00:00:00 IGIHE NETWORK KN KINYARWANDA EN ENGLISH FR FRANCAIS

Umuntu umwe mu Rwanda yasabye abaganga kutikingiza Covid-19; byagenze bite?

Yanditswe na Philbert Girinema
Kuya 16 January 2022 saa 06:11
Yasuwe :

Mu myaka ibiri ishize, birashoboka ko inkingo za Covid-19 ari kimwe mu bintu byazengurutswe n’ibihuha karundura. Birashoboka ko ushobora kuba warabonye ku mbuga nkoranyambaga imitwe y’inkuru igira iti “Impfu zitewe n’urukingo rwa COVID-19 zarenze ibihumbi 6”, cyangwa se undi ugira uti “Impfu zitewe n’urukingo rwa Covid-19 ziyongereye 6000% mu gihembwe cya mbere cya 2021 ugereranyije no mu cya mbere 2020”. Ukibona iyo mitwe y’inkuru, ubanza kwitsa umutima.

Mu minsi yashize, urukingo rwa AstraZeneca rwinubiwe cyane aho byavugwaga ko rutera ibibazo ku buryo amaraso y’uruhawe yipfundika akaba yapfa. Byatumye mu bihugu bimwe na bimwe rwamaganwa, gusa nyuma ubushakashatsi buza kugaragaza ko ibyakekwaga atari ukuri.

Hari umugore wo mu Bwongereza wapfuye nyuma yo guhabwa urukingo. Icyo gihe iperereza ryaje kugaragaza ko yari afite ubundi burwayi ku buryo yihutiye kujya kwa muganga ataka ingaruka z’urukingo ahubwo akaza kwicwa n’indwara z’igifu yavuwe nabi.

Izo ndwara zatumye amaraso ye yipfundika, hashize iminsi 16 amaze gukingirwa arapfa.

Umuntu umaze gukingirwa, ashobora kugira ibimenyetso bitari bisanzwe, ku buryo yababara umutwe, akagira intege nke ariko iyo agiye kwa muganga ahabwa ibinini bimworohereza.

Ntabwo urukingo ruravugwa ko ari rubi ku mugore utwite ahubwo ashishikarizwa kwikingiza hakiri kare kugira ngo arinde umwana we. Mu minsi ishize, Canada yari iri kugaragaza ko ifite ikibazo cy’impinja ziri kwandura Covid-19 kubera ko ababyeyi bazo batikingije.

Nubwo bimeze bityo ariko, hari abantu imiti runaka ishobora kugwa nabi ku buryo batayihabwa. No ku rukingo naho ni uko bimeze, hari abo abaganga bashobora kwemeza ko batagomba kuruhabwa.

Mu Rwanda, hari umuntu umwe wasabye kudakingirwa

Hari umuntu uri gukurikiranwa mu Rwanda n’inzego z’ubuzima kugira ngo zirebe niba umubiri we koko ushobora kugira ibibazo mu gihe yaba atewe urukingo.

Ubusanzwe, hari umuntu ugira “allergie” ku buryo iyo anyoye ikinini runaka, kimugwa nabi. Urugero ashobora gufuruta umubiri we wose, akabyimba nk’amaguru cyangwa se intoki. Abaganga bahitamo kutamuha uwo muti kugira ngo utamugiraho izo ngaruka.

N’iyo bawumuhaye uwo muti cyangwa se urwo rukingo, biba ngombwa ko banamuha undi muti ucubya ubukana bwa wa wundi wa mbere washobora kumutera ibibazo.

Ingero z’imiti ikunze kugaragara cyane yateye abantu ibibazo ni pénicilline ikoreshwa mu kuvura uburwayi buba bwatewe na microbe. Hari inshinge ziba zigizwe n’uwo muti ku buryo uziteye umuntu ashobora gupfa ako kanya.

Umunyamabanga wa Leta muri Minisiteri y’Ubuzima, Dr Mpunga Tharcisse, yabwiye IGIHE ko bisaba abaganga gupima uwo muntu bakemeza ko umubiri we udakorana n’umuti runaka cyangwa se n’urukingo.

Ati “Kugira ngo ube wamuha uwo muti, bisaba kuba ufite antidote zawo. Mu Rwanda, maze kubona umwe bigaragara ko ashobora kuba afite iyo allergie, turacyamukurikirana ngo tumupime turebe uko bizagenda ariko kugeza ubu ntabo turabona bagaragaza icyo kibazo mu bantu tumaze gukingira.”

Yasobanuye ko kugira ngo bamenye ikibazo cy’uwo muntu, ari uko yegereye abaganga akabamenyesha ko asanzwe afite “allergie” ku yindi miti.

Ati “Icyo turi kugenzura ni ukureba niba ashobora no kugira “allergie” kuri uru rukingo. Ntabwo abaganga turabyemeza.”

Mu Rwanda abantu bagera kuri miliyoni umunani bamaze guhabwa urukingo rwa mbere. Dr Mpunga asobanura ko nta n’umwe uragaragaza ibimenyetso by’uko urwo rukingo rushobora kumugiraho ibibazo.

Ati “N’ababigize ni ibintu bisanzwe, wenda yagize umutwe, arababaye. Hari ubwoba, ugasanga bituye hasi, ariko byagaragaye cyane ku bana babaga bashonje ariko ni ibintu byamaraga igihe gito.”

Agira inama abantu banga kwikingiza bitwaje impamvu z’uko imibiri yabo idakorana n’urukingo, ko ibyo atari byo ahubwo nubwo umuntu yaba afite ikibazo nk’icyo byemezwa na muganga akamuha n’izindi nama zo kugenderaho.

Ati “Icyo gihe ntabwo umuntu yavuga ngo afite impamvu zimwemerera z’ubuzima kandi muganga atabyemeje. Yabibwirwa n’iki se? Muganga ni we wenyine wabyemeza.”

Guverinoma y’u Rwanda yihaye intego yo gukingira abantu miliyoni 1,6 mu minsi 15, batabonye dose ya mbere n’iya kabiri y’urukingo. Igihugu gifite intego ko miliyoni 9,1 bangana na 70% by’Abanyarwanda bazaba bamaze gukingirwa bitarenze Nyakanga 2022. Hari n’icyizere ko uwo mubare ushobora kugerwaho mbere.

Ubushakashatsi bumaze kugaragaza ko nta kibazo kidasanzwe urukingo rwa Covid-19 rutera uruhawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .