Umunyamategeko yitabaje Urukiko rw’Ikirenga asaba ko zimwe mu ngingo z’amategeko ahana ziteshwa agaciro

Yanditswe na Akayezu Jean de Dieu
Kuya 4 Ukuboza 2018 saa 11:59
Yasuwe :
0 0

Umunyamategeko Richard Mugisha yitabaje Urukiko rw’Ikirenga asaba ko zimwe mu ngingo z’igitabo gishya cy’amateko ahana ziteshwa agaciro, by’umwihariko izirebana n’icyaha cy’ubusambanyi, guta urugo no gukoza isoni abayobozi n’abashinzwe umutekano.

Kuri uyu wa Kabiri nibwo hatangiye kumwa uru rubanza, ku ngingo enye ziheruka kwemezwa mu gitabo cy’amategeko ahana ibyaha mu Rwanda, Mugisha asanga zinyuranye n’Itegeko Nshinga rugenderaho.

Uyu munyamategeko yari yunganiwe na Me Moïse Nkundabarashi na Me Florida Kabasinga. Bagaragaje ko ingingo zibangamye ari iya 136 ihana ubusambanyi; iya 138 ihana ubushoreke n’iya 139 ihana guta urugo, bavuga ko zibangamiye ubwiyunge bw’abagabo n’abagore.

Indi ni ingingo ya 233 ihana gukoza isoni mu magambo, mu bimenyetso cyangwa ibikangisho, inyandiko cyangwa ibishushanyo abayobozi n’abashinzwe umutekano igihe bakora uwo murimo, bavuga ko ibangamiye ubwisanzure bw’itangazamakuru.

Umunyamategeko uhagarariye Guverinoma mu rubanza, Speciose Kabibi, yabanje kuvuga ko Mugisha nta bubasha afite bwo gutanga iki kirego, amusaba kugaragaza niba hari itsinda ahagarariye mu rubanza ryaba iry’abanyamakuru cyangwa abanyamategeko.

Bitabaye ibyo, ngo yarabikoze nk’umuturage usanzwe, bityo akwiye kugaragaza inyungu afite muri uru rubanza.

Mugisha yasubije ko nk’umwenegihugu n’umunyamategeko w’umwuga, adashobora kurebera ku ngingo z’itegeko zinyuranye n’Itegeko nshinga. Yashimangiye ko afite inshingano zo gufasha kugira ngo hajyeho amategeko abereye abanyarwanda.

Ati “Rero nkaba numva kuvuga ko nta nyungu mfite muri uru rubanza nta shingiro bifite.”

Me Kabasinga umwunganira yavuze ko ahubwo umunyamategeko wa Leta yari akwiye kuba aburana ku ruhande rwabo, kuko uretse kuba izo ngingo zinyuranye n’itegeko nshinga, zinanyuranye n’amasezerano mpuzamahanga u Rwanda rwashyizeho umukono.

Me Kabibi yasubije ko Mugisha atari umunyamakuru ngo abe ari mu babangamiwe n’iri tegeko, ku buryo ngo niba ari ukuba umunyamategeko gusa yagendeyeho, kurega byari guca mu rugaga rw’abavoka. Ngo yareze nk’umuturage ariko ntiyagaragaza niba biri mu nyungu rusange.

Mugisha yasubije ko umunyamategeko wa Leta asa n’uwumva ko abangamiwe ku giti cye, nyamara umuryango ari ipfundo rya sosiyete, bityo ikibangamiye umwe kigera ku baturage muri rusange, kimwe no ku bwisanzure bw’itangazamakuru.

Perezida w’Urukiko Rw’Ikirenga, Prof Sam Rugege, wari uyoboye iburanisha, yavuze ko bitewe n’uburemere bw’iki kirego icyemezo kitahita gifatwa, cyane ko icyemezo kizafatwa kuri uru rubanza gishobora kuzagira ingaruka ku bindi byinshi biri imbere.

Yanzuye ko iburanisha risubikwa, icyemezo ku bubasha bwa Mugisha ku gutanga iki kirego kikazatangazwa ku wa 11 Mutarama 2019, saa tatu.

Kuki yahisemo izi ngingo?

Ingingo ya 136 ivuga ko umuntu washyingiwe ukorana imibonano mpuzabitsina n’uwo batashyingiranywe, iyo abihamijwe n’urukiko ahanishwa igifungo kitari munsi y’amezi atandatu ariko kitarenze umwaka umwe.

Gukurikiranwa ntibishobora kuba hatareze uwahemukiwe mu bashyingiranywe, ndetse ashobora gusaba guhagarika ikurikirana ry’urubanza, aho rwaba rugeze hose, iyo yisubiyeho.

Ingingo ya 138 yo ivuga ko umuntu ubana nk’umugabo n’umugore n’uwo batashyingiranywe, umwe muri bo cyangwa bombi bafite uwo bashyingiranywe, ahanishwa igifungo kirenze umwaka umwe ariko kitarenze imyaka ibiri.

Ingingo ya 139 yo ikavuga ko umwe mu bashyingiranywe uta urugo rwe mu gihe kirenze amezi abiri nta mpamvu zikomeye akihunza ibyo ategetswe, ahanishwa igifungo kitari munsi y’amezi atatu ariko kitarenze amezi atandatu. Ni nabyo bihano bihabwa umugabo utaye umugore we ku bushake, nta mpamvu ikomeye, mu gihe kirenze ukwezi kumwe kandi azi ko atwite.

Iya 233 yo ivuga ko umuntu wese ukoza isoni mu magambo, mu bimenyetso cyangwa ibikangisho, inyandiko cyangwa ibishushanyo, umwe mu bagize Inteko Ishinga Amategeko mu gihe akora umurimo yatorewe cyangwa biturutse kuri uwo murimo, umwe mu bagize Guverinoma, abashinzwe umutekano cyangwa undi wese ushinzwe umurimo rusange w’igihugu mu gihe akora umurimo ashinzwe cyangwa ari wo biturutseho, aba akoze icyaha.

Iyo abihamijwe n’urukiko, ahanishwa igifungo kitari munsi y’umwaka umwe ariko kitageze ku myaka ibiri n’ihazabu y’amafaranga y’u Rwanda atari munsi y’ibihumbi 500.000 Frw.

Mugisha avuga ko umuturage uwo ariwe wese afite inshingano zo kurinda Itegeko Nshinga, kandi akaba asanga izo ngingo zishobora kubangamira Itegeko Nshinga rya Repubulika y’u Rwanda, by’umwihariko mu ngingo ya 18.

Iyo ngingo ivuga ko ‘Umuryango, ari wo shingiro kamere ry’imbaga y’Abanyarwanda, urengerwa na Leta.’

Mugisha avuga ko ubusambanyi cyangwa guta urugo ari ibintu bibi, ariko gushakira igisubizo cyabyo mu itegeko rihana ibyaha, ari ibyo kurebwaho.

Yavuze ko kuba umwe mu bashakanye yahanishwa igifungo, bishobora gufunga izindi nzira z’ubwiyunge hagati ye n’uwo bashakanye.

Ati “Niba umwe afunzwe izo nshingano arazigeraho ate? Ni ibintu bibi byica amasezerano, birababaza ariko kubigira icyaha ngo umuntu abe yafungwa…”

Mugisha anavuga ko gusebanya binyuze mu nyandiko bishobora kubangamira ubwisanzure bw’itangazamakuru, igihe byaba bishyizwe mu gitabo cy’amategeko ahana.

Ati “Iyo ugeze ku byo gusebanya binyuze mu nyandiko cyangwa ibishushanyo, urareba ni ibintu bibi gusebanya, wasebya abayobozi cyangwa undi muntu. Amategeko y’itangazamakuru abivuga neza, ikindi nanone abayobozi bagomba kuba biteguye kuvugwa no kwisobanura.”

Umunyamategeko Richard Mugisha yari yunganiwe na Me Moïse Nkundabarashi na Me Florida Kabasinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza