Undi musirikare w’u Burundi yiciwe muri Centrafrique

Yanditswe na IGIHE
Kuya 16 Mutarama 2021 saa 08:27
Yasuwe :
0 0

Umusirikare w’u Burundi uri mu butumwa bwo kugarura amahoro muri Centrafrique, yiciwe mu gitero cyagabwe ku ngabo z’iki gihugu hamwe n’iza Bangladesh mu gace ka Grimari muri Perefegitura ya Ouaka.

Ku wa Gatanu tariki ya 15 Mutarama 2021 nibwo uyu musirikare w’u Burundi yishwe. Mu masaha y’igitondo, Ingabo za Minusca zirimo iz’u Burundi n’iza Bangladesh zafashe urugendo zigiye mu bikorwa byo kugenzura uko umutekano wifashe mu bice bya Grimari.

Mu nzira zigenda, zaje gutegwa n’abarwanyi babagabaho ibitero bibiri, icya mbere nta muntu wapfuye ariko mu cya kabiri umusirikare w’u Burundi yishwe ndetse abandi babiri ba Bangladesh bakomereka byoroheje.

Intumwa y’Umunyamabanga Mukuru wa Loni muri Centrafrique, Mankeur Ndiaye, yunamiye uyu musirikare wapfuye ndetse yihanganisha umuryango we, ingabo z’u Burundi ndetse na Guverinoma y’iki gihugu anifuriza abandi basirikare ba Bangladesh bakomeretse gukira vuba.

Uyu musirikare w’u Burundi yishwe nyuma y’abandi batatu bishwe mu mpera z’umwaka ushize ku wa 25 Ukuboza 2020 mu gitero bagabweho n’inyeshyamba.

Abo basirikare bo biciwe mu Karere ka Dékoa kari mu Ntara ya Kémo. U Burundi bufite ingabo zigera kuri 760 mu bikorwa byo kubungabunga amahoro muri Centrafrique, Minusca.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .