00:00:00 IGIHE NETWORK KN KINYARWANDA EN ENGLISH FR FRANCAIS

Umushinga BRITE wasojwe abasaga 4000 bafashijwe kunoza amasomo y’ikoranabuhanga

Yanditswe na Mukahirwa Diane
Kuya 16 Ukuboza 2022 saa 10:31
Yasuwe :

Abanyeshuri basaga ibihumbi bine biga mu mashuri y’imyuga n’ubumenyingiro, TVET na IPRC, bafashijwe kunoza amasomo yabo mu buryo bw’ikoranabuhanga binyuze mu mushinga ‘BRITE’.

BRITE (Building Reselience in TVET through E-learning) ni umushinga ugamije kubaka ireme mu mashuri yigisha ikoranabuhanga n’ubumenyingiro binyuze mu gutanga amasomo hifashishijwe ikoranabuhanga. Watangiye mu 2020 uterwa inkunga na Mastercard Foundation.

Mu myaka isaga ibiri uyu mushinga wari umaze watwaye 3 000 000$ ugera ku mashuri 20 ya TVET, na IPRC zose, hakaba harakozwe amasomo yo mu buryo bw’amajwi 100, akoreshwa ikoranabuhanga 30, ayo abanyeshuri bifashisha iyo bari kwigira mu kazi 14.

Uyu mushinga washyirwaga mu bikorwa n’Ikigo giteza imbere uburezi, EDC gifatanyije n’Urwego rw’Igihugu rushinzwe Amashuri y’Imyuga n’Ubumenyingiro, RTB, Ishuri Rikuru ry’Imyuga n’Ubumenyingiro, RP, ndetse n’ikigo Akazi Kanoze Access, mu gutanga amasomo atandukanye kandi ari ku rwego rwa buri munyeshuri.

Kuri uyu wa 15 Ukuboza 2022, Mastercard Foundation yashyikirije Minisiteri y’Uburezi ibyagezweho muri uyu mushinga, kuko wo wamaze guhagarara ariko ibyagezweho byo bizakomeza gukoreshwa.

Umuyobozi wa MasterCard Foundation mu Rwanda, Rica Rwigamba, yavuze ko uyu mushinga hari byinshi wagezeho byashyikirijwe Minisiteri bizakomeza kubyazwa umusaruro.

Ati “Uyu munsi twahaye Minisiteri ibyo twagezeho birimo amasomo yahanzwe, twamaze kubona ko ari ibintu bishoboka kanditwizeye ko ibyagezweho bigiye kubyazwa umusaruro.”

Umunyamabanga wa Leta muri Minisiteri y’Uburezi ushinzwe Ikoranabuhanga n’Amashuri y’Imyuga n’Ubumenyingiro, Irere Claudette, yashimye Mastercard kuba yarashyizeho uyu mushinga ndetse avuga ko wagize akamaro kandi uzakomeza kubyazwa umusaruro.

Ati “Uyu mushinga wagize uruhare rukomeye igihe Covid-19 yari itangiye amashuri menshi yafunze. Twari turimo gushaka uburyo twakomeza tugafasha abanyeshuri gukomeza kwiga.”

Yakomeje ati “Abiga mu masomo asanzwe hari ibyo bari bamaze igihe bakorerwa ariko abiga muri tekiniki byari bigoranye, twegereye Mastercard tuyisaba ubufasha ariko nayo bari batangiye gahunda yo gufasha abagizweho ingaruka na Covid-19.”

Umuyobozi wa EDC, Yedidya Senzeyi Aimée, yavuze ko hari byinshi bashyikirije Minisiteri byavuye muri uyu mushinga bizatuma ikoranabuhanga rikomeza kugerwaho muri TVET.

Ati “Ubundi umushinga iyo ufunze uba wafunze ariko kuko turebera hamwe n’abandi bafatanyabikorwa uko twahugura abarimu nabo bakaba bakomeza guhugura abandi, ibyo bituma ukomeza kubaho.”

Ku ruhande rwa bamwe mu banyeshuri bagezweho n’uyu mushinga bemeza ko hari byinshi wabagejejeho bakurikije uko bari basanzwe biga.

Turikumana Kevin yavuze ko hari byinshi bagezeho babikesha kwiga mu buryo bw’ikoranabuhanga.

Ati “Byaradufashije cyane kuko ubu turi kwiga dukoresheje ikoranabuhanga, tugafata ubumenyingiro tukabushyira mu ikoranabuhanga, wasangaga mbere hari ibintu umwarimu ataduhaga ariko ubu hari aho tujya tukabisangaho.”

BRITE yahuguye abarimu 374 hirya no hino mu gihugu aba nibo bagiye kwifashishwa mu gukomeza uyu mushinga.

Umuyobozi wa MasterCard Foundation mu Rwanda, Rica Rwigamba, yavuze ko uyu mushinga hari byinshi wagezeho byashyikirijwe Minisiteri bizakomeza kubyazwa umusaruro
Turikumana Kevin yavuze ko hari byinshi bagezeho babikesha kwiga mu buryo bw’ikoranabuhanga.
Umunyamabanga wa Leta muri Minisiteri y'Uburezi ushinzwe Ikoranabuhanga n'Amashuri y'Imyuga n'Ubumenyingiro, Irere Claudette, yashimye Mastercard kuba yarashyizeho uyu mushinga
Kuri uyu wa 15 Ukuboza 2022, Mastercard Foundation yashyikirije Minisiteri y’Uburezi ibyagezweho muri uyu mushinga, kuko wo wamaze guhagarara ariko ibyagezweho byo bizakomeza gukoreshwa.
Abanyeshuri basaga ibihumbi bine biga mu mashuri y’imyuga n’ubumenyingiro, TVET na IPRC, bafashijwe kunoza amasomo yabo mu buryo bw’ikoranabuhanga binyuze mu mushinga ‘BRITE’.

Amafoto: Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .