Umushinga wa One Laptop Per Child umaze kugeza iki ku burezi bw’u Rwanda? (Video)

Yanditswe na Evariste Nsengimana
Kuya 27 Mutarama 2020 saa 07:56
Yasuwe :
0 0

Kugira ngo umwana yige neza kandi agire ubumenyi buzamufasha kugera ku mibereho myiza binyuze mu ikoranabuhanga, Guverinoma y’u Rwanda yashyizeho gahunda ya One Laptop Per Child, ijyaho yitezweho kuba inkingi mwikorezi mu kuganisha u Rwanda ku bukungu bushingiye ku bumenyi n’ikoranabuhanga rihereye mu mizi.

Ni umushinga umwaze imyaka irenga 11 kuko watangiye muri Kamena 2008 ugamije gutanga mudasobwa kuri buri mwana, intego zawo zari izo kugira u Rwanda igicumbi cy’ikoranabuhanga amahanga ashobora kwigiraho.

Ikigo cy’Igihugu cy’Uburezi, gifite mu nshingano gukurikirana gahunda zose zigamije guteza imbere uburezi mu Rwanda kigaragaza ko kuva uyu mushinga utangijwe hamaze gutangwa imashini zo mu bwoko bwa XO zingana na 274 073.

Uretse izo zimaze gutangwa ariko REB igaragaza ko hari n’izindi 1528 ziri mu bubiko zitegereje gushyikirizwa ibigo by’amashuri bidafite umubare w’imashini zihagije.

Nta mibare y’izifite ibibazo kuri iyi nshuro REB yagaragarije IGIHE ariko mu bihe byashize hakunze kumvikana ibibazo bitandukanye by’uko zibwa, izindi zikagira ibibazo bituma zisubizwa abatekinisiye ngo babisuzume.

Umwaka ushize Urwego rw’Igihugu rw’Ubugenzacyaha rwagaragazaga ko hari mudasobwa 939 zahawe ibigo by’amashuri zibwe mu 2018, zirimo 774 za Positivo, 107 zatanzwe muri ‘One Laptop Per Child’ n’izindi z’ubundi bwoko 58.

Kugera muri Werurwe 2018 habarurwaga mudasobwa 2667 zibwe gusa 973 muri zo zari zaragarujwe nyuma y’uko abahagarariye uwo mushinga basabye abayobozi b’uturere kubikurikirana. Icyo gihe iziri hagati ya 100 na 200 zapfaga buri mwaka ariko izitarangiritse bikabije zigakorwa zigasubira mu kazi.

Zimaze gutanga uwuhe musaruro?

Umuyobozi Mukuru wa REB, Dr Ndayambaje Irénée, yabwiye IGIHE ko umusaruro wa mbere umaze gutangwa n’iyi gahunda ari uko abanyeshuri batinyutse gukoresha ikoranabuhanga.

Ati “Umusaruro wa mbere ni uko mu by’ukuru abana bacu batinyutse ikoranabuhanga. Hari amarushanwa tugiye gutangiza, wabonye ko abana bacu bageze n’aho bakora porogaramu za mudasobwa, ugasanga mu by’ukuri hejuru yo kuvuga ngo arakoresha ikoranabuhanga, atekereza n’imishinga yaryifashishamo.”

Uretse ibyo Dr Ndayambaje yavuze ko iyi gahunda ari n’umusingi mwiza ufasha abanyeshuri bagiye mu mashuri yisumbuye kugira intangiriro y’ingenzi mu gukoresha mudasobwa n’izindi gahunda z’ikoranabuhanga.

Mu gushaka kumenya umusaruro w’ukuri iyi gahunda imaze gutanga, IGIHE yasuye Ishuri ribanza APPEK/Kamuhoza riherereye mu Karere ka Nyarugenge, rimwe mu mashuri amaze igihe abana biga ikoranabuhanga bifashishije izi mudasobwa bahawe, zigera ku 120.

Mu cyumba cy’ishuri kirimo izi mudasobwa twasanzemo abana bagera kuri 40 barimo kwiga gukoresha porogaramu ibafasha guca imbonerahamwe (Microsoft Excel), ubona bose bashishikaye, buri wese afite akamashini ke kandi ntawe urangaye.

Bari bakurikiye umwarimu ubigisha isomo ry’ikoranabuhanga, ababwiye icyo bagiye kugerageza kwinjizamo, nabo bakagishyiramo bashishikaye kandi ubona batajijinganya.

Hitimana Moise wiga mu mwaka wa gatanu yavuze ko hashize umwaka yiga gukoresha mudasobwa, amaze kugira ubumenyi bw’ibanze burimo kuyifungura no kuyifunga, kujya muri Porogamu ifasha kwandika, ibice biyigize bituma ikora n’ibindi.

Mugenzi we witwa Utamuriza Kenia yavuze ko mu gihe amaze yiga ikoranabuhanga amaze kumenya kwatsa mudasobwa akanayandikamo ibintu bitandukanye.

Umwarimu wigisha isomo ry’ikoranabuhanga kuri APPEK Kamuhoza, Kantetere Perusie, yavuze ko muri rusange abona abanyeshuri bagenda batera imbere mu gukoresha mudasobwa.

Ati “Mu busanzwe ubona abana bishimiye utu tumashini, ni naryo somo bakunda iyo babonye mudasobwa barishima cyane. Bamaze kumenya kwandika n’ibindi.”

Uyu murezi yavuze ko hakiri imbogamizi zo kutagira internet ku buryo hari icyo bakenera kuri murandasi byagorana kukigeraho.

Umuyobozi wa APPEK Kamuhoza, Rusanganwa Fidèle, yagize ati “Iyi gahunda imaze gutanga umusaruro munini cyane haba ku barimu no ku banyeshuri. Abarimu uretse n’abo bigisha ikoranabuhanga, bibafasha no kwigishirizaho andi masomo. Abana nabo uretse isomo ry’uwo munsi riba ryateguwe, banakoreraho ubushakashatsi bikabafasha gufunguka mu mutwe.”

Gusa ngo haracyakenewe amahugurwa menshi ku barimu yisumbuye ku yo REB isanzwe itanga no kwihutisha gahunda ya mudasobwa ku mwarimu kugira ngo zibafashe kwihugura ibyo bigisha. Gusa iki kigo kivuga ko cyagerageje kwishakamo ibisubizo, giteganya uburyo bwo guhugura abarimu inshuro imwe mu kwezi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza