Umuyobozi wungirije wa Global Fund yashimye inkunga u Rwanda rwatanze muri iki kigega

Yanditswe na IGIHE
Kuya 19 Ugushyingo 2019 saa 09:19
Yasuwe :
0 0

Umuyobozi Wungirije wa Global Fund Lady Roslyn ari mu Rwanda, aho yagiranye ibiganiro na Minisitiri w’Ubuzima Dr Diane Gashumba, ashima uko u Rwanda rwatanze inkunga muri iki kigega.

Lady Roslyn yashimye cyane Guverinoma y’u Rwanda ku ruhare yatanze mu nama ya 6 iherutse kubera i Lyon mu Bufaransa, yari igamije gukusanya miliyari zirenga 16 z’amadolari ya Amerika zikenewe kugira ngo ubuzima bwa benshi burusheho kubungabungwa ndetse n’intego y’ikinyagihumbi igendanye no kurandura icyorezo cya Sida burundu mu mwaka wa 2030 ibashe kugerwaho.

U Rwanda rukaba rwaratanze miliyoni 2.5 z’amadolari ni ukuvuga miliyari 2.3 FRW muri iki kigega.

Ibiganiro bya Minisitiri w’Ubuzima na Lady Roslyn kandi byagarutse ku ishusho ya gahunda Global Fund ikoranaho na Guverinoma y’u Rwanda irimo kurwanya indwara ya malaria ndetse aba bombi baganira kuri gahunda izashyirwa mu bikorwa mu myaka itatu iri imbere.

Ubufatanye bwa Guverinoma y’u Rwanda na Global Fund mu myaka 17 ishize, bwatumye igihugu kirushaho kubonera igisubizo kirambye cy’icyorezo cya Sida ndetse n’indwara za malaria n’igituntu.

Raporo y’ubushakashatsi bwa RPHIA (Rwanda Population HIV Impact Assessment) iheruka gusohoka, yerekanye ko mu Rwanda 98% by’ababana na virusi itera sida bose ubu bari ku miti igabanya ubukana kandi ko 90% mu bari ku miti nabo babashije kugabanya cyane ingano ya virusi mu maraso.

Ku bijyanye na malaria ndetse n’igituntu, mu mwaka wa 2016, u Rwanda rwari rumaze gukwirakwiza inzitiramibu zigera hafi kuri miliyoni 13 mu gihugu cyose kandi abarwayi bagera ku 40,000 b’igituntu baravuwe neza.

Mu ruzinduko rwe, Lady Roslyn arasura urwibutso rwa Gisozi kuri uyu wa kabiri tariki 19 Ugushyingo 2019. Ku munsi ukurikiyeho ku wa Gatatu tariki ya 20 Ugushyingo 2019 azasura ikigo nderabuzima cya Kicukiro mu murenge wa Niboye anasure ishyirahamwe ry’abakoraga umwuga w’uburaya ubu bakora imirimo ibabyarira inyungu i Gikondo.

Lady Roslyn ari mu Rwanda aho yitabiriye inama irebera hamwe uburyo bwo kuzamura no kunoza ingano y’ibishorwa mu mishinga y’ubuzima mu bihugu bigize Umuryango w’Ubumwe bw’Ibihugu bya Afurika iteraniye i Kigali kuva ku itariki 17 kugeza ku ya 21 Ugushyingo 2019.

Global Fund imaze imyaka 17 ikorana na Guverinoma y’u Rwanda mu mishanga irebana cyane cyane n’ubuzima, harimo kurwanya indwara z’ibyorezo nka virus itera Sida, malaria ndetse n’igituntu.

Umuyobozi Wungirije wa Global Fund Lady Roslyn ari mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza