Umuyobozi wa INES Ruhengeri yagaragaje urubyiruko nk’ipfundo ryo guhanga imirimo

Yanditswe na Akayezu Jean de Dieu
Kuya 17 Kanama 2019 saa 11:30
Yasuwe :
0 0

Umuyobozi wa Kaminuza ya INES Ruhengeri, Padiri Dr Hagenimana Fabien, yavuze ko gahunda ya leta yo guhanga imirimo itagerwaho urubyiruko rudatojwe uko rwashyira ibitekerezo byarwo mu ngiro.

Yabigarutseho ku wa 14 Kanama 2019, mu muhango wo gusoza amahugurwa ya Summer School, yahuje abanyeshuri n’abarimu baturutse mu bihugu icyenda byo hirya no hino ku Isi.

Barimo abanyeshuri 30, abarimu n’abakozi 10 bayobora ibigo bifasha abanyeshuri guhanga umurimo muri za Kaminuza muri Ghana, u Budage, u Rwanda na Tanzania. Izo Kaminuza zikaba zihuriye mu mushinga wa African German Entrepreneurship Academy (AGEA).

Harimo Kaminuza ya Leipzig yo mu Budage, Kaminuza y’Ikoranabuhanga ya Kwame Nkrumah yo muri Ghana, Université Libre des Pays des Grands Lacs de Goma, Kaminuza ya Mzumbe yo muri Tanzania na kaminuza 12 zo mu Rwanda zihuriye muri AGEA.

Aya mahugurwa yakorewe muri INES-Ruhengeri no mu Mujyi wa Kigali aho abanyeshuri bigishwaga bakanahana ibitekerezo ku buryo bwo kunoza imishinga no kwihangira umurimo.

Gahunda ya guverinoma y’imyaka irindwi iteganya ko hazashyirwa imbaraga mu guhanga imirimo itanga amafaranga nibura miliyoni n’igice kandi mbere ya 2024.

Padiri Dr Hagenimana Fabien yavuze ko iyi intego idashobora kugerwaho mu gihe urubyiruko rutabigizemo uruhare ari nayo mpamvu izi gahunda ziba zigamije kuruhugura ku kwihangira umurimo by’umwihariko abakiri mu mashuri.

Yagize ati “Ntibyagerwaho urubyiruko rudasobanukiwe uko umurimo uhangwa, benshi bagira igitekerezo kikabapfana ntibashobore gukomeza kuko batasobanukiwe neza ngo bagire ubumenyi buhagije.”

“Ubu turimo gutoza urubyiruko uburyo bwo gufata igitekerezo ukakinoza kikavamo umushinga, ukawunoza ejo ukavamo igikorwa, igikorwa kikagutunga kikanatunga abandi cyangwa igihugu.”

Yakomeje avuga ko iyi mishinga y’abanyeshuri batsinze bafashijwe guhura n’abafatanyabikorwa ngo imishinga yabo izajye ku isoko iteze imbere ba nyirayo n’igihugu muri rusange.

Mu gusoza aya mahugurwa hanatoranyijwe imishinga 10 yahize indi, itatu ya mbere ihabwa ibyemezo by’ishimwe n’amafaranga yo gushimira ba nyirayo.

Mu marushanwa yahuje aba banyeshuri, mu cyiciro cya mbere hatoranyijwe imishinga irindwi myiza na yo yaje gutoranywamo itatu yahize indi mu bwiza.

Uwa mbere ukaba warabaye G-Robot wa Nishimwe Gad wiga muri INES-Ruhengeri, wakoze imashini ikiri mu igeragezwa ikomatanyije ikoranabuhanga ry’imashini eshatu ubundi buri imwe ikora yonyine mu bijyanye no kubaka, gusiza no guterura ibiremereye hakoreshejwe amazi cyangwa amashanyarazi.

Uwa kabiri wabaye uwa Sebastian Koranteng wo muri Ghana ugamije gukora imodoka zikoresha Gaz “Hydrogene Car” mu kurwanya ihumana ry’ibidukikije.

Umushinga wa gatatu wabaye “Insektja” wa Maricruz Bermudez Serrano wo muri Costa Rica afatanyije na Valeria Clement Caicedo wo muri Colombia ugamije guca imirire mibi binyuze mu bworozi bw’udusimba dukungahaye ku ntungamubiri (protein) no kutwongerera agaciro.

Iyi mishinga yahawe ishimwe mu kuyifasha kuyinoza ndetse abatsinze bemererwa kuzitabira andi marushanwa azabera muri Ghana mu 2020 nta majonjora banyuzemo.

Abanyeshuri bafite imishinga yatsinze bavuze ko bungutse byinshi muri aya mahugurwa kandi biteguye kongera ubumenyi bahavanye ku bwo bari bafite mu kurushaho kunoza imishinga yabo.

Nishimwe Gad yavuze ko “Umuntu wari usanzwe yubaka yakoreshaga imashini iwe igacukura, indi igasiza, hakabaho n’izizamura amatafari cyangwa ibindi. Ariko iyi robot yo byose biri hamwe kandi yorohera buri wese bivuze ko waba ukoresha telefone cyangwa gukanda ahabugenewe igakora.”

Umunya- Costa Rica wiga muri Kaminuza ya Leipzig yo mu Budage, Maricruz Bermudez, yashimye amahugurwa bahawe avuga ko yungutse byinshi birimo kungurana “Ibitekerezo n’abayitabiriye baturutse hirya no hino ku Isi, twanigishijwe kunoza imishinga yacu.”

Aya mahugurwa ngarukamwaka ya Summer School yabaga ku nshuro ya gatatu, amaze kwitabirwa n’Abanyarwanda 30 baturuka muri Kaminuza zitandukanye zo mu Rwanda.

Abayobozi n'abarimu ba za kaminuza zo mu Budage, Ghana n'u Rwanda bitabiriye aya mahugurwa
Abitabiriye isozwa ry'amahugurwa ya AGEA bahawe umwanya wo gutanga ibitekerezo
Gad Nishimwe wiga muri INES Ruhengeri (hagati) ni we wahize abandi mu kugaragaza imishinga
Bamwe mu bayobozi n'abarimu ba Kaminuza zitandukanye bitabiriye isozwa ry'amahugurwa yatanzwe AGEA
Umuyobozi wa Kaminuza ya INES Ruhengeri, Padiri Dr Fabien Hagenimana, yavuze ko urubyiruko rukwiye kwigishwa uko rwihangira imirimo hakiri kare

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza