Umuyobozi w’ibitaro bya Gakoma yatawe muri yombi akekwaho gutwara umugore w’abandi

Yanditswe na Thamimu Hakizimana
Kuya 12 Mutarama 2020 saa 10:18
Yasuwe :
0 0

Umuyobozi w’Ibitaro bya Gakoma biherereye mu Karere ka Gisagara, wanigeze kuyobora ibitaro by’Akarere ka Nyanza yatawe muri yombi akekwaho gutwara umugore w’abandi usanzwe ari umucungamutungo w’ibitaro bya Nyanza.

Mu gitondo cyo kuri uyu wa Gatandatu tariki ya 11 Mutarama 2020 nibwo uyu mugabo n’uyu mugore batawe muri yombi, aho bikekwa ko bari bamaze amezi atanu bibanira mu ibanga mu Mudugudu w’Irembo, Akagari ka Mumena, Umurenge wa Nyamirambo mu Karere ka Nyarugenge.

Amakuru agera ku IGIHE, avuga ko uyu mugabo yayoboraga ibitaro by’Akarere ka Nyanza nyuma aza kwimurirwa ku bitaro bya Gakoma mu Karere ka Gisagara kubera yavugwagaho gusambanyaga abakozi yayoboraga.

Uyu mugore usanzwe ari umucungamutungo w’ibitaro bya Nyanza bivugwa ko yataye umugabo bari bamaranye imyaka icyenda ariko babana batarasezeranye, banafitanye abana babiri, akisangira uwari umuyobozi we.

Uyu muyobozi w’Ibitaro bya Gakoma, bivugwa ko yataye umugore bashakanye byemewe n’amategeko ndetse ko bari bamaranye imyaka itanu banafitanye abana batatu barimo n’uruhinja rw’amezi atatu.

Iyi nkuru ikimara kuba kimomo, uwashakanye n’umuyobozi w’Ibitaro bya Gakoma byemewe n’amategeko yahise atanga ikirego mu Karere ka Huye aho bari batuye cy’uko uwo bashakanye yamuciye inyuma.

Uwo mugore yemereye IGIHE ko umugabo we yari yaramutaye anashimangira ko yatanze ikirego cy’uko yamuciye inyuma, nyuma y’aho afatanywe n’undi mugore.

Ati “ Mu rugo ntiyahabaga yazaga rimwe na rimwe nabwo ari imyenda aje gutwara imwe n’imwe ajyana, yajyanaga mike, ubwo rero abantu bamubaza ngo tubasure, ati akazi karantwaye. Nahoraga nibaza nti yagiye hehe? umugabo yagiye hehe? akavuga ngo njyewe mfite ubuzima bwiza ndimo nawe uzamenye ubuzima bwawe.”

Uwo mugore yavuze ko umugabo we atabaga mu rugo nk’uko bikwiye. Ati “ Yambwiraga ngo rwose njyewe ubuzima bwanjye hari umurongo mwiza nabuhaye menya ubwawe tumenyane abana, ni ibyo.”

Umugabo w’umucungamutungo w’ibitaro bya Nyanza, yabwiye IGIHE ko yababajwe akanatungurwa n’uko uwo muyobozi w’Ibitaro yamuhemukiye akamutwara umugore kandi yari yaramugabiye inka.

Ati “Yari inshuti yanjye mbere imiryango igenderanira, umugore wanjye aza kubona akazi muri ibyo bitaro yayoboragaho ariwe ukamuhaye, nza gushiduka nyuma baracuditse nyuma nshiduka baragambanye, arangije aramwimura sinzi uko byagenze aza kumutuza i Nyamirambo.”

Yasabye ubuyobozi kumufasha akajya abona abana be nka se nubwo uwo mugore babanaga batarasezeranye.

Umuvugizi wa Polisi mu Mujyi wa Kigali, CIP Umutesi Marie Goretti, yemereye IGIHE ko abo bakekwaho guta ingo zabo batawe muri yombi.

Ati “ Nibyo batawe muri yombi ibindi biracyakurikiranwa kuko bashyikirijwe RIB.”

Itegeko rishya riteganya ibyaha n’ibihano muri rusange mu Rwanda rivuga ko ubushoreke ari icyaha gihanishwa igifungo kitari munsi y’umwaka umwe ariko kitarenze itatu. Kibaho iyo umuntu abana nk’umugabo n’umugore n’uwo batashyingiranywe umwe muri bo cyangwa bombi bafite uwo bashyingiranywe.

Gukurikirana icyaha cy’ubushoreke n’icyo guta urugo ntibishobora kuba hatareze uwahemukiwe mu bashyingiranywe. Uwahemukiwe ashobora gusaba guhagarika ikurikirana ry’urubanza, aho rwaba rugeze hose, iyo yisubiyeho akareka ikirego cye.

Icyakora, iyo dosiye yarangije kuregerwa urukiko cyangwa gufatwaho icyemezo, kwisubiraho ntibihita bihagarika isuzumwa ry’urubanza cyangwa irangiza ryarwo. Umucamanza arabisuzuma akaba yabyemera cyangwa akabyanga akanasobanura impamvu.

Aha ni mu rugo umuyobozi ukekwaho gutwara umugore w'abandi babagamo i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza