Urubanza rwa Nibamureke uyobora ‘Unity Gospel Music Company’ rwimuwe

Yanditswe na Akayezu Jean de Dieu
Kuya 21 Nzeri 2019 saa 09:30
Yasuwe :
0 0

Urukiko rw’Ibanze rwa Nyarugenge rwimuye iburanisha ry’Umuyobozi wa Unity Gospel Music Company, Nibamureke Valens uvugwaho kwita Murwanashyaka Faustin ko ari ‘Umuhutu w’igitera’ no kumubwira ko azamugirira nabi.

Nibamureke ni umuyobozi w’ishyirahamwe ricuruza umuziki w’abahanzi baririmba indirimbo zo guhimbaza Imana, yatawe muri yombi tariki 9 Nzeri 2019. Byari biteganyijwe ko kuri uyu wa Gatanu azaburana ku ifungwa n’ifungurwa ry’agateganyo.

Umucamanza mu Rukiko rw’ibanze rwa Nyarugenge wagombaga kuburanisha iki kirego yacyimuriye ku wa 25 Nzeri 2019, nyuma y’uko ubushinjacyaha butigeze buzana Nibamureke ngo aburanishwe.

Ku wa 20 Kanama 2019, Murwanashyaka yandikiye Urwego rw’Igihugu rw’Ubugenzacyaha, RIB yishinganisha avuga ko Nibamureke amukangisha ko azamugirira nabi, kuvogera aho atuye ndetse ko ngo yanamutwaye aramufungirana mu buryo bunyuranyije n’amategeko.

Mu kiganiro aherutse kugirana na IGIHE, Murwanashyaka yavuze ko we na Valens bari inshuti zikomeye mbere yuko habaho kutumvikana ngo kwatewe no kudahuza mu mugambi wo gusenya United Street Promoters [Ishyirahamwe rishinzwe gucuruza umuziki w’indirimbo na filimi zitari zisanzwe].

Yagize ati “Cyera twari inshuti zikomeye, yari afite kompanyi ifite aho ihuriye na United Street Promoters njye nkaba umunyamuryango wayo. Yansabye ko twagambanira iyi kompanyi tukayisenya ndabyanga. Ubundi ni aho urwango rwatangiriye”.

Mu ibaruwa yandikiye RIB ayiregera Valens, Murwanashyaka yatangaje ko tariki 8 Gicurasi 2019 ari bwo batangiye kugirana ibibazo bikomeye, ubwo ngo bari mu bantu benshi Valens ngo yamubwiye amagambo y’irondamoko aramubwira ngo ni Umuhutu w’igitera.

Bukeye bwaho tariki 8 Gicurasi 2019 Valens yandikiye ubutumwa bugufi ’SMS’ Faustin amusaba imbabazi kuko ari ibintu yari yavugiye mu ruhame agize ubwoba ko yaregwa bikamugwa nabi.

Yagize ati’’ Kuvuga ko ndi umuhutu w’Igitera yabimbwiye tariki 8 Gicurasi 2019, nyuma anyandikira SMS bitewe nuko yabivugiye mu ruhame akaba yarasangaga nzamurega.’’

Faustin ashinja kandi Valens ko yamuteye iwe mu gicuku, muri iyi baruwa agira ati ‘’Tariki 13 Kanama 2019 ku isaha ya saa munani z’ijoro arikumwe n’undi witwa Nsanzumuhire Andre, yanteye iwanjye arakomanga cyane, mbanza kumwihorera akomeje ndakingura, yambwiye ko igihe kigeze cyo gupfa ko nzapfa nk’imbwa ya Kadafi.’’

Ku wa 14 Kanama 2019, Murwanashyaka avuga ko yahamagawe na Nibamureke akoresheje telefone y’umukozi we amubwira ko ashaka kumwereka ibijyanye n’akazi, ageze aho bari bumvikanye ngo yaguye mu bantu bane bahita bamufata bamwambika amapingu bamujyanana na moto ye bamufungira ahantu hafi igice cy’umunsi.

Baje kumurekura bamubwira ko uwamutanzeho amakuru yamwibeshyeho.

Usibye ibi byaha Murwanashyaka ashinga Nibamureke, yanandikiye RIB urundi rwandiko rwo kwishinganisha.

Inkuru bifitanye isano: Nibamureke Valens uyobora ‘Unity Gospel Music Company’ arafunzwe

Urukiko rw'ibanze ruri i Nyamirambo rwimuye urubanza rwa Nibamureke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza