00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rw’Abanyarwanda baba mu mahanga rweretswe amahirwe y’akazi n’ishoramari mu Rwanda (Amafoto)

Yanditswe na Akayezu Jean de Dieu
Kuya 19 July 2022 saa 07:23
Yasuwe :

Urwego rw’Iterambere, RDB, rwagiranye ibiganiro n’urubyiruko rw’Abanyarwanda baba mu mahanga, rubereka amahirwe y’ishoramari, akazi ndetse ko n’abakiri mu mashuri bashobora kwimenyereza akazi mu Rwanda.

Ni urubyiruko rwibumbiye mu Ihuriro rya Rwanda Youth Club, rwaturutse mu bihugu 13 byiganjemo ibyo ku mugabane w’u Burayi na Amerika rugera muri 70.

Bari mu gihugu muri gahunda yo kwirebera aho kigeze mu iterambere ariko bakanabasha kwigira ku mateka yacyo no kumenya ibyo kibifuzaho haba uyu munsi no mu gihe kizaza baba bari mu Rwanda cyangwa mu bihugu bindi babarizwamo.

Ibiganiro bagiranye na RDB byari byitabiriwe n’ibigo bya leta n’iby’abikorera nka Irembo, Banki ya Kigali, MTN Rwanda n’ibindi.

Umuyobozi Ushinzwe Ibikorwa by’Abanyarwanda baba mu Mahanga muri Minisiteri y’Ububanyi n’Amahanga n’Ubutwererane, Maziyateke Sandrine, yavuze ko iyi gahunda igamije kugira ngo uru rubyiruko rumenye igihugu cyarwo.

Ati “Biboneye aho igihugu cyabo kigeze, ubutumwa twabaha ni ugukomeza guhorana ishyaka ryo kuza mu gihugu cyabo, babwire n’abandi baze. Babonye ibyo igihugu kirimo gukora, icyo kibifuzaho ndetse n’umusanzu bo bumva bashobora gutanga mu guteza imbere u Rwanda n’Abanyarwanda.”

Kabandana Jasmine uri mu batangije ‘Rwanda Youth Club’ yavuze ko impamvu batekereje kujya bihuriza hamwe bakaza gusura igihugu cyabo ari uko hari ababa batazi byinshi ku gihugu bakomokamo ariko kandi hari n’amahirwe atandukanye ari mu Rwanda baba bakeneye kumenya.

Ati “Twabonye ko abenshi mu bakiri bato badafite ikintu bazi ku Rwanda kandi bakeneye kwiga ibijyanye n’igihugu cyabo, niyo mpamvu twatekereje gushinga ‘Rwanda Youth Club’, icyo gihe rero twateguye kuza gusura igihugu cyacu, ubwa mbere twaje mu 2021, twaje turi bake ariko ubu bariyongereye.”

Kabandana yavuze ko icyo gihe baza mu 2021, batatu muri bo babonye ibigo bakoramo imyenyerezamwuga mu Rwanda mu gihe hari undi wabonye akazi.

Ati “Abo kuri ubu baba mu Rwanda kandi bameze neza, ayo ni amahirwe navuga ko babonye. Uyu ni umwanya mwiza udufasha kumenya icyo igihugu gifite, icyo kitwifuzaho ndetse n’uko twagira uruhare mu mpinduka zikenewe mu gihugu cyacu.”

Beretswe amahirwe y’ishoramari n’akazi mu Rwanda

Kuri uyu wa 18 Nyakanga 2022, uru rubyiruko rwahawe ibiganiro n’abayobozi mu mashami arimo ishoramari, kwandika ibikorwa by’ubucuruzi n’ishoramari ndetse n’ibijyanye n’ingamba muri RDB.

Umuyobozi w’Ishami rishinzwe Ingamba muri RDB, Kanyonga Louise, yavuze ko u Rwanda rufite amahirwe menshi yaba ay’ishoramari cyangwa akazi kandi uru rubyiruko rushobora kuyabyaza umusaruro.

Ati “Mufite impano n’ubumenyi butandukanye, murimo abashoramari b’ejo hazaza kandi igihugu cyahaye rugari abashaka gushora imari, muri mwe harimo abahanga mu mategeko, ikoranabuhanga, kandi ibyo bintu igihugu kirabikeneye cyane.”

Yakomeje agira ati “Urebye nk’imishinga y’iterambere dufite nka Kigali Innovation City, Kigali International Finance Centre […] ibyo byose dukeneyemo ubumenyi n’impano zanyu, icyari gisigaye ni ukugira ngo muze mu Rwanda mumenye ko ayo mahirwe ahari n’uko mushobora kuyageraho.”

Umukozi mu ishami rishinzwe ishoramari muri RDB, Nakanyange Divine yavuze ko mu Rwanda hari amahirwe menshi y’ishoramari.

Yagarutse ku kuba Raporo ya Banki y’Isi yaragaragaje u Rwanda nk’igihugu cyorohereza ishoramari ndetse gifite ubukungu bukura vuba muri Afurika.

Nakanyange yahaye ikaze uru rubyiruko arwizeza ko uretse kuba amarembo afunguye ariko hari n’ubundi bufasha bazahabwa mu gihe bazaba bashoye imari mu Rwanda.

Ati "Ikindi ariko dufite n’abakozi, muzi ko 70% ari urubyiruko kandi Guverinoma y’u Rwanda yashyize imbaraga mu kubaha uburezi ku buryo uramutse ushoye imari mu gihugu uzabona abakozi bafite ubumenyi n’ubushobozi."

Yakomeje agira ati "Dufite rero amahirwe y’ishoramari mu buhinzi n’ubworozi, inganda, ubuzima, uburezi ndetse n’ikoranabuhanga by’umwihariko kuko muzi ko igihugu kiri kwihuta mu kubaka ibikorwaremezo bifasha mu kugira ngo ikoranabuhanga ribashe kubyazwa umusaruro."

Nakanyange yibukije ko ushoye imari mu Rwanda aba ashobora kugera ku isoko rigari ry’Umuryango wa Afurika y’Iburasirazuba, Commonwealth, Francophonie n’indi miryango igihugu kibarizwamo.

Muri ibi biganiro hanabaye kandi ibiganiro byatanzwe n’abayobozi mu nzego zitandukanye aho bagarutse ku mahirwe atandukanye igihugu gitanga haba ku rubyiruko, abagore abafite ubumuga n’abandi Banyarwanda baba abo mu Rwanda n’abavukiye mu mahanga.

Kanyonga yavuze ko u Rwanda ruha amahirwe menshi Abanyarwanda by’umwihariko ibyiciro byihariye birimo n’icy’abagore ari nacyo abarizwamo.

Rwanda Youth Club yatangiriye mu Bubiligi ari naho abayigize benshi babarizwa ariko hari n’abo mu bindi bihugu nk’u Bwongereza, Suède, Canada, Amerika n’ahandi. Bose baza mu Rwanda bakamara ibyumweru bibiri mu bikorwa bitandukanye.

Umuyobozi muri RDB, Kanyonga Louise, yasabye urubyiruko ruba mu mahanga gusura u Rwanda rukabona amahirwe y'ishoramari n'akazi ahari
RDB yagaragaje amahirwe y'ishoramari ari mu Rwanda
Hatanzwe ikiganiro cyagarutse ku mahirwe atangwa n'igihugu
Francis Ngoboka uyobora Ishami rishinzwe ibijyanye n'isoko ry'umurimo muri RDB nawe yatanze ikiganiro
Captain Christian Kamanzi yavuze ko hari amahirwe igihugu gitanga urubyiruko ruba mu mahanga rwabyaza umusaruro
Buri wese yahawe umwanya ngo agire igitekerezo atanga
Bahawe umwanya wo gutanga ibitekerezo
Babajije icyo bisaba kugira ngo umuntu yandikishe ibikorwa by'ubucuruzi cyangwa ishoramari
Abahaye ikiganiro urubyiruko bagarutse ku mahirwe buri wese ufite ubumenyi cyangwa impano afite mu Rwanda
Abagera kuri 70 nibo baje gusura u Rwanda muri gahunda ya Rwanda Youth Tour Event
Kabandana Jasmine uri mu batangije ‘Rwanda Youth Club’
MTN Rwanda yari ihagarariwe muri ibi biganiro
Urubuga rusabirwaho serivisi zitandukanye, IremboGov rwari ruhagarariwe

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .