Umunya-Uganda washinjwaga ibyaha byo kubangamira umutekano w’u Rwanda yasubijwe iwabo

Yanditswe na Musangwa Arthur
Kuya 15 Ugushyingo 2020 saa 05:32
Yasuwe :
0 0

Umuturage ukomoka muri Uganda, Charles Tusubira, kuri uyu wa Gatandatu yasubijwe mu gihugu cye n’Urwego rw’Abinjira n’Abasohoka, nyuma y’ibyaha yari akurikiranyweho bijyanye no kubangamira umutekano w’igihugu.

Amakuru avuga ko Tusubira wari ufite ubucuruzi bujyanye no kwamamaza ibikorwa bitandukanye binyuze mu Kigo Kleenville Media Ltd., yabanje gutabwa muri yombi ku wa 27 Ukwakira, afatirwa ku Kicukiro akurikiranyweho ibyaha bijyanye no kubangamira umutekano w’igihugu nk’uko ikinyamakuru Virunga Post cyabitangaje.

Amakuru avuga ko uyu Munya-Uganda yafashwe abanje kwerekwa inyandiko itegeka ko atabwa muri yombi, ndetse anamenyeshwa impamvu zatumye afatwa nubwo nta byinshi byatangajwe ku byaha akekwaho.

Ni igikorwa cyakozwe mu nzira zikurikije amategeko, bitandukanye n’uko byakomeje kugendekera Abanyarwanda benshi bakomeje gufatirwa muri Uganda bagakorerwa iyicarubozo.

Nyamara ibinyamakuru byo muri Uganda byihutiye kuvuga ko yajyanywe n’abantu bamufungiye ahantu hatazwi ndetse ko yafashwe bitewe n’uko ubuyobozi bw’u Rwanda bushaka kwigarurira ibikorwa bye ndetse ko yanze gufata ubwenegihugu bw’u Rwanda, bigasaba Leta y’icyo gihugu kugira icyo ikora ngo Tusubira arekurwe.

Amakuru iki kinyamakuru cyabonye ariko yemeza ko uwo mugabo w’imyaka 39 yafashwe mu buryo bwemewe ndetse umugore we yemerewe kumusura aho yari afungiwe, baravugana, kandi yasanze ameze neza.

Uwatanze amakuru yakomeje ati “Yari ameze neza ubwo yafatwaga kugira ngo afashe mu iperereza.”

U Rwanda kandi rwahise rumenyesha Ambasade ya Uganda i Kigali ko Tusubira yatawe muri yombi kubera ibyaha bikomeye bibangamiye umutekano w’igihugu.

Umwe mu bakurikiraniye hafi iki kibazo, yavuze ko ibinyamakuru byo muri Uganda bitigeze bikenera kumenya ukuri, kuko hari Abanya-Uganda bafite ibikorwa bikomeye by’ubucuruzi mu Rwanda kandi batengamaye.

Ati “Hari Abanya-Uganda bafite ubucuruzi bunini bwo gukwirakwiza inzoga, abandi bari mu ikoranabuhanga, abandi bari mu bikorwa binyuranye by’ubucuruzi.”

Umwe mu bayobozi utashatse ko amazina ye atangazwa yemeje ko “Umunya-Uganda wese ugendera ku mategeko, kimwe n’abafite ubundi bwenegihugu, atazigera na rimwe agirira ikibazo mu Rwanda.”

Tusubira yakuwe ku butaka bw’u Rwanda mu buryo bwemewe n’amategeko ndetse ashyikirizwa ubuyobozi bwa Uganda binyuze mu nzira zemewe, anafite ibyangombwa byose.

Ni mu gihe u Rwanda rwakomeje gushinja Uganda ko abaturage barwo bafatiwe muri icyo gihugu bafungwa mu nzira zitemewe n’amategeko, bamwe bagakorerwa iyicarubozo n’abarekuwe bakajugunywa ku mupaka aho kunyuzwa mu nzira zemewe.

Tusubira ubwo yaganiraga n'abanyamakuru mu Rwanda mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .