Umuyobozi wa AIF muri 40 bahembewe kugira ibikorwa bihindura imibereho y’abatuye Isi

Yanditswe na Evariste Nsengimana
Kuya 25 Nzeri 2019 saa 10:02
Yasuwe :
0 0

Umuyobozi w’uruganda Africa Improved Foods, AIF, rukorera mu Rwanda ifu izwi nka ‘Nootri’, Amar Ali, yaje mu bayobozi b’ibigo 40 ku Isi bahawe igihembo cy’abafite ibikorwa bijyanye n’ibyo abaturage bakeneye mu mwaka wa 2019.

Iki gihembo kizwi nka Schwab Foundation Award gitangwa n’umuryango Schwab Foundation for Social Entrepreneurship ubimazemo imyaka isaga 20, cyatangiwe i New York muri Leta Zunze Ubumwe za Amerika ku wa 23 Nzeri 2019.

Cyatanzwe mu byiciro birimo icy’abayobora n’abashinze ibigo bifasha mu gukemura ibibazo bibangamiye abaturage bo mu bihugu bikennye, icy’abayobozi batangije ibikoresho na serivisi bihangana n’ibibazo bibangamiye abaturage n’ibidukikije n’abayobozi ba Leta bagize uruhare mu kwinjiza muri politiki ingamba zigamije gukemura ibibazo bibangamiye abaturage.

Amar Ali yahawe igihembo mu cyiciro cy’abayobozi b’ibigo byahanze ibicuruzwa na serivisi bishya bifasha mu guhangana n’ibigo byugarije abaturage n’ibindukikije.

Yatoranyijwe guhabwa iki gihembo bitewe n’ikoranabuhanga uruganda Africa Improved Food ayobora rwifashisha mu gukora ifu ikungahaye ku ntungamubiri, rutunganya mu binyampeke rwaguze mu bahinzi baciriritse.

Muri icyo cyiciro harimo abandi bayobozi barindwi barimo Khalil Daoud uyobora LibanPost gifite umushinga wafashije impunzi zisaga ibihumbi 280, Pranav Kothari watangije gahunda yitwa LSEP, yafashije abanyeshuri basaga miliyoni ebyiri mu Buhinde n’abandi.

Umuyobozi wa Schwab Foundation for Social Entrepreneurship akaba ari nawe wayishinze, Hilde Schwab, yavuze ko abashoramari bakora ibikorwa bigamije gufasha abaturage batazongera gukorera mu muhezo.

Ati “Umuryango Schwab Foundation uha agaciro abahiga abandi atari abafite udushya mu bikorwa bifasha rubanda gusa ahubwo no mu bucuruzi, imiyoborere n’uburezi. Tubona ibikorwa bifasha abaturage nk’ahantu abasangiye icyerekezo bigaragariza.”

Umuyobozi ushinzwe abashoramari mu mishinga igamije gufasha abaturage muri Schwab Foundation for Social Entrepreneurship, François Bonnici, yavuze ko abahawe ibihembo bya 2019 batagaragaza gusa guharanira guhindura Isi ahubwo banagaragaza ko guhindura umuryango binyuze mu kwinjiza guhanga udushya muri Politiki, ibaruramari n’ubushakashatsi’.

Uruganda AIF rwashinzwe ku bufatanye bwa Leta y’u Rwanda n’Urugaga Mpuzamahanga rw’Ibigo by’imari birimo Icy’Abaholandi cyita ku Buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) n’Ishami rya Banki y’Isi ryita ku Ishoramari, IFC.

AIF yafunguye imiryango ku wa 31 Gicurasi 2017, ikora toni ibihumbi 45 by’ifu ku mwaka. Uru ruganda rukoresha abakozi barenga 300, mu gihe abahinzi rugurira umusaruro bo barenga ibihumbi 24. Intego yarwo ni ukugira uruhare mu kugabanya umubare w’abana bagwingiye bakava kuri 38% bakagera kuri 32% mu 2020.

Abayobozi b'ibigo 40 bahembewe kugira ibikorwa bihindura imibereho y’abatuye Isi
Umuyobozi wa AIF ubwo yahabwaga iki gihembo
Amar Ali, yaje mu bayobozi b’ibigo 40 ku Isi bahawe igihembo cy’abafite ibikorwa bijyanye n’ibyo abaturage bakeneye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza