye ubu bukangurambaga bwatangijwe na RIB n’inzego bafatanyije kuko bugiye gufasha mu gukumira ibi byaha n’ibindi.

Umuyobozi w’Ishuri rya Cleveland Technical School Matimba, Nkurikiye Jonas, yashimangiye ko ubu bukangurambaga bufashije urubyiruko kandi bigaragara ko rwugarijwe n’ibyaha no gutura ku mupaka bitiza umurindi bimwe muri ibi byaha.

Kuki ari ngombwa kwigisha abakiri bato kwirinda ibyaha?

Ni byo koko igiti kigororwa kikiri gito kandi mu bakora ibyaha harimo n’ababa bakiri bato cyangwa abato bakoreshwa n’abakuru bakaba bashorwa mu byaha cyangwa bakabikorerwa.

Nk’aha ku ishuri rya Kwitonda Ndahiro Jimmy uhagarariye abanyeshuri yasabye bagenzi be gushishoza kuko iyo urangaye mu gukoresha imbuga nkoranyambaga wisanga mu byago bikomeye.

Yavuze ko nk’abantu baturiye umupaka bakaba bahura n’ibyaha byinshi bikubiyemo n’ibishuko byinshi byangiza amahirwe yabo.

Aha niho, Umuvugizi wa RIB, Dr Murangira B. Thierry, ahera avuga ko umwana nk’uyu bisaba kumwegera hakiri kare, akaganirizwa agasobanurirwa ibigize icyaha, ibyaha bitandukanye ashobora kwisanga yakoze n’uko yabyirinda.

Ati “Buriya igiti kigororwa kikiri gito, bariya bana, hari abakorerwa ibyaha n’ababikora. Kubigisha kare bakabyirinda ni byiza, no kwigisha amayeri bariya bagizi ba nabi bakoresha ni iby’ingenzi.”

Yakomeje agira ati “Kuko iyo wa muntu atangiye kumubeshya akoresheje ya mayeri, undi amutahura kare. Nk’urugero ejo bundi i Nyagatare hari uwavuze ko iyo tutahagera [muri ubwo bukangurambaga] yari agiye kugenda, kandi nta muntu yari yabwiye yari yabigize ibanga rye.”

RIB itangaza ko ifite intego y’uko ubu bukangurambaga buzagera mu bigo by’amashuri byose byo mu Rwanda.

Umuyobozi Wungirije w’Akarere ka Nyagatare ushinzwe Imibereho Myiza y’Abaturage, Murekatete Juliet, yashimiye RIB yateguye ubu bukangurambaga kuko bufasha abana gusobanukirwa ibyaha no kubyirinda
RIB ikomeje kuzenguruka hirya no hino mu bigo by'amashuri yisumbuye isobanurira abanyeshuri imiterere y'ibyaha n'uburyo bashobora kubyirinda
Abanyeshuri bahawe umwanya batanga ibitekerezo byabo nyuma yo gusobanurirwa ibyaha n'uburyo bwo kubyirinda
Abakiri bato bagaragaje ko hari ibyaha bajyaga babona bikorerwa iwabo ariko bakaba batari babisobanukiwe
Umukozi mu Ishami rishinzwe gukumira Ibyaha muri RIB, Ntirenganya Jean Claude, yasabye abanyeshuri kwima amatwi abashobora kubashora mu byaha birimo kubasambanya no kubanywesha ibiyobyabwenge
Abanyeshuri bagaragaje inyota yo gusobanurirwa ibyaha bibugarije n'uburyo bashobora kubyirinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .