Umwana warokowe na Bunani yenda gutwarwa n’amazi agiye gusubizwa mu muryango

Yanditswe na IGIHE
Kuya 14 Gashyantare 2020 saa 09:15
Yasuwe :
0 0

Komisiyo y’Igihugu Ishinzwe Abana (NCC) ifatanyije na Polisi y’Igihugu, Minisiteri y’Uburinganire n’Iterambere ry’Umuryango (MIGEPROF) n’Ikigo cy’Igihugu gishinzwe Igororamuco (NRS) yashyize Gatego Jackson mu kigo ngororamuco by’igihe gito kugira ngo ahabwe ubufasha bujyanye n’igororamuco hanategurwa uburyo bunoze bwo kumusubiza mu muryango we.

Ku itariki ya 1 Gashyantare 2020 nibwo Gatego yatabawe na Bunani Jean Claude, wamukuye muri ruhurura ya Nyabugogo mu Karere ka Nyarugenge, ubwo yendaga kumutembana kubera imvura nyinshi yari yaguye.

Komisiyo y’Igihugu ishinzwe Abana ivuga ko icyemezo cyo gushyira Gatego mu Kigo Ngororamuco cya “SOS Children’s Village Kayonza”, cyafashwe hashingiwe ku kuba yari asanzwe aba mu muhanda.

Amakuru yakusanyijwe na Polisi y’Igihugu agaragaza ko Gatego yarerwaga na nyirakuru hamwe n’abandi buzukuru be barindwi kuko nyina yahamusize agiye kuba muri Tanzania.

Gusa kubera intege nke, nyirakuru ntiyari agishoboye kwita kuri Gatego n’abandi bana. Ibi byatumye Gatego ava mu rugo ayoboka ubuzima bw’abana bo mu muhanda aho yabaga muri ruhurura.

Nyuma yo gushyira Gatego mu kigo ngororamuco harakurikiraho iki?

Ubusanzwe mbere yo gusubiza umwana mu muryango yaba uba mu kigo runaka cyangwa uwo mu muhanda, abakozi ba NCC babanza gusura umuryango we (iyo uhari) bagasesengura impamvu zatumye awuvamo kugira ngo zikurweho.

Umunyamabanga Nshingwabikorwa wa NCC, Dr. Uwera Kanyamanza Claudine, avuga ko no kuri Gatego iyi nzira ari yo izakurikizwa.

Yagize ati “Uramutse usubije umwana mu muryango utabanje gukuraho impamvu zawumukuyemo waba uruhira ubusa. Tugomba gusura umuryango wa Gatego, tukareba icyakorwa kugira ngo igihe tuzawumusubizamo azawugumemo awishimiye. Bisaba rero isesengura ryimbitse n’ibikorwa bifatika.”

Yemeza ko isesengura rizakorwa n’abakozi ba NCC n’ izindi nzego, ari rizashingirwaho mu bikorwa bifatika bigamije gukemura ibibazo by’uwo muryango kugira ngo Gatego n’abavandimwe be babeho mu buzima bishimiye ntawe utekereza kujya kuba mu muhanda.

Dr Kanyamanza yashimiye byimazeyo Bunani Jean Claude kubera umutima wa kimuntu yagaragaje ubwo yatabaraga Gatego.

Ati “Kuba tukivuga Gatego tunashaka uko twamwitaho, ni uko Bunani yitanze akishora muri ruhurura yarushagaho kuzura amazi. Yirengagije ko na we ruhurura yashoboraga kumuhitana, ayijyamo agamije kurengera umwana mu gihe abandi bareberaga. Ni urugero rwiza Abanyarwanda twese twagombye gukurikiza, tugafata umwana wese nk’uwacu.”

Ubutwari bwa Bunani Jean Claude bwatumye ahabwa akazi ko gukora isuku no kurinda umutekano mu bitaro bya Polyclinique de l’Etoile biherereye hafi ya Sainte Famille bitewe n’icyo gikorwa cy’ubumuntu yakoze.

Bunani w’imyaka 27, avuka mu Karereka Huye, afite umugore n’umwana w’amezi atandatu. Ubusanzwe abarizwa mu cyiciro cya mbere cy’ubudehe.

Komisiyo y’Igihugu Ishinzwe Abana (NCC) yatangiye gahunda yo gusubiza mu muryango Gatego warokowe na Bunani yenda gutwarwa n’imvura muri ruhurura ya Nyabugogo
Kayisime Nzaramba wari Umuyobozi w'Akarere ka Nyarugenge yakiriye mu biro bye Bunani na Gatego
Bunani Jean Claude yahawe akazi ko gukora isuku no kurinda umutekano mu Bitaro bya Polyclinique de l’Etoile

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .