00:00:00 IGIHE NETWORK KN KINYARWANDA EN ENGLISH FR FRANCAIS

Umwarimu mwiza amurikira abandi- Madamu Jeannette Kagame yavuze ibigwi Nyirantagorama witabye Imana

Yanditswe na IGIHE
Kuya 20 May 2022 saa 02:04
Yasuwe :

Madamu Jeannette Kagame yashimye umusanzu wa Nyirantagorama Françoise mu burezi, avuga ko yari umwarimu mwiza witangiye umwuga wo kurera atizigama.

Mu gitondo cyo kuri uyu wa Kane, tariki ya 19 Gicurasi 2022, ni bwo hamenyekanye inkuru mbi y’urupfu rwa Nyirantagorama Françoise washinze Ishuri rya ‘La Colombière’. Ni umwe mu bagize uruhare rukomeye mu burezi bw’u Rwanda ndetse no mu Burundi ubwo yari mu buhungiro akaba yarigishije benshi kandi babimushimira.

Madamu Jeannette Kagame abinyujije kuri Twitter, yagaragaje ko yababajwe cyane n’urupfu rwa Nyirantagorama wamubereye umurezi, ashima umusanzu we guhera muri Stella Matutina, muri Ecole Independante na La Colombière y’i Bujumbura. Iyi ni yo yaje kwimukira i Kigali.

Yamushimiye umurage mwiza asigiye abo yareze, amusabira kuruhukira mu mahoro.

Ati "Umwarimu mwiza ni nk’urumuri rumurikira abandi, aharura inzira imurikira abandi. Muvandimwe muyobozi, mwitangiye kwigisha benshi muri twe, mwabikoranye umurava n’umuhate muratubungabunga."

Abantu batandukanye barimo abo Nyirantagorama yigishije, abo yarereye n’abandi bose bari bamuzi bakomeje kugaragaza agahinda batewe n’urupfu, ariko bose bagahurira ku buryo yari umurezi mwiza, witangira kurera mu rukundo n’ubudacogora.

Prof Vincent Sezibera yagize ati "Maman Françoise aruhukire mu mahoro, umusanzu we mu guteza imbere uburezi n’uburere bw’abana b’u Rwanda ni intangarugero. Yagobotse aho rwari rukomeye. Uwiteka amwiyereke, aruhukire mu mahoro."

Chantal Karekezi yagize ati "Yarereye u Rwanda cyane umugisha w’Imana uzakomeze uherekeze urubyaro rwe, Imana ikomeze umuryango we".

Naho Munyankindi Erasme José ati "Mubyeyi Madame la Directrice ndabibuka ukuntu mwatubereye Umuyobozi mwiza. Ndibuka y’uko mwakundaga kuza mu mashuri yose mureba y’uko twiga neza mukatubaza niba umwarimu atwigisha neza tukumva tukabasubiza yego, turabakumbuye cyane. Ruhukira mu mahoro. Imana ibakire mu ijuru."

Nyirantagorama Françoise yashinze ‘La Colombière’ nyuma yo kuba umwarimu mu mashuri atandukanye y’i Burundi, umugabo we aza kumubwira ko umusanzu atanga muri ayo mashuri yawushingamo irye.

Nawe yabitekerejeho bituma tariki ya 1 Ukwakira 1990 ashinga ishuri i Burundi, aho yatangiranye n’ishuri ry’incuke bagenda bakurana, bageze mu mwaka wa kabiri mu 1995 ni bwo yatahutse ageze mu Rwanda ahita ahakomereza iri shuri.

Uyu mubyeyi yakoze akazi katoroshye mu burezi bw’u Rwanda kuko avuga ko gutangira ishuri byamugoye cyane, hari ubwo yajyaga gushaka ibikoresho i Burundi kugira ngo abanyeshuri bige neza.

Umusanzu we wabonywe na benshi mu 2010 ubwo La Colombière yizihizaga imyaka 10 imaze ibayeho, Madamu Jeannette Kagame yamuhaye igihembo cy’uko yagaragaje ubwitange mu burezi bw’u Rwanda.

Usibye mu burezi kandi mu 2017 Nyirantagorama Françoise n’ishuri rye bahawe igikombe cy’abatanga neza imisoro, bisobanuye ko yagize uruhare no mu iterambere ry’u Rwanda.

Nyirantagorama Françoise yavutse mu 1940, yaboneye izuba mu Karere ka Nyanza mu Majyepfo y’u Rwanda. Yize amashuri abanza mu gace k’iwabo nyuma yakomereje mu Ishuri rikuru ry’i Save aho yigaga Uburezi ari naho yatangiriye kwigisha yimenyereza mu mashuri yo kuri misiyoni.

Yahise ajya kwigisha mu Ishuri ribanza rya Kabgayi ahamara imyaka ibiri nyuma ajya mu Ishuri Rikuru ry’i Nyanza ryigishaga imyuga naho ahamara imyaka ibiri, yimuriwe i Kansi ahamaze imyaka ibiri iwabo baza guhungira i Burundi.

Madamu Jeannette Kagame yavuze ibigwi Nyirantagorama Françoise uheruka kwitaba Imana
Nyirantagorama Françoise yashimwe umuhate wamuranze mu kurera neza no kwitangira kubikora mu rukundo n’ubudacogora
Aha ni mu 2017, Madamu Jeannette Kagame na Nyirantagorama Françoise, bakataga umutsima mu birori byo gusoza umwaka w'amashuri muri ‘La Colombière’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .