Umwaka wa 2020 uzasiga u Rwanda rwungutse ingoro eshatu zigezweho z’amateka y’intwari z’igihugu

Yanditswe na Evariste Nsengimana
Kuya 8 Mutarama 2020 saa 07:54
Yasuwe :
0 0

Urwego rushinzwe Intwari z’Igihugu, Imidari n’Impeta by’Ishimwe (CHENO), rwatangaje ko mu mwaka wa 2020 ruteganya kunguka ingoro eshatu zigezweho zigaragaza amateka y’intwari z’igihugu mu buryo bwihariye ku buryo abantu bashobora kuhasura bakahungukira ubumenyi ku bijyanye n’Intwari z’u Rwanda.

Umuyobozi wa CHENO, Dr Habumuremyi Pierre Damien, yanditse ku rukuta rwe rwa Twitter ko izo ngoro zirimo iyo ku rwego rw’igihugu izaba iherereye i Remera impande ya Kigali Arena, hazwi nko ku Gicumbi cy’Intwari.

Ati “Uyu mwaka uzaba uw’ubutwari budasanzwe ku gihugu cyacu. Turateganya kuzuza ingoro eshatu zigezweho. Imwe yo ku rwego rw’igihugu izubakwa i Remera iruhanda ya Kigali Arena, ‘Ubumuntu’ izubakwa i Rubavu n’Ubunyarwanda izubakwa i Nyange mu Karere ka Ngororero.”

Muri Gicurasi 2018, iyari Minisiteri ya Siporo n’Umuco, yatangaje ko ku Gicumbi cy’Intwari i Remera mu Mujyi wa Kigali, hagiye kubakwa ingoro igaragaza amateka n’ibyaranze intwari z’u Rwanda.

Ubusanzwe aho ku gicumbi cy’Intwari i Remera hasanzwe imva gusa, bikaba byitezwe ko iyo ngoro niyubakwa, bizatuma abahasura babasha kumenya amateka y’intwari mu buryo bwimbitse.

Iyi minisiteri yavuze ko ari umushinga uzakorwa mu byiciro bitatu, ukaba waragenewe asaga miliyari 1,6 Frw.

Umunyamabanga Nshingwabikorwa wa CHENO, Nkusi Deo, yabwiye IGIHE ko Ingoro y’i Remera yatangiye kubakwa.

Ati “Abantu bubaka batubwira ko bazihuta cyane bashobora kurangiza vuba, tugeze mu cyiciro cya gatatu.”

Ni inyubako igeretse kabiri igizwe n’inzu abantu bazajya basobanurirwamo amateka y’intwari z’igihugu, aho bazajya banyurirwamo mu ncamake ibice biyigize mbere yo kuyisura.

Uretse ku Gicumbi cy’Intwari, Minispoc yagaragazaga ko hateganyijwe no kuvugurura, aho Intwari Niyitegeka Felecité yiciwe n’abo bari kumwe mu Karere ka Rubavu, hazwi nk’igicumbi cy’Ubumuntu mu yahoze ari Centre Saint Pierre, bigatwara 53 800 000 Frw.

Ati “Turi gusana iriya nzu yabagamo, igice cya mbere cyararangiye, hari ikindi cyasigaye nacyo kizatangira gukorwa vuba, uyu mwaka uzarangira bamaze kuhasana hose.”

Aha naho hazakorwa mu buryo bwihariye mu gusobanura ubutwari, by’umwihariko bw’uko Niyitegeka Felecité n’abo bafatanyije kurokora abari bahahungiye.

Ku gicumbi cy’Ubunyarwanda giherereye i Nyange biteganyijwe ko hazubakwa ishuri risimbura icyumba cyigirwamo n’abanyeshuri batewe n’abacengezi bakabasaba kwitandukanya Abahutu n’Abatutsi bakabyanga, bakabarasa urufaya rw’amasasu.

Munyakazi yasobanuye ko icyo cyumba kigomba gutunganywa kigaharirwa gusobanura amateka yaho, n’ibindi bibiri bigikikije kugira ngo hirindwe ko bishobora kurangaza abanyeshuri bari kwiga, hakubakwa ibindi bibisimbura.

Ati “Turifuza ko hose uko ari hatatu hazigisha umuco w’ubutwari, indangagaciro z’ubutwari n’ibyabaye cyane cyane tukigisha urubyiruko, Abanyarwanda ariko n’abanyamahanga muri rusange kuko n’ubundi harasurwa ariko hakaba ahantu heza hatunganyije.”

Intwari z’Igihugu zigabanyijwemo ibyiciro bitatu birimo Imanzi, Imena n’Ingenzi. Mu cyiciro cy’Imanzi harimo Umusirikare utazwi ari yo ingabo ihagarariye izindi zitangiye igihugu zikagwa ku rugamba mu bihe byashize, iby’ubu n’ibizaza na Gen. Maj Fred Gisa Rwigema.

Mu cyiciro cy’Imena harimo Umwami Mutara wa III Rudahigwa, Rwagasana Michel, Uwilingiyimana Agathe, Niyitegeka Felicité n’abanyeshuri b’i Nyange. Kugeza ubu mu cyiciro cy’Ingenzi nta ntwari zari zashyirwamo, kuko hagikorwa ubushakashatsi.

Imiterere y’inzu iri kubakwa ku Gicumbi cy’Intwari i Remera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .