Urubanza rwa Caleb Rwamuganza wari Umunyamabanga Uhoraho muri Minecofin rwongeye gusubikwa

Yanditswe na IGIHE
Kuya 11 Kamena 2020 saa 10:44
Yasuwe :
0 0

Urukiko rw’Ibanze rwa Kacyiru rwasubitse iburanisha ku ifungwa n’ifungurwa ry’agateganyo ry’urubanza ruregwamo Rwamuganza Caleb wahoze ari Umunyamabanga Uhoraho muri Minisiteri y’Imari n’Igenamigambi, Minecofin, nyuma y’uko abunganizi be bavuze ko batigeze babonana n’umukiliya wabo ngo bategure urubanza.

Rwamuganza areganwa hamwe n’abandi bantu bane bakekwaho ibyaha bitatu birimo gukoresha nabi umutungo wa Leta ufitiye rubanda akamaro, gutanga isoko rya Leta binyuranyije n’amategeko no kugira akagambane n’upiganira isoko rya Leta.

Uyu mugabo uburana ifungwa n’ifungurwa ry’agateganyo, mu iburanisha riherutse yageze mu rukiko yitegura kuburana ariko bamwe mu bunganizi b’abaregwa biza kugaragara ko batabonetse, ryimurirwa kuri uyu wa Kane.

Yitabye urukiko ari kumwe n’abunganizi be, ariko babwira inteko iburanisha ko batigeze babona umwanya wo kuganira n’abakiliya babo ngo bategure urubanza, kuko inshuro zose bagiye kumusura muri gereza aho afungiye, batigeze bamubona.

Umucamanza yavuze ko umuburanyi afite uburenganzira bwo kubonana n’umwunganizi we kugira ngo bige dosiye y’urubanza, afata umwanzuro wo gusubika iburanisha rya none kugira ngo babone uko bitegura, hanyuma bazagaruke mu rukiko ku wa 18 Kamena.

Rwamuganza yabaye Umunyamabanga Uhoraho muri Minisiteri y’Imari n’Igenamigambi guhera muri Gashyantare 2016 nyuma y’igihe ari Umuyobozi Mukuru muri iyi Minisiteri ushinzwe Ibijyanye n’Ingengo y’Imari.

Rwamuganza akekwaho ibyaha bitatu birimo gukoresha nabi umutungo wa Leta ufitiye rubanda akamaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .