Umuvugizi wa Louise Mushikiwabo yasubije umwanditsi uherutse kunenga amavugurura yakozwe muri OIF

Yanditswe na Evariste Nsengimana
Kuya 9 Mutarama 2020 saa 11:10
Yasuwe :
0 0

Umuvugizi w’Umunyamabanga Mukuru w’Umuryango w’Ibihugu bivuga Igifaransa (OIF), Oria K. Vande weghe, akaba n’umuyobozi ushinzwe Itumanaho muri uwo muryango yanyomoje ibihuha bikomeje gukwirakwizwa n’umwanditsi Isidore K. Ngembo, bisebya amavugurura n’imiyoborere bikomeje gukorwa na Louise Mushikiwabo.

Ku wa 2 Mutarama 2020 nibwo umwanditsi Isidore K. Ngembo yasohoye inyandiko isebya OIF n’umunyamabanga mukuru wayo, Louise Mushikiwabo, avuga ko imiyoborere yawo ntaho iwuganisha.

Iyi nyandiko y’uyu mwanditsi ifite umutwe ugira uti ‘Où va l’Organisation Internationale de la Francophonie? Ugenekereje mu Kinyarwanda yibazaga ngo ‘Umuryango Mpuzamahanga w’Ibihugu bivuga Igifaransa uragana he?’ yagiye apfundikanya ingingo asa n’udafitiye ibimenyetso bifatika agaragaza ko nta hazaza ufite.

Yifashishije inyandiko avuga ko yasohotse muri Jeune Afrique ku wa 26 Ukuboza ivuga ko Mushikiwabo yakuyeho abayobozi bayo bose bayoboranye na Michaëlle Jean yasimbuye, agamije gushyiraho itsinda rye mu buryo budakurikije amategeko, na wo awuhindurira imiyoborere mu nyungu ze bwite.

Ngembo yatanze ingero ko muri ayo mavugurura hari abayobozi ngo bagiye birukanwa abandi bakazamurwa mu ntera mu buryo bunyuranyije n’amategeko. Mu birukanwe yavuzemo umukozi wari uhagarariye OIF muri Afurika y’Iburengerazuba wirukanywe kubera imyitwarire mibi, ariko we avuga ko yahowe ko yari inshuti ya Michaëlle.

Ngembo yanavuze ko Umunya-Cameroun ufite ubwenegihugu bwa Canada wari ushinzwe ibya Politiki n’Imiyoborere yahawe guhagararira OIF muri Loni mu gihe Umubiligi wari muri uwo mwanya yazamuwe mu ntera naho ngo Umunyarwanda Oria K. Vande Weghe wari ushinzwe imbuga nkoranyambaga za Mushikiwabo yazamuwe mu ntera agashingwa kuyobora Ishami ry’Itumanaho rya OIF.

Uyu mwanditsi yavuze ko ayo mavugurura Mushikiwabo yakoze atanyuze mu mucyo.

Ati “Birumvikana gushyiraho ubuyobozi biri mu nshingano z’Umunyamabanga Mukuru ariko gushyira abayobozi mu nzego z’umuryango bigomba gukorwa bigendeye ku mategeko mpuzamahanga agenga abakozi b’uyu muryango.”

Yavuze ko iri tegeko rigenga uburyo abakozi ba OIF bajya mu kazi n’ibyo bahabwa rifite ingingo zigaragaza ko abanyamwuga bashyirwa mu kazi binyuze mu ipiganwa ryakozwe nibura nyuma y’ibyumweru bitatu hatanzwe ikizamini ariko we akaba yarashyizeho komite y’abajyanama agendeye ku bunararibonye, ubuhanga cyangwa amahugurwa bahawe mu gihe abayobozi b’amashami n’abo mu yindi myanya ya tekiniki hakoreshejwe uburyo busanzwe hatagombye gutangwa ubundi burenganzira ‘Ad hoc’.

Ngembo yanagarutse ku muyobozi muri OIF witwa Français Nicolas Groper weguye mu ntangiriro z’Ugushyingo aho Jeune Afrique yanditse ko ari ku mpamvu ze bwite n’iz’umuryango we ariko nyuma icyo kinyamakuru na bamwe mu bo bakoranaga bavuze ko mu miyoborere y’uwo muryango harimo ikibazo gikomeye.

Yavuze ko Nicolas Groper yabonye atabasha gukora yivangirwa mu kazi n’Umujyanama wa Mushikiwabo, akaba n’Umunyarwanda, Désiré Nyaruhirira, ngo kubera uburyo yari yizewe.

Ati “kugenda kwe bishobora kuba byaratewe ahanini n’ubwumvikane buke bwari hagati y’abo bagabo bombi.”

Uyu mwanditsi yavuze ko ikizababaza Michaëlle ari uburyo yatewe impungenge n’imiyoborere muri rusange y’uyu muryango ukomeje kujyanwa mu manga n’abashakaga imfunguzo zawo ku nyungu zabo bwite kandi nta mahirwe afite yo kuziyamamariza manda ikurikira nyamara we yari afite ubushake n’ubwitange bwo kuwuyobora mu mucyo.

-  Umwanditsi yatunze agatoki Inama izabera muri Tunisie

Inama ya 18 izahuza abakuru b’ibihugu na guverinoma z’ibihugu bikoresha Igifaransa, iba rimwe mu myaka ibiri aho isuzumirwamo icyerekezo cy’umuryango n’izindi ngingo ziwufitiye inyungu.

Uyu mwanditsi yavuze ko amakuru yizewe atangwa n’Abanya-Tunisie ari uko hagati yayo na OIF nta gikorwa mu bijyanye no kuyitegura ku buryo ngo ishobora no kutazaba.

Ati “Uyu munsi ijwi rya OIF risa n’iritumvikana cyane cyane kuri buri kimwe kijyanye na demokarasi n’uburenganzira bwa muntu. Ikibazo gikomeza kunzamo ni hehe Umuryango w’Ibihugu bikoresha Ururimi rw’Igifaransa ugana?”

Igisubizo Oria K. Vande weghe yamuhaye, gikubiye mu nyandiko ifite umutwe ugira uti ‘Vers une Francophonie de l’avenir’ ugenekereje mu Kinyarwanda yamusubije ko ugana ‘Mu cyerekezo cy’ahazaza h’umuryango wa OIF’.

Yavuze ko inyandiko ishingiye ku bihuha n’ibitekerezo bitari ukuri uyu mwanditsi Ngembo yakomeje gupfundikanya isebya Mushikiwabo yabikoze guhera atorewe kuyobora OIF.

Oria K. Vande weghe yavuze ko kuva Mushikiwabo yiyamamaza yagiye agaragaza imirongo migari yifuza kuganishamo OIF, irimo kunoza imiyoborere, imicungire no gukorera mu mucyo no gukomeza ubufatanye n’ibihugu binyamuryango mu mishinga itandukanye.

Mushikiwabo yasezeranyije gufasha uyu muryango kuwuzahura, akawufasha kuziba icyuho cy’amafaranga make mu isanduku yawo, aho imikorere yawo yari ikeneye kuvugururwa.

Ati “Icyihutirwa uyu munsi ni ukugaragaza inshingano za OIF mu rwego rwo kugera ku bikorwa no kwihutisha imishinga ifitiye umumaro abagenerwbikorwa.”

Iki gitekerezo gishyigikiwe n’ibihugu binyamuryango cyanagaragajwe mu nama y’uyu muryango iheruka kubera muri Monaco. Mu byo bashyigikiye harimo n’amavugurura Mushikiwabo aheruka gukora muri OIF.

Oria K. Vande weghe ati “Ni muri urwo rwego rero ibivugwa n’umwanditsi Ngembo bidafitiwe ibimenyetso ko hari abakozi bafite amasezerano y’akazi y’imyaka itatu ko yongerewe ari ibinyoma kandi ko ibyakozwe byakurikije amategeko agenga abakozi.”

Ku bijyanye n’ishyirwaho ry’abahagarariye amashami ya OIF, Oria K. Vande weghe, yavuze ko Ngembo nta makuru afite kuko inama iheruka kuba ariyo yemerejwemo ko Umunyamabanga Mukuru afite uburenganzira bwo gushyiraho abayobozi bahagarariye uwo muryango kugira ngo uzibe icyuho cy’aho wasangaga udahagarariwe.

Ku bijyanye n’aho umwanditsi Ngembo avuga ko uwari ukuriye Ibiro bishinzwe Akarere ka Afurika y’Uburengerazuba yirukanywe kubera ko yari inshuti ya Michaëlle, Oria K. Vande weghe yavuze ko byakozwe hashingiwe kuri raporo ya Komite Nyobozi yagaragaje amakosa y’imitwarire mibi itihanganirwa.

Ku muyobozi wari uhagarariye OIF muri Loni umwanditsi Ngembo yavuze ko yashimiwe ndetse akazamurwa mu ntera yagize ati “Ntiyashimiwe cyangwa ngo azamurwe mu ntera ahubwo yahinduriwe imirimo ashingwa Ishami ry’Ubukungu mu Biro bya OIF biri i Paris, bitari bifite ubishinzwe guhera mu 2017.”

Oria K. Vande weghe yavuze ko ibijyanye no gushyiraho abakozi Mushikiwabo aheruka gukora byanyujijwe mu nzira zikurikije amategeko agenga OIF kandi ko amatangazo y’akazi yashyizwe ahashoboka harimo ku rubuga rw’uyu muryango ruheruka kuvugururwa no ku mbuga nkoranyambaga.

Uru rubuga ruheruka kuvugururwa rushyirwaho uburyo abantu bashobora kwifashisha basaba akazi, aho rwashyizweho amatangazo y’akazi y’imyanya itatu ndetse OIF igaragaza ko no mu minsi mike hashyirwaho indi.

Ati “Mu gushyira akadomo ku mavugurura y’inzego z’imiyoborere ya OIF atakora wenyine ariko igamije kugera ku cyifuzo cy’ibihugu bikoresha Igifaransa, hejuru y’umuhate wa Mushikiwabo n’itsinda bakorana mu guhindura OIF umuryango ukorera mu mucyo, umwaka wa 2020 uhishe byinshi mu mateka y’umuryango uzaba wizihiza isabukuru y’imyaka 50.”

Yasobanuye ko muri iyi nama itegerejwe kubera muri Tunisie abakuru b’ibihugu na Guverinoma bazasuzumira hamwe ibimaze kugerwaho mu cyerekezo kigufi bihaye n’ahazaza h’umuryango.

Mushikiwabo yatangiye inshingano zo kuyobora OIF muri Mutarama 2019 nyuma yo gutorwa mu Ukwakira 2018 ashyigikiwe n’ibihugu bigize Umuryango wa Afurika Yunze Ubumwe.

Umuvugizi wa Louise Mushikiwabo yavuze ko mu gukora amavugurura mu bakozi ba OIF hashingiwe ku mategeko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .