Hatangajwe itariki izafatirwaho umwanzuro w’urukiko ku kohereza Kabuga Félicien i Arusha

Yanditswe na Rabbi Malo Umucunguzi
Kuya 2 Nzeri 2020 saa 03:13
Yasuwe :
0 0

Urukiko rusesa imanza rwo mu Bufaransa, ku wa 30 Nzeri nibwo ruzatangaza niba Kabuga Felicien ushinjwa kuba umuterankunga wa Jenoside yakorewe Abatutsi mu 1994, azashyikirizwa Urwego rwasigariyeho Urukiko Mpuzamahanga rwashyiriweho u Rwanda, ngo abe arirwo rumuburanisha.

Ku wa 3 Kamena nibwo Urukiko rw’Ubujurire rw’i Paris rwanzuye ko Kabuga agomba kohererezwa i Arusha muri Tanzania, akaba ariho aburanishirizwa.

Kugeza ubu afungiwe i Paris, ariko yajuririye Urukiko rusesa imanza arusaba kwemeza ko yaburanishirizwa mu Bufaransa. Kuri uyu wa 2 Nzeri Urukiko rusesa imanza rwasuzumye ubujurire bwe.

Mu iburanisha ryo kuri uyu wa Gatatu, Maître Louis Boré wunganira Félicien Kabuga, yavuze ko basaba ko atoherezwa muri IRMCT ku mpamvu z’ubuzima bwe.

Yasobanuye ko umukiliya we arwaye diabète n’umuvuduko ukabije w’amaraso, ndetse ngo arwaye Leukoaraiosis, indwara ahanini ijyana n’izabukuru igatuma umuntu atakaza ubushobozi bwo kugenzura neza umubiri we no kwibuka cyangwa gutekereza neza.

Ibyo ngo ntabwo bituma "abasha koherezwa hitawe ku buzima bwe, muri kilometero 7000 uvuye i Paris”. Ni ukuvuga kumujyana i Arusha muri Tanzania aho agomba kuburanira.

Ubwo Kabuga yagezwaga mu rukiko rw’ubujurire i Paris ku wa 3 Kamena, yagenderaga ku rupapuro rwa muganga wa gereza, wemeje ko akwiye kujyanwa mu mbangukiragutabara, ariko ntiyagaragaje niba adashobora gushyirwa muri gereza kubera ubuzima bwe.

Mu gihe Urukiko rusesa imanza rwaba ruteye utwatsi ubujurire bwe ku wa 30 Nzeri, u Bufaransa buzaba bufite ukwezi kumwe ko kuba bwamushyikirije IRMCT.

Kabuga w’imyaka 84 yafatiwe mu gace ka Asnières-sur-Seine mu Bufaransa, ku wa 16 Gicurasi 2020.

Umwanzuro w’urukiko ku kohereza Kabuga Félicien i Arusha uzatangazwa ku wa 30 Nzeri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .