Umuntu utinyuka kurebesha umwana “amaso mpuzabitsina” akwiye kubona amapingu n’i Mageragere-RIB

Yanditswe na Evariste Nsengimana
Kuya 20 Ugushyingo 2019 saa 08:54
Yasuwe :
0 0

Umuyobozi Mukuru wungirije w’Urwego rw’Igihugu rw’Ubugenzacyaha (RIB), Kalihangabo Isabelle, yaburiye abagabo n’abasore bareba abangavu bagatekereza kubasambanya ko ayo maso nta handi abarebesha uretse amapingu azabambika bakaruhukira muri Gereza ya Nyarugenge iherereye i Mageragere.

Ni ubutumwa yagarutseho ubwo yari mu nama nyunguranabitekerezo ku ruhare rw’umugabo mu kurwanya isambanywa ry’abana yateraniye i Kigali ku wa 19 Ugushyingo 2019.

Minisiteri y’Ubuzima n’iy’Uburinganire n’Iterambere ry’Umuryango zigaragaza ko kuva mu 2016 kugeza muri Kanama 2019, abangavu basaga ibihumbi 70 basambanyijwe banaterwa inda.

Imibare y’Ubushinjacyaha bw’u Rwanda igaragaza ko mu mwaka wa 2018/19, abagabo bakekwagaho ibyaha byo gusambanya abangavu byari 3320, mu 2017/18 bari 2926 naho mu wawubanjirije bari 2030.

Mu manza 1673 zashyikirijwe Inkiko mu 2018/19 hahanwe abantu 1222. Mu manza 1480 zashyirijwe inkiko mu 2017/18, abahanwe ni 1168 mu gihe mu mwaka wawubanjirije haburanishijwe imanza 1355 zisiga abantu 1109 ari bo bahanwe gusa.

Kalihangabo yavuze ko “Urwego rw’ubugenzacyaha ntiruzihanganira na rimwe ibi byaha [By’abasambanya abana], ikindi ni ugusaba abagabo gushishikariza abantu bose kumenya ko iki cyaha gikomeye kandi abagihishira n’abahoza ku nkeke abagikorewe bateganyirijwe ibihano.”

Yavuze ko ikindi yasaba by’umwihariko abagabo n’abasore ari ukwirinda kureba abana n’abangavu bakababonamo kubakoresha imibonano mpuzabitsina.

Ati “Nabasaba kwirinda kurebesha abana icyo nita amaso mpuzabitsina. Abana ni abo kurera si abo kwangiza. N’umuntu wese watinyuka kurebesha umwana wese amaso mpuzabitsina, akwiye kubona amapingu, akwiye kubona Mageragere [Gereza ya Nyarugenge], akwiye kubona imiryango ye isigaye iri mu bibazo.”

Itegeko ryateganyije ko gusambanya umwana uri munsi y’imyaka 18 bihanishwa igifungo kitari munsi y’imyaka 20 ariko kitarenze imyaka 25.

Iyo byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa naho iyo byamuteye indwara idakira cyangwa ubumuga, igihano kiba igifungo cya burundu. Iyo byakurikiwe no kubana nk’umugabo n’umugore, igihano kiba igifungo cya burundu.

Umuyobozi Mukuru wungirije w’Urwego rw’Igihugu rw’Ubugenzacyaha (RIB), Kalihangabo Isabelle, yaburiye abagabo bararikira gusambanya abana
Umuhuzabikorwa w'Imishinga y'Impuzamiryango y'Uburenganzira bwa Muntu (CLADHO), Murwanashyaka Evariste arimo gutanga igitekerezo muri iyi nama
Abitabiriye iyi nama bavuze ko imibare y'abana baterwa inda iteye inkeke

Amafoto Dushimimana: Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza