00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwahagaritse burundu umushinga w’indangamuntu ikomatanyije

Yanditswe na IGIHE
Kuya 5 August 2022 saa 10:14
Yasuwe :

Ikigo cy’Igihugu gishinzwe indangamuntu (NIDA) cyatangaje ko umushinga wo gushyiraho indangamuntu ikomatanyije (Smart ID Card) wahagaritswe burundu bitewe n’uko hari ibyo amategeko atemera.

Iyo ndangamuntu ikomatanyije ku ikubitiro yari kuba irimo umwirondoro w’umuntu ni ukuvuga indangamuntu isanzwe. Hagombaga kuba harimo abagize umuryango, uruhushya rwo gutwara ibinyabiziga, urwandiko rw’abajya mu mahanga, ikarita y’ubwisungane mu kwivuza n’amakuru ajyanye n’abasoreshwa.

Iteka rya Minisitiri rigena imiterere yayo n’uburyo ishyirwaho, kuyitunga n’ikoreshwa ryayo ryasohotse mu igazeti ya leta tariki 13 Nzeri 2013.

Raporo y’umugenzuzi mukuru w’imari ya leta y’umwaka warangiye tariki 30 Kamena 2021, igaragaza ko mu 2015 haguzwe imashini ya miliyari 2,5Frw yo gufasha mu ishyirwa mu bikorwa ry’umushinga w’indangamuntu ikomatanyije kugeza ubu hakaba nta kirakorwa.

Umuyobozi w’ishami rishinzwe iby’indangamuntu n’itangwa ryazo muri NIDA, Manago Dieudonné, yabwiye Televiziyo y’Igihugu ko bitewe n’uko hari ibyo amategeko atemera, uyu mushinga wahagaritswe.

Ati “Uwo mushinga twawutekerejeho dusanga hari amategeko atugonga. Icya mbere ni uko twumvaga ngo twahuza ibyo bintu byose mu ikarita imwe, ariko twaje gusanga uruhushya rwo gutwara imodoka rugira amategeko yarwo yihariye hari ay’igihugu n’ayo ku rwego mpuzamahanga, pasiporo nayo ni uko igira amategeko ayigenga ari ay’igihugu na mpuzamahanga”.

Yakomeje agira ati “Twumvaga ko byashoboka ariko ugiye mu kubishyira mu bikorwa ugasanga bitashoboka”.

NIDA ivuga ko harimo gutekerezwa ikoreshwa ry’ikoranabuhanga rigezweho aho hazajya hafatwa ibikumwe byose by’umuntu kugira ngo amakuru akomeze kubikwa kandi yizewe.

NIDA ivuga ko bimwe mu bikoresho byaguzwe mu mushinga wahagaritswe bizifashishwa mu mushinga mushya w’ikoranabuhanga n’izindi gahunda z’akazi z’iki kigo nko gukora impushya za burundu zo gutwara ibinyabiziga, amakarita y’abanyamahanga n’ibindi.

Mu gihe kandi bisanzwe bimenyerewe ko indangamuntu isanzwe yishyurwa amafaranga y’u Rwanda 500, ikomatanyije yari kuba igura ibihumbi 15 Frw hagendewe ku bisabwa kugira ngo iboneke nk’udukoresho tudasanzwe dushyirwamo iyi myirondoro n’ibindi.

Mu Rwanda habarurwa abantu basaga gato miliyoni umunani bafite indangamuntu bavuye kuri miliyoni 5,2 bazihawe mu mwaka wa 2008 ubwo indangamuntu zikozwe mu mpapuro zakurwagaho.

Indangamuntu ikomatanyije ntigikozwe nk'uko byari biteganyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .