00:00:00 IGIHE NETWORK KN KINYARWANDA EN ENGLISH FR FRANCAIS

Umusaruro w’amafi wageze kuri toni ibihumbi 43 mu 2022

Yanditswe na IGIHE
Kuya 2 Mutarama 2023 saa 02:17
Yasuwe :

Umusaruro w’amafi mu Rwanda wariyongereye mu mwaka ushize wa 2022 aho wavuye kuri toni 41.664 ukagera kuri 43.560 nk’uko raporo ya Minisiteri y’Ubuhinzi n’Ubworozi ibigaragaza.

Uburobyi bw’amafi bukorerwa mu biyaga bigera kuri 17 n’imigezi ine mu turere 15 binyuze mu makoperative. Icyakora buracyakorwa mu buryo bwa gakondo.

Kugeza ubu abarobyi 3827 ni bo babarurwa mu gihugu aho bibumbiye mu makoperative 70.
U Rwanda rufite intego y’uko mu 2024 ruzaba rusarura toni 112 z’amafi buri mwaka nk’uko bikubiye muri gahunda ya kane y’impinduramatwara mu by’ubuhinzi (PSTA4).

Ubugenzuzi bwakorewe mu biyaga hagamijwe gukumira ibikorwa by’uburobyi bya magendu bwatahuye imitego irenga 11000 itemewe n’amategeko.

Muri iyi mitego harimo izwi nka Kaningini igera ku 6 790, ubwato 579, inzitiramibu 3937, ibikuruzo 462. Ba rushimusi b’amafi bagera ku 196 na bo barafashwe bashyikirizwa polisi ndetse n’igisirikare gikorera mu mazi.

Olivier Iyamuremye, ucuruza amafi ya sosiyete yitwa Hauge Aqua Rwanda yirora Tilapia mu Kiyaga cya Kivu, yabwiye Newtimes ko abantu barya amafi mu Rwanda bakiri bake nubwo n’ubworozi bwayo butaratera imbere. Yavuze ko hakenewe ko umusaruro w’amafi wiyongera ariko n’akamenyero ko kuyarya kakazamurwa.

Cynthia Umutesi ukorera sosiyete yitwa Fine Fish Ltd ikorera mu isoko rya Kimironko, na we yavuze ko amafi ataribwa na benshi mu Rwanda.

Yagize ati “Bamwe baracyaha agaciro amafi avuye mu mahanga nyamara dufite amafi meza bashobora gutegura ubwabo. Abenshi mu barya amafi ubasanga mu mijyi ugereranyije n’uko bimeze mu bice by’icyaro.”

Yavuze ko kuri ubu ikilo kimwe cy’amafi bakigurisha 3700 Frw. Umusaruro uramutse wiyongereye ngo byagabanya n’igiciro nk’uko Josiane Niyigena ucuruza amafi i Kabuga yabivuze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .