00:00:00 IGIHE NETWORK KN KINYARWANDA EN ENGLISH FR FRANCAIS

Uri nde? - Perezida Kagame yeruriye abashaka gutegeka u Rwanda uko rubaho (Amafoto na Video)

Yanditswe na IGIHE
Kuya 15 Mutarama 2023 saa 04:44
Yasuwe :

Perezida Paul Kagame yavuze ko abatuye Isi bakwiriye kuba babana mu mahoro ntawe ubangamira undi, kuko kwigira igitangaza imbere y’abandi ntacyo bimaze.

Yabitangaje kuri iki Cyumweru, tariki ya 15 Mutarama 2023, ubwo yagezaga ijambo ku bitabiriye amasengesho yo gusengera igihugu azwi nka ‘National Prayer Breakfast’ ategurwa n’Umuryango Rwanda Leaders Fellowship.

Muri aya masengesho yabereye muri Kigali Convention Centre, Perezida Kagame yavuze ko abantu badakwiriye kwigira ibitangaza ngo bashake kubikangisha abandi, kuko umwanya buri wese afite ku isi ari muto.

Yatanze urugero rw’uburyo isanzure irimo imibumbe myinshi, ku buryo iyo urebye umubumbe w’Isi ari na wo abantu batuyeho, usanga ari akantu gato cyane.

Ati “Iyi Si turimo ni nk’ururo [mu isanzure], karaho kamanitse ahantu. Hari ibindi bintu byinshi na byo bimanitse gutyo birimo ukwezi, izuba, imibumbe […] turi aho hagati, tumanitse ahantu. Hanyuma wibaze uti njye wicaye aha muri iki cyumba, umuntu akubona ate? Isi yose yabaye nto, u Rwanda rwabaye ruto, hanyuma se wowe? Ibyo ni byo byaguha kumva birenze ngo ariko ubundi turi iki? Ibyo ubwabyo ntibyatuma witonda ugacisha make?”.

Kumenya ko umuntu ntacyo ari cyo, Perezida Kagame yavuze ko bikwiriye gutuma umuntu yitonda ntiyiremereze, akabana n’abandi amahoro.

Ati “Dushatse twabana, twagirirana neza haba mu gihugu, haba muri Afurika no ku Isi muri rusange. Abantu baracyanashakisha niba ari twe twenyine tubaho cyangwa nta bandi bantu baba ahandi, baracyashakisha ntawe urabibona.”

Perezida Kagame yavuze ko hari n’ibihugu byibeshya, bigashaka kwitwara nk’aho ari ibitabashwa bigashaka gukandamiza ibindi, byirengagije ko nabyo biri kuri ya Si igaragara nk’ururo mu isanzure.

Ati “Ujya ubona ngo ibihugu by’ibitangaza bifite amazina babyita ndetse n’ababikuriye, yagera ahantu abantu bose bakikubita hasi ngo hoye kugira ubabona atabateza umutekano muke. Abo na bo turi kumwe muri ka kantu gato, kangana ubusa.”

Yakomeje agira ati “Ni yo mpamvu njyewe ntawe unsanga ahanjye ngo avuge ngo ndakuruta bityo ugomba gukora ibyo ngutegetse. Ndamubaza ngo uri nde? Abanyarwanda twebwe twimenyere ibyacu, tugerageze dutere imbere twikorere wa mugogoro.”

Perezida Kagame yavuze ko mu myaka ijana iri imbere, abenshi mu batuye Isi uyu munsi bazaba batakiriho, ariko ibyo bikwiriye gutera umuhate abariho wo gukora kugira ngo bazibukirwe ku byiza.

Ati “Igihe wari uriho wabayeho ute, wakoze iki, wagejeje iki ku bandi cyangwa bakugejejeho iki?”.

Pasiteri Yves Castanou wigishije ijambo ry’Imana muri aya masengesho, yasabye Abanyarwanda gukomeza gukunda igihugu, bikorera umutwaro wacyo kugira ngo babashe kugiteza imbere.

Yavuze ko byose bijyana no kwiyoroshya cyane cyane ku bayobozi, kugira ngo Imana ibafashe kuzuza inshingano bashinzwe.

Ati “Akenshi iyo abantu bashyizwe hajuru bazamuwe mu ntera, hari ubwo bahita bishyira hejuru ariko ukeneye gutegeka umutima wawe guca bugufi. Nehemiya ni urugero rwiza, yakoze ibintu byiza afite umutima wo guca bugufi […] Imbere y’Imana turi ubusa, ntacyo waba cyo udaca bugufi.”

Amasengesho yo gusengera igihugu ni ngarukamwaka. Umuryango Rwanda Leaders Fellowship umaze imyaka 28 uyategura, hagamijwe gushima Imana ibyo imaze gukorera u Rwanda no kuyisaba ngo irufashe gukomeza kujya imbere.

Perezida Paul Kagame ubwo yageraga muri Kigali Convention Centre ahabereye amasengesho yo Gusabira Igihugu
Visi Guverineri wa Banki Nkuru y'Igihugu, BNR, Soraya Hakuziyaremye n'umugabo we Murangwa Eugène, bitabiriye aya masengesho
Umushumba Mukuru w'Itorero Zion Temple Celebration Center ku Isi, Apôtre Dr Paul Gitwaza asuhuza umwe mu bitabiriye amasengesho yo Gusabira Igihugu
Pasiteri Yves Castanou ubwo yari ageze muri KCC
Mukarwema Yvette ni we wari Umusangiza w’Amagambo muri aya masengesho
Mukanyarwaya Donatha uhagarariye Abikorera mu Ntara y'Amajyaruguru yatanze ubuhamya agaruka ku byo Abanyarwanda bakwiye gushimira Imana
Pasiteri Yves Castanou ukomoka mu Bufaransa yavuze ko iyo usubije amaso inyuma ukareba u Rwanda mu myaka 28 n’aho ruri usanga ibyabaye bifitwemo uruhare n’Imana ndetse ukuboko kwayo kukaba kuri Perezida Paul Kagame n’abandi bayobozi bakuru b’Igihugu
Perezida Kagame yavuze ko nta bakwiye kwereka u Rwanda uko rubaho
Perezida Paul Kagame yavuze ko gusenga ari byiza kuko byigisha abantu kumenya abo ari bo no kwicisha bugufi
Perezida Kagame yavuze ko urebye imiterere y’Isi n’isanzure n’uko bikora ari gihamya ko hari ububasha bubiri inyuma bw’Imana
Abitabiriye aya masengesho bari bizihiwe. Umugore wa Rev Dr Rutayisire, Pasiteri Kayitesi Peninah Rutayisire yari yizihiwe cyane
Minisitiri w’Ubutegetsi bw’Igihugu, Musabyimana Jean Claude
Perezida Kagame yitabiriye aya masengesho ari kumwe n'abandi bayobozi mu nzego zitandukanye
Umushumba Mukuru wa ADEPR, Pasiteri Ndayizeye Isaïe ari kumwe na Dr Usta Kaitesi uyobora Urwego rw'Igihugu rw'Imiyoborere, RGB, bitabiriye aya masengesho
Itsinda ry'abaririmbyi bafashije abitabiriye gushima Imana
Umuyobozi Mukuru w’Umuryango Mastercard Foundation mu Rwanda, Rica Rwigamba, yifatanyije n’abandi bayobozi muri aya masengesho
Guverineri wa Banki Nkuru y'u Rwanda, John Rwangombwa ari mu bitabiriye
Bagize ibihe byiza byo kuramya no guhimbaza Imana
Aya masengesho ngarukamwaka ahuza abanyamadini batandukanye, abayobozi mu nzego nkuru za Leta n'abahagarariye ibihugu byabo mu Rwanda
Apôtre Munezero Alice Mignone uyobora Umuryango Women Foundation na Noble Family Church na we ari mu banyamadini bitabiriye aya masengesho
Ambasaderi wa Israel mu Rwanda, Dr Ron Adam
Rwiyemezamirimo Sina Gerard aganira n'abitabiriye amasengesho yo gusabira igihugu
Umunyamabanga wa Leta muri Minisiteri y'Ibikorwaremezo ushinzwe Ibikorwaremezo, Eng. Patricie Uwase
Umujyanama wa Perezida Kagame mu bijyanye n’Umutekano, Gen James Kabarebe n'Umunyamabanga wa Leta muri Minisiteri y'Ubutabera ushinzwe Itegeko Nshinga n'andi mategeko, Nyirahabimana Soline, bitabiriye amasengesho yo Gusabira Igihugu
Apôtre Ndagijimana Joshua Masasu uyobora Evangelical Restoration Church n’Umugore we Pasiteri Lydia Masasu
Umunyamabanga wa Leta muri Minagri, Dr Ildephonse Musafiri (iburyo) ni umwe mu bitabiriye
Minisitiri w'Ibikorwa by'Ubutabazi, Kayisire Solange yari yitabiriye aya masengesho
Tariro Wash (hagati), umukobwa wa Perezida wa Zimbabwe Emmerson Dambudzo Mnangagwa, yitabiriye aya masengesho
Perezida wa Sena, Dr Kalinda François Xavier, yitabiriye amasengesho yo gusengera igihugu
Minisitiri w'Intebe, Dr Ngirente Edouard yari yitabiriye aya masengesho
Bernard Makuza wabaye Minisitiri w'Intebe na Perezida wa Sena
Donatha Mukanyarwaya yitabiriye aya masengesho
Umuyobozi Mukuru wa Mizero Care Organisation akaba n'Umurinzi w'Igihango, Mizero Irene, na we yitabiriye aya masengesho
Minisitiri w'Uburezi, Dr Uwamariya Valentine, yitabiriye aya masengesho yo gusabira igihugu
Nyuma y'amasengesho, Perezida Kagame n'abayobozi bakuru bayitabiriye bafashe ifoto y'urwibutso

Kanda hano urebe andi mafoto menshi

Amafoto: Igirubuntu Darcy

Video: Mucyo Jean Regis


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .