Uregwa ubufatanyacyaha mu rubanza rwa Nkubiri yasabye ko dosiye zabo zitandukanywa

Yanditswe na Iradukunda Serge
Kuya 30 Ukuboza 2020 saa 12:12
Yasuwe :
0 0

Nyiramahoro Théopiste uregwa ubufatanyacyaha muri dosiye ya Alfred Nkubiri yasabye Urukiko Rwisumbuye rwa Gasabo gutandukanya dosiye zabo kuko Ubushinjacyaha butagaragaza neza ko ibyaha byakozwe agikorana n’uyu munyemari.

Ni ubusabe yatanze kuri uyu wa 30 Ukuboza 2020, ubwo urukiko rwatangiraga kuburanisha mu mizi urubanza ruregwamo umunyemari Nkubiri, uregwa ibyaha byo guhimba, guhindura inyandiko cyangwa gukoresha inyandiko mpimbano, guhisha ibintu byakoreshejwe cyangwa byagenewe gukoreshwa icyaha n’ubuhemu.

Iburanisha ryo kuri uyu wa Gatatu ryabaye hifashishijwe ikoranabuhanga rya Skype mu rwego rwo kwirinda ikwirakwira rya Coronavirus, abaregwa bari muri Gereza ya Mageragere, Ubushinjacyaha buri aho bukorera mu gihe abunganira abaregwa bari mu rukiko.

Ryatangiye ritinze ahanini kubera ibibazo by’ikoranabuhanga byabanje kubaho.

Iburanisha ryatangiye umwunganizi wa Nyiramahoro ahabwa umwanya, maze agaragariza Inteko iburanisha icyo yise inzitizi umukiliya we afite muri uru rubanza.

Asobanura ibijyanye n’ibyaha umukiliya we aregwa byo guhimba inyandiko no guhisha ibimenyetso, yavuze ko icyo guhisha ibimenyetso Nyiramahoro atigeze akibazwaho.

Uyu mwunganizi kandi yasabye Ubushinjacyaha kwerekana igihe ubufatanyacyaha umukiliya we aregwa bwabereye kuko hari ibyo buvuga kandi byarabaye atagikorana na Nkubiri, ahubwo yarikoreraga ku giti cye akarangura ifumbire bitewe n’amafaranga afite.

Yasabye Urukiko gusaba Ubushinjacyaha kugaragaza igihe ubufatanyacyaha burega Nyiramahoro bwabereye kuko mu idosiye bitagaragazwa. Aheraho asaba urukiko ko rwatandukanya dosiye y’umukiliya we n’iya Nkubiri.

Uwunganira Nyiramahoro yasabye kandi urukiko kuzahamagaza abatangabuhamya ngo kuko ibyo bavuga bihabanye n’ibyo Ubushinjacyaha buvuga.

Nyiramahoro ahawe umwanya na we yikije ku byo umunyamategeko we yavuze asaba ko dosiye ye itandukanywa n’iya Nkubiri.

Ubushinjacyaha bwahawe umwanya buvuga ko ibyo guhamagaza abatangabuhamya mu rukiko nta kibazo ariko bubigaragaza nk’impamvu yo gutinza urubanza.

Ku bijyanye no kumenya niba igihe abavoka bavuga ko Nyiramahoro yakoreye icyaha yari agikorana na Nkubiri, Ubushinjacyaha bwavuze ko atari impamvu ifatika yatuma dosiye zitandukanywa ahubwo buvuga ko urukiko rutasuzuma ikimenyetso kandi urubanza rutarajya mu mizi.

Ubushinjacyaha bwavuze ko uregwa, ashobora kwiregura ahakana ibyo aregwa aho kubaza igihe byabereye.

Ku ngingo y’uko urubanza rwa Nyiramahoro rwatandukanywa n’urwa Nkubiri, Ubushinjacyaha bwavuze ko bidakwiye kuko hari ibyaha bakoze bafatanyije bwemeza ko byabangamira imigendekere myiza y’urubanza.

Abavoka ba Nyiramahoro bavuze ko afunze binyuranyije n’amategeko

Umwunganizi wa Nyiramahoro Théopiste ureganwa na Alfred Nkubiri yabwiye urukiko ko umukiliya we afunze binyuranye n’amategeko kuko yahawe urupapuro rumuta muri yombi ruzwi nka ‘Mandat d’Arrêt provisoire’ mu gihe yari amaze ukwezi kurenga afunzwe.

Amategeko ateganya ko umuntu wese ufunzwe agomba guhabwa urwandiko rumufunga, ariko Nyiramahoro yaruhawe amaze igihe ari mu maboko y’inzego z’ubutabera.

Uwunganira Nyiramahoro yavuze ko umukiliya we yafashwe tariki 17 Nyakanga ariko ahabwa ahabwa urwo rupapuro ku wa 31 Kanama 2020.

Ubwo ngo yari afunzwe, ntiyigeze amenyeshwa impamvu y’ifungwa rye ndetse ngo yagerageje kubaza inzego zose bireba ariko zitana ba mwana.

Uyu mwunganizi ngo yandikiye Umushinjacyaha Mukuru ariko ntiyasubizwa. Ku wa 31 Kanama 2020 ngo nibwo umukiliya we yaje kumenyeshwa ibyo aregwa hashize ukwezi kurenga afunzwe, ibintu avuga ko binyuranyije n’amategeko.

Yasabye abafunze Nyiramahoro gutumizwa bagasobanura impamvu afunzwe binyuranyije n’amategeko.

Ubushinjacyaha buhawe umwanya ngo busobanure iyi ngingo bwavuze ko ibyo umwunganizi wa Nyiramahoro avuga atari byo kuko amakuru yose ari mu ikoranabuhanga [système] ryerekana ko yabajijwe mu buryo bukurikije amategeko.

Bwavuze ko hari ibyo uwunganira Nyiramahoro ari kwita gufungwa kandi ari igihe yamaze ari mu kato kubera icyorezo cya COVID-19, anabazwa ku byaha aregwa.

Uwunganira Nyiramahoro yasabye urukiko ko rwarekura umukiliya we kuko n’ubundi afunzwe binyuranyije n’amategeko.

Nyuma yo kumva impande zombi Inteko iburanisha yavuze ko igiye gusuzuma icyifuzo cya Nyiramahoro cy’uko dosiye ye yatandukanywa n’iya Nkubiri, umwanzuro ukazasomwa ku wa 31 Ukuboza 2020 saa Munani naho iburanisha rikazakomeza ku wa 20 Mutarama 2021.

Ibyaha Nkubiri aregwa bifitanye isano na miliyari 2 Frw ashinjwa ko yanyereje mu bucuruzi bw’ifumbire mvaruganda binyuze mu kigo cye cya ENAS, agahimba imikono byitwa ko ari iy’abantu bafashe ifumbire mvaruganda ntibishyure, ashyiraho n’abatarayihawe kugira ngo ahabwe amafaranga na Minisiteri y’Ubuhinzi n’Ubworozi.

Nkubiri aregwa bifitanye isano na miliyari 2 Frw ashinjwa ko yanyereje mu bucuruzi bw’ifumbire mvaruganda binyuze mu kigo cye cya ENAS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .