Urubyiruko 70 rwasoje amasomo mu ruganda rutunganya imyanda y’ikoranabuhanga

Yanditswe na Habimana James
Kuya 12 Ukwakira 2019 saa 02:35
Yasuwe :
0 0

Urubyiruko rugera kuri 70, rwasoje amahugurwa rwahawe n’uruganda rutunganya imyanda y’ikoranabuhanga ruherereye mu Karere ka Bugesera, ruhabwa amasomo arimo ajyanye no kurengera ibidukikije no kwihangira imirimo.

Kuri uyu wa Gatanu tariki 11 Ukwakira 2019, nibwo aba basore n’inkumi basoje aya mahugurwa bari bamazemo amezi ane.

Amasomo bahawe ajyanye no kugira ubumenyi buganisha ku cyerekezo cy’u Rwanda cyo kurengera ibidukikije no gutanga umusanzu bihangira akazi.

Umuhango wo gusoza aya masomo wabereye ku cyicaro cy’uruganda giherereye mu karere ka Bugesera mu Ntara y’Iburasirazuba.

Abahuguwe bahawe ubumenyi mu gusana ibikoresho no gutunganya imyanda y’ibikoresho by’ikoranabuhanga.

Bahuguwe kandi ku guhangana n’ubwiyongere bw’imyanda y’ikoranabuhanga, kumenya kureba ibikoresho bishobora gukorwa bikongera kwifashishwa n’ibishobora gushwanyaguzwa.

Abanyeshuri barushije abandi bazahembwa kuba abahagarariye uruganda, bakazajya bafasha mu gukusanya ibikoresha no kujya mu mashami yo kubisana ari hirya no hino mu gihugu.

Umuyobozi wa Enviroserve Rwanda Green Park, Mbera Olivier yavuze ko aya masomo ari ingirakamaro mu kugira igihugu kibungabunga ibidukikije.

Mbera yagize ati “Aya mahugurwa yabaye ingirakamaro ku bayahawe kuko bakoranye n’impuguke zo mu ruganda ndetse n’abavuye mu mahanga, ku bw’ubufasha bw’abafatanyabikorwa bacu barimo GIZ muri gahunda ya Eco-Emploi Programme na WDA mu mushinga wayo (SDF). Uru rubyiruko 60 ubu ruri mu mwanya mwiza wo kwinjira ku isoko ry’umurimo mu bijyanye no gutunganya imyanda.”

Yavuze ko ubu uru rubyiruko rufite ubumenyi buhagije ku isoko ry’umurimo, rukaba rwaratojwe kuba aba mbere mu kubungabunga ibidukikije.

Aba banyeshuri kandi bazafashwa kubona ibikoresho byo kwifashisha biciye mu bufatanye bw’uruganda na GIZ mu mushinga wayo.

Uru ruganda rutunganya imyanda y’ibikoresho by’ikoranabuhanga rwa Enviroserve, rwakira mudasobwa, firigo, scanner, batiri, imashini zimesa, iziteka, televiziyo, ibyuma bishyushya n’ibitanga umuyaga, printer, telefoni n’ibindi.

Ishyirwaho ry’uru ruganda ryagaragaje ubushake bw’u Rwanda mu guteza imbere ubukungu butangiza ibidukikije.

WDA mu mushinga wayo SDF ni uwa guverinoma y’u Rwanda, ukaba warabonye ubufasha bwa Banki y’Isi kugira ngo ushyire mu bikorwa gahunda zawo zo guteza imbere ubumenyi.

SDF icyiciro cya kabiri ushyirwa mu bikorwa na WDA biciye muri gahunda y’Igihugu igamije kwihutisha ihangwa ry’imirimo idashingiye ku buhinzi, (NEP). Iyi gahunda ikaba yaragutse mu gutanga amahirwe yo guhugurwa ku kubona ubumenyi bujyanye n’isoko ry’umurimo, hibandwa cyane kuri gahunda z’ubukungu zatoranyijwe nk’ingufu, gutwara abantu n’ibintu, ibikorerwa mu Rwanda n’ibindi.

Uyu mushinga kandi utanga inkunga ku mishinga myiza igaragaza ibikorwa birimo guhanga umurimo.

Naho GIZ Rwanda mu mushinga wayo Eco-Emploi Programme, uhuriweho n’u Rwanda ndetse n’u Budage, ukaba uyobowe na Minisiteri ishinzwe ubucuruzi, iterambere n’ubufatanye mu Budage.

Ubwo abayobozi barebaga uko abanyeshuri bashyira mu ngiro ubumenyi bahawe
Abahuguwe bahawe ubumenyi mu gusana ibikoresho no gutunganya imyanda y’ibikoresho by’ikoranabuhanga
Abanyeshuri barushije abandi bazahembwa kuba abahagarariye uruganda
Urubyiruko 70 rwari rumaze amezi ane ruhugurwa ku gucunga imyanda y'ikoranabuhanga
Abayobozi batandukanye bitabiriye ibi birori byo gutanga impamyabushobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza