Undi Munyarwanda yishwe na CMI, inzego z’umutekano muri Uganda zararuciye zirarumira

Yanditswe na Musangwa Arthur
Kuya 11 Gashyantare 2020 saa 03:07
Yasuwe :
0 0

Mu ntangiriro za Gashyantare 2020 Perezida Kagame na Museveni bahuriye mu nama yiga ku bibazo biri hagati y’ibihugu byombi, yatumijwe na Perezida wa Angola, João Lourenço ikitabirwa na Félix Tshisekedi wa RDC nk’abahuza.

Ni nyuma y’ibibazo u Rwanda rwagaragaje by’uko Uganda ihohotera Abanyarwanda, bagafungwa binyuranyije n’amategeko ndetse bagakorerwa iyicarubozo; ko Uganda itera inkunga imitwe yitwaje intwaro igamije guhungabanya umutekano w’u Rwanda ndetse ikabangamira ubucuruzi bwarwo.

Nyuma y’iyi nama, abaturage bumvaga ko umutuzo ugiye kugaruka bakongera kwizihirwa no kubaho batekanye.

Ibi nyamara ntibyarambye kuko mu rugendo rwo gushaka amahoro, Urwego rushinzwe Iperereza mu Gisirikare cya Uganda (CMI) rwarushyizemo kidobya.

Amasezerano agamije kugarura amahoro hagati y’u Rwanda na Uganda yashyiriweho umukono i Luanda ku wa 21 Kanama 2019. Uganda yakomeje kugenda itandukira ku gukemura amakimbirane ndetse CMI igakomeza ibikorwa byayo byereka amahanga ko idashaka kuyashyira mu bikorwa.

Inkuru ebyiri zanditswe mu gitangazamakuru cyo muri Uganda zerekana neza ubutumwa CMI yashakaga gutanga.

Ku wa Gatandatu, tariki ya 8 Gashyantare 2020, Daily Monitor yanditse ko “Ba Minisitiri bahuye mbere y’inama ya Perezida Kagame na Museveni.’’

Iyo nkuru yavugaga ku nama yahurije Minisitiri w’Ibikorwaremezo Amb Gatete Claver na Minisitiri ushinzwe Ubwikorezi muri Uganda, Gen Katumba Wamala, ku mupaka wa Gatuna mbere y’uko habera inama izahuza Perezida Paul Kagame na Yoweri Museveni wa Uganda ku wa 21 Gashyantare 2020, hagamijwe gushaka igisubizo kirambye ku makimbirane hagati y’ibihugu byombi.

Nyuma y’amasaha make gusa, Daily Monitor yatangaje indi nkuru ivuga ko “Umunyarwanda wari ufunze yasanzwe yapfuye.’’

Iki kinyamakuru cyakomeje gitangaza ko muri Werurwe 2019 aribwo hatangajwe inkuru y’ifatwa rya Magezi Emmanuel. Yabanje gufungirwa mu Kigo cya Gisirikare cya Makenke mu Karere ka Mbarara mbere yo kwimurirwa ku Cyicaro cya CMI i Kampala.

Urupfu rwe nta muyobozi n’umwe wa Uganda wigeze ashaka kuruvugaho mu itangazamakuru.

Ofisiye wa Polisi ushinzwe Iperereza ku byaha kuri Sitasiyo ya Butabika, hafi yaho umubiri wa Magezi wasanzwe, yanditse asaba ko hakorwa ibizamini byo gusuzuma umubiri wa nyakwigendera ariko Umuvugizi wa Polisi mu Mujyi wa Kampala, Patrick Onyango, yemeje urupfu rwa Magezi, ariko avuga ko atazi uko byagenze.

Umuyobozi w’Ibitaro, Dr. David Basangwa, na we yirinze kugira icyo atangaza kuko yari ku kiriyo.

Major Charles Kabona uvugira Ikigo cya Gisirikare cya Makindye, aho Emmanuel Magezi yakorewe iyicarubozo ryamuviriyemo urupfu yavuze ko ‘atari mu biro ubwo yahamagarwaga.’

Umuvugizi w’Igisirikare cya Uganda (UPDF), Brig. Richard Karemire, na we yahunze kuvugana n’itangazamakuru, yiregura ko “Ntacyo nzi kuri icyo kibazo.’’

Magezi kimwe n’abandi Banyarwanda yahohotewe anicwa na CMI imaze imyaka ishimuta Abanyarwanda b’inzirakarengane, ikabakorera iyicarubozo ndetse bamwe na bamwe bikabaviramo urupfu.

CMI yatoteje Magezi kugeza ku rwego hanzuwe ko bamujugunya ku bitaro bivura abafite uburwayi bwo mu mutwe aho bari bazi neza ko azagwa.

Icyari kigambiriwe kirigaragaza. CMI yabikoze ishaka kwerekana ko Magezi ari afite uburwayi bwo mu mutwe bwatumye yoherezwa mu bitaro akaza kugwayo.

Magezi iyo ataza kugira umunyamategeko we Eron Kiiza, wakurikiranye ikibazo cye na we nta kanunu kari kumenyekana ku rupfu rwe kimwe n’abandi Banyarwanda benshi.

Nta cyaha na kimwe yigeze ashinjwa imbere y’urukiko, yarekewe muri kasho gusa akorerwa iyicarubozo, kugeza ubwo ku wa 31 Mutarama 2020, umunyamategeko we Eron Kiiza yaregeye Urukiko Rukuru i Kampala asaba ko uwo yunganira yaburanishwa niha hari ibyaha aregwa.

Kiiza yari yanasabye ibisobanuro by’Igisirikare cya Uganda na Guverinoma ku bijyanye n’ifungwa ritemewe ry’umukiliya we kugeza ubwo amara amezi 10 ari muri kasho ataragezwa imbere y’umucamanza, ngo amenyeshwe ibyo aregwa.

Uyu munyamategeko yaje kumenya ko umukiliya we yishwe mbere yuko umubiri we ugaragara ku bitaro by’abafite ubumuga bwo mu mutwe.

Kiiza yavuze ko afite amakuru yizewe ko Magezi yishwe.

Urwego rushinzwe Ubutasi mu Gisirikare, CMI n’urw’Umutekano w’Imbere mu gihugu, ISO, zimaze kubigira nk’ihame gushimuta no gutoteza inzirakarengane z’Abanyarwanda kuva mu myaka yo hambere.

Ku wa 5 Nyakanga 2002, Monitor yanditse ko “Abanyarwanda mu cyumweru gishize bahuye na Perezida Museveni bamusaba guhabwa uburinzi kuko batotezwa n’abashinzwe umutekano muri ISO na CMI.’’

Kuva mu myaka itatu ishize, CMI ikorana n’imitwe y’iterabwoba irimo RNC ya Kayumba Nyamwasa ishaka guhungabanya umutekano w’igihugu.

CMI kandi yashyize imbaraga mu gushakira abayoboke iyo mitwe, uwanze kuyoboka agafungwa nta mpamvu, agakubitwa kugeza no ku rupfu.

Usibye ibikorwa by’iyicarubozo ku Banyarwanda bakorera ingendo muri Uganda, CMI yanasahuye ibicuruzwa n’amafaranga y’abajyaga guhaha mu bindi bihugu bakanyura muri Uganda.

Ku wa Kane w’icyumweru gishize nibwo Leta ya Uganda yashyikirije u Rwanda mu buryo butunguranye umurambo w’umuturage warwo witwa Gasore Semukanya wabonetse mu ishyamba rya Uganda umanitswe mu giti ariko impamvu y’urupfu rwe ntiyahise itangazwa.

Nubwo Uganda isa n’iyinangiye ku bikorwa byo gushimuta no kwica Abanyarwanda bakorewe iyicarubozo, ibiganiro byo gushaka kugarura umubano ku murongo birakomeje.

Ku wa 21 Gashyantare 2020 hategerejwe inama izahuza Perezida Paul Kagame na Yoweri Museveni wa Uganda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza