Umwe yari agiye kwicirwa i Kigali: Isano y’u Rwanda na bamwe mu bagize Guverinoma ya Biden

Yanditswe na Philbert Girinema
Kuya 25 Ugushyingo 2020 saa 10:38
Yasuwe :
0 0

Hashize iminsi ibiri Perezida watowe muri Leta Zunze Ubumwe za Amerika, Joe Biden, atangaje abantu batanu ba mbere bazaba bagize Guverinoma ye, izatangira imirimo tariki ya 20 Mutarama 2021 nyuma yo kurahira.

Umubare munini w’abo Biden amaze gushyira mu mirimo n’abo bikekwa ko azayishyiramo mu minsi iri imbere, ni uw’abantu babanye na we mu gihe cyashize, azi neza, by’umwihariko bakoranye ubwo yari Visi Perezida wa Leta Zunze Ubumwe za Amerika muri manda ebyiri za Barack Obama.

Biden akomeje guca uduhigo tutigeze dukorwa n’undi uwo ariwe wese muri 45 bamaze kuyobora icyo gihugu, nk’aho ariwe wa mbere mu mateka ubashije gutorwa n’abaturage barenga miliyoni 80. Nta wundi wigeze ugeza uwo mubare, ndetse ni we wa mbere uzayobora igihugu akuze kurusha abandi kuko azarahira arengeje imyaka 78 mu gihe undi wari ukuze ari Ronald Reagan wasoje manda ye ya kabiri afite imyaka 77 n’iminsi 349.

Kuri ubu, amaso ahanzwe politiki nshya ya Biden kuri Afurika n’u Rwanda by’umwihariko, mu gihe rutakunze guhirwa n’ubuyobozi bw’Abaperezida b’aba- démocrates ishyaka akomokamo.

Mu ba mbere yamaze gutangaza bazaba bagize Guverinoma ye harimo Umunyamabanga wa Leta Ushinzwe Ububanyi n’Amahanga wagizwe Antony Blinken; Avril Haines agirwa Umuyobozi w’Ibiro Bikuru bishinzwe Ubutasi.

Harimo kandi Alejandro Mayorkas wagizwe Umunyamabanga wa Leta ushinzwe umutekano w’imbere mu gihugu; Jake Sullivan wagizwe Umujyanama mu Biro by’Umukuru w’Igihugu ushinzwe ibijyanye n’umutekano na Linda Thomas-Greenfield wagizwe Ambasaderi wa Leta Zunze Ubumwe za Amerika mu Umuryango w’Abibumbye.

Aba bayobozi bose bagiye bayobora mu bihe bitandukanye, bamwe bafitanye amateka akomeye n’u Rwanda ashingiye ku buryo Guverinoma barimo zarubaniye, ibyo baruvuzeho n’ibindi bitandukanye.

Linda Thomas-Greenfield yari yiciwe mu Rwanda yitiranyijwe n’umututsikazi wahigwaga

Uyu mugore w’imyaka 68 yavukiye muri Leta ya Louisiana, afite impamyabumenyi y’ikirenga mu bijyanye n’imiyoborere ndetse afite n’indi y’icyiciro cya gatatu cya Kaminuza mu bijyanye n’amategeko.

Yakoze mu myanya itandukanye harimo ko yabaye Umunyamabanga wungirije mu Biro bishinzwe abaturage, impunzi n’abimukira hagati y’umwaka wa 2004 na 2016, mbere yo kuba Ambasaderi wa Amerika muri Liberia hagati y’umwaka wa 2008 kugera mu 2012.

Mu 2012, Thomas-Greenfield yabaye Umuyobozi Mukuru w’Ibiro bishinzwe ibikorwa bya Leta Zunze Ubumwe za Amerika mu mahanga ndetse n’Umuyobozi ushinzwe abakozi hagati ya 2012 na 2013.

Mu 2013 yagizwe Umunyamabanga wungirije wa Leta Zunze Ubumwe za Amerika ushinzwe Afurika, aho icyo gihe yitaye ku bikorwa by’igihugu cye muri Afurika yo munsi y’ubutayu bwa Sahara mu mishinga irimo nko kurwanya Ebola n’ibindi. Ubwo Trump yari amaze kujya ku butegetsi, mu 2017 yakuwe kuri iyo mirimo.

Mu Ugushyingo 2018 ubwo yari ari gutanga ikiganiro muri Leta ya Virginia, yagarutse ku buzima bwe, kuva mu buto bwe, uko atigeze agira amahirwe yo kubona abantu bize areberaho mu muryango we, kuko se icyo yari azi kwari ugusoma no kwandika gusa, nta yandi mashuri yanyuzemo.

Nyina yari afite abana umunani, ariko yiyemeza kurera abandi umunani batari bafite imiryango bo mu bice bari baturanye. Yavuze uburyo yakuriye mu muryango ukennye, ukorerwa ivangura, akiga mu mashuri y’abantu bakorerwa ivangura, gusa akaza kugira amahirwe akiga kugeza arangije kaminuza.

Yaje kurangiza amasomo, yinjira mu bijyanye na dipolomasi. Ati “Byatumaga ngenda hirya no hino ku Isi ariko muri Mata 1994 nageze i Kigali mu Rwanda. Kandi ngira ngo mwibuka ko muri Mata 1994 mu Rwanda habaye Jenoside.”

Uyu mugore icyo gihe yaje mu Rwanda mu butumwa bw’akazi bwari bugamije kureba uko ibibazo by’impunzi byifashe. Hashize iminsi ibiri ahageze, nibwo indege ya Perezida Habyarimana yahanuwe, haba ubwicanyi bwakorewe Abatutsi bwari bumaze igihe kinini butegurwa.

Thomas-Greenfield ni umugore muremure, ngo icyo gihe umwe mu Nterahamwe yaramubonye amwitiranya n’umututsikazi ashaka kumwica. Ati “Nasatiriwe n’umusore muto wari wahawe amabwiriza yo kwica umugore witwa Agathe, yatekereje ko ari njye.”

Yakomeje agira ati “Igitangaje ntabwo nigeze ngira umutima uhagaze, ntimunyumve nabi nari mfite ubwoba, ariko sinigeze ngira umutima uhagaze. Narebye uwo musore muto mu maso mubaza izina rye, hanyuma mubwira iryanjye. Nashakaga ko amenya izina ryanjye, kuko nashakaga ko nanyica asigara azi izina ry’umuntu yishe.”

Ngo yatangiye kumwenyura byo kujijisha “inseko mama wanjye yari yaranyigishije, nkoresha imbaraga z’ubugwaneza n’impuhwe ndarokoka” gusa ngo uwo mugore bari bamwitiranyije na we yaje kwicwa. Ati “Byahinduye ubuzima bwanjye burundu”.

Mu 2016 ubwo yari Umunyamabanga wungirije wa Leta Zunze Ubumwe za Amerika ushinzwe Afurika, yashimye umuhate w’u Rwanda mu kwakira impunzi z’Abanye-Congo n’Abarundi barenga ibihumbi 70 bahungaga imvururu zari zarakajije umurego mu gihugu cyazo.

Muri Nyakanga uwo mwaka, yasuye u Rwanda, ajya no ku rwibutso rwa Jenoside rwa Kigali yunamira inzirakarengane zirushyinguwemo, maze avuga ko kurusura bifite igisobanuro gikomeye kuri we.

Thomas Greenfield ubwo yasuraga urwibutso rwa Jenoside rwa Kigali ku Gisozi akunamira inzirakarengane zirushyinguyemo

Umugabo wa kabiri wa nyina wa Antony Blinken yarokotse Jenoside yakorewe Abayahudi

Antony Blinken wagizwe Umunyamabanga wa Leta ushinzwe Ububanyi n’Amahanga, afite imyaka 58 yabaye Umunyamabanga wa Leta wungirije ushinzwe Ububanyi n’Amahanga ndetse n’Umujyanama wungirije mu by’umutekano ku buyobozi bwa Obama, ubwo Biden yari Visi Perezida.

Blinken yavutse tariki ya 16 Mata 1962 mu Mujyi wa New York City, ku babyeyi b’Abayahudi. Nyuma nyina yaje gutandukana na se arongorwa na Samuel Pisar warokotse Jenoside yakorewe Abayahudi, mu nkambi za Auschwitz na Dachau.

Tariki ya 30 Mata 2013, mu kiganiro cyari gifite intero yo gukumira ko Jenoside yazongera kubaho ukundi mu kinyejana cya 21, Blinken yavuze ku mateka y’umuryango we, uko warokotse Jenoside yakorewe Abayahudi, ubwicanyi bwakorewe muri Hongrie n’ubwo mu Burusiya.

Yavuze ku Rwanda, agaruka ku buryo Guverinoma ya Amerika yari anarimo icyo gihe yarutereranye kugeza ubwo Abatutsi bahigwa bakicwa, ntihagire icyo igihugu cye gikora.

Blinken yavuze ko uburyo Amerika yatereranye u Rwanda mu 1994, byasize igikomere mu mateka yayo ku buryo uyu munsi yahinduye uko yitwara mu bibazo nk’ibyabaye mu Rwanda icyo gihe.

Yavuze ko ubu ibibazo biri muri Syria, Sudani na Repubulika Iharanira Demokarasi ya Congo biha igihugu cye umukoro wo kurinda ko amateka y’u Rwanda yagira ahandi yisubiramo.

Avril Haines wagizwe Umuyobozi w’Ibiro Bikuru bishinzwe Ubutasi we nta byinshi yakunze kuvuga ku Rwanda, gusa mu 2016 ubwo yari ari kugeza ikiganiro ku banyeshuri bo muri Kaminuza ya Yale kigaruka ku kamaro k’amasezerano mpuzamahanga, yavuze uburyo ari ingenzi ko ibihugu byubahiriza amasezerano ya Montreal yemerejwe i Kigali agamije gukumira imihindagurikire y’ikirere.

Usibye batanu bamaze gutangazwa ko bazaba bagize Guverinoma itaha ya Biden, yanashyizeho intumwa yihariye mu bijyanye no kurengera ibidukikije, John Kerry, wari Umunyamabanga wa Leta ushinzwe Ububanyi n’Amahanga ku ngoma ya Obama.

Yasuye u Rwanda mu bihe bitandukanye, ariko aheruka mu 2016 ubwo yanabonanye na Perezida Kagame muri Village Urugwiro, anasura urwibutso rwa Jenoside yakorewe Abatutsi rwa Kigali, ku Gisozi.

Linda Thomas-Greenfield yagizwe Ambasaderi wa Leta Zunze Ubumwe za Amerika muri Loni
Antony Blinken yagizwe Umunyamabanga wa Leta Ushinzwe Ububanyi n’Amahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .