Umwavoka wa Byabagamba yasabye ko ajyanwa mu nkiko za gisirikare ku byaha by’ubujura

Yanditswe na Philbert Girinema
Kuya 22 Ukwakira 2020 saa 10:28
Yasuwe :
0 0

Saa tatu n’iminota 15 nibwo Inteko iburanisha yageze mu cyumba cy’Urukiko rw’Ibanze rwa Kicukiro. Bitandukanye n’izindi nshuro, Byabagamba ntabwo yari mu cyumba cy’iburanisha kuko urubanza rwaburanishijwe hakoreshejwe ikoranabuhanga rya Skype.

Uyu mugabo wigeze kuba Umusirikare ukomeye mu Ngabo z’u Rwanda mbere y’uko yamburwa impeta za gisirikare zose, aregwa icyaha cy’ubujura ashinjwa ko yakoreye mu Rukiko rw’Ubujurire aho ngo yibye telefoni.

Saa tatu n’igice Byabagamba yageze mu cyumba cy’aho we n’abamwunganira bari bari, Me Gakunzi Valery umwe mu bunganizi babiri be asaba ko bahabwa iminota 15 akavugana n’uwo yunganira nyuma yaho akaba aribwo iburanisha ritangira kuko batigeze bavugana mbere.

Umucamanza yabajije ubushinjacyaha niba bubyemera, buvuga ko ntacyo bitwaye ariko ko iyo minota itagomba kurenga.

Iburanisha ryasubukuwe saa yine, Umucamanza atangira asoma umwirondoro wa Byabagamba avuga ko akurikiranyweho icyaha cyo kwiba, amubajije niba acyemera undi asubiza ko atacyemera.

Byabagamba yahise abwira urukiko ko hari inzitizi afite z’iburabubasha bw’urukiko, ko ari inzitizi yaganiriyeho n’abunganizi be muri iki gitondo.

Umwunganizi we yavuze ko umukiliya we akwiriye kuburanishwa n’inkiko za gisirikare kuko mu manza zindi yaburanye, nta na rimwe yaba n’urukiko rw’ubujurire rwigeze rumukura mu gisirikare nk’igihano cy’ikirenga.

Yavuze ko inkiko za gisirikare arizo ziburanisha abasirikare naho inkiko zisanzwe zikaburanisha abandi basanzwe, ngo urukiko rwa gisirikare rwo rufite umwihariko ku bo ruburanisha.

Me Gakunzi yakomeje avuga ko kuba nta teka rya Minisitiri cyangwa irya Perezida wa Repubulika rimwirukana mu gisirikare, akwiriye kuburanishwa n’inkiko za gisirikare aho kuba iza gisivile.

Ubushinjacyaha bwavuze ko amategeko agena ko mu nkurikizi zo kunyagwa amapeti ya gisirikare harimo kwamburwa ipeti n’uburenganzira bwo kwambara imyambaro ya gisirikare no kutagira umurimo uwo ariwo wose mu Ngabo z’u Rwanda.

Bwavuze ko nta musirikare udafite imirimo mu Ngabo z’u Rwanda, bivuze ko udafite iyo imirimo aba atari n’umusirikare.

Nyuma yo kumva impande zombi, umucamanza yavuze ko urukiko rugiye kwiherera hanyuma rukaza gutangaza umwanzuro warwo mu minota 30.

Saa saba nibwo umucamanza yagarutse mu cyumba cy’iburanisha, avuga ko inzitizi za Byabagamba nta shingiro zifite kuko yambuwe impeta za gisirikare kandi ko icyaha cyo kwiba akurikiranyweho cyabayeho nyuma y’uko urukiko rwa gisirikare hamwe n’urw’ubujurire zimwambuye impeta za gisirikare.

Tom Byabagamba aregwa ibyaha by'ubujura bwa telefoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .