Umunsi intumwa zihariye za Perezida Mitterrand zoherejwe gushyigikira politiki ya Jenoside ya Habyarimana

Yanditswe na Dr Bizimana Jean Damascène
Kuya 10 Gashyantare 2020 saa 09:04
Yasuwe :
0 0

Guhera tariki ya 01 Mutarama 2020, Komisiyo y’Igihugu yo kurwanya Jenoside (CNLG), igeza ku banyarwanda bimwe mu bikorwa byaranze umugambi wa Jenoside yakorewe Abatutsi muri 1994.

Kuri iyi nshuro, CNLG yagaragaje ibikorwa byabaye ku matariki ya 09-15 Gashyantare 1991-1994. Muri ibi bikorwa harimo uko intumwa z’uwari Perezida w’u Bufaransa, Mitterrand, zoherejwe mu Rwanda gushyigikira politiki ya jenoside ya Perezida Habyarimana.

Ibikorwa byibasiye abanyamakuru batangazaga amakuru ku ruhare rw’Abafaransa barwanaga ku ruhande rw’ingabo z’u Rwanda

Tariki ya 09 Gashyantare 1993, hasohotse nimero ya 04 y’ikinyamakuru Le Flambeau cy’abataravugaga rumwe na Leta y’icyo gihe yasobanuraga, ishingiye ku mafoto, ko ingabo z’Abafaransa zari mu ntambara ku ruhande rw’Ingabo z’u Rwanda zirwanya FPR-Inkotanyi.

Ku gicamunsi cyo kuri uwo munsi, umujandarume w’Umufaransa, Major Corriere, akaba yarakoraga muri serivisi z’ubugenzacyaha muri jandarumori y’u Rwanda, yagiye kuri biro by’ubwanditsi bw’icyo kinyamakuru, gutera ubwoba abanyamakuru, abategeka kuvuga ababahaye ayo makuru, n’amafoto yerekana abasirikari b’Abafaransa barwanaga ku ruhande rw’ingabo z’u Rwanda.

U Bufaransa bwari bwarohereje mu Rwanda abajandarume babwo hagati ya 1992-1993 gukoresha ikoranabuhanga bakora urutonde rw’abo bitaga ibyitso, n’ubwoko bwabo, bakaba barayoborwaga na Colonel Michel Robardey. Ayo malisiti yarakoreshejwe cyane mu gihe cya Jenoside muri 1994.

Umwanditsi mukuru w’iki kinyamakuru, Rangira Adrien, yahise atabaza ingabo z’Umuryango w’Ubumwe bw’Afurika (AUO), zitwaga GOMN (Groupe d’Observateurs Militaires Neutres), zihageze zumvisha Majoro Corriere ko agomba kureka abanyamakuru bagakora akazi kabo mu bwigenge no mu bwisanzure.

Ntibyarangiriye aha, uyu mufaransa yagiye kotsa igitutu inzu itunganya amafoto yitwa Photolab, atoranyamo abakozi b’Abatutsi babiri, Rudasingwa Japhet na Byukusenge Anne Marie bahakoraga abashinja ko ari bo batanze ayo mafoto.

Abo bakozi barafashwe bajyanwa ahitwaga “Criminologie”, barakubitwa, bakorerwa n’ibindi bikorwa by’iyicarubuzo, bahavanwa n’uko abo mu miryango yabo batabaje Umuryango utabara imbabare (ICRC) uza kubakurayo.

U Bufaransa bwongereye inkunga mu mirwano yo gushyigikira ingabo za Leta ya Habyarimana

Guhera muri 1990, Ingabo z’Abafaransa zarwanye ku mugaragro ku ruhande rw’ingabo za Habyarimana zicaga abasivili batagize aho bahurira n’intambara. Bose baziraga ko ari Abatutsi.

Tariki ya 09 Gashyantare 1993 U Bufaransa bwohereje mu Rwanda abasirikari baturutse muri Kompanyi ya 4 ya batayo ya 21 yitwa RIMa (21e Régiment d’Infanterie de Marine) gufasha ingabo za Habyarimana mu ntambara zarwanaga na FPR Inkotanyi.

Ku munsi wakurikiyeho, tariki ya 10 Gashyantare 1993, mu Ruhengeri hatangiye icyiswe Opération Volcan y’ingabo z’u Bufaransa mu guha inkunga Leta y’u Rwanda. Iyo Operation yari iyobowe na lieutenant-colonel Baré, hacyurwa abanyamahanga 67 barimo Abanyamerika n’Abanyaburayi bari muri uyu mujyi wa Ruhengeri.

Muri iyo minsi, FPR yasabye ko imirwano ihagarara, Minisitiri w’ingabo z’u Rwanda James Gasana arabyanga yitwaje ubwo bufasha u Rwanda rwahabwaga n’ingabo z’u Bufaransa. Abatutsi bakomeje kwicwa urusorongo muri Perefegitura zo mu Majyaruguru y’u Rwanda, Gisenyi, Ruhengeri n’igice cya Byumba.

Guhera tariki ya 10 Gashyantare 1993 hishwe Abatutsi barenga 60 muri Komini ya Ngarama muri Byumba, intumbi zisigara zanitse ku gasozi zidashyinguwe. Tariki ya 26/3/1993, abanyamakuru n’abandi bantu baturutse mu miryango iharanira kurengera uburenganzira bwa muntu barahasuye, basanga iyo mirambo itarashyingurwa, abaturage baho bari kuri za bariyeri bafite intwaro.

Banzuye ko ubwo bwicanyi bwakozwe n’abari ku ruhande rwa leta ya Habyarimana, banyomoza ibyo radiyo Rwanda yari yakwirakwije ko bwakozwe na FPR.

Intumwa zihariye za Perezida Mitterrand zoherejwe mu Rwanda gushyigikira politiki ya jenoside ya Perezida Habyarimana

Tariki ya 12/2/1993, Perezida w’u Bufaransa, François Mitterrand yohereje mu Rwanda intumwa ze zihariye ebyiri, Bruno Delaye na Jean-Marc Rochereau de la Sabliere. Bruno Delaye yari Umujyanama wa Perezida Mitterrand ku birebana na Afurika.

Icyagenzaga izo ntumwa za Mitterrand ngo kwari uguhuza Perezida Juvenal Habyarimana na Minisitiri w’Intebe Disimasi Nsengiyaremye batavugaga rumwe ku bijyanye no guhagarika intambara n’ibikorwa by’ubwicanyi byakorwaga n’abasirikari n’abayoboke ba MRND.

Mitterrand n’abajyanama be kandi bumvishaga Habyarimana ko u Bufaransa bushyigikiye Leta ye, ko butazayitererana mu rwego rwo kugumana ijambo mu Karere.

Ni muri urwo rwego, Bruno Delaye yanditse inyandiko igenewe Perezida Mitterrand tariki ya 15 Gashyantare 1993, avuga ko ahangayikishijwe n’uko FPR ishobora gufata Kigali kubera ko yari ishyigikiwe na bimwe mu bihugu bivuga Icyongereza. Kubera iyo mpamvu, Delaye yavugaga ko uburyo bwo gushyigikira Habyarimana bwagombaga guhinduka, u Bufaransa bukerura bukarwana, hagatangwa imbunda n’ibindi bikoresho by’intambara.

Izo nyandiko zose z’ibinyoma zashakaga gusobanura impamvu u Bufaransa bwagombaga kwinjira mu ntambara ku buryo butaziguye no gukomeza guha intwaro n’ibikoresho ingabo za Habyarimana.

Muri uwo murongo wo gusobanura impamvu u Bufaransa bwagombaga gushyigikira Habyarimana, Jenerali Christian Quesnot yandikiye Perezida Mitterrand mu magambo avuga ko asanga intambara itari hagati ya FPR Inkotanyi n’ingabo z’u Rwanda, ahubwo ko ari Uganda yateye u Rwanda.

Bishatse kuvuga ko ari igihugu cyateye ikindi, ko u Rwanda rugomba gutabarwa kuko ari igihugu kivuga igifaransa cyatewe n’ikivuga icyongereza; bityo kubera ubucuti bwari hagati y’u Rwanda n’Ubufransa, ubufasha busesuye bwa gisilikare, politiki na diplomasi bikaba byaragombaga guhabwa u Rwanda.

Tariki ya 15/2/1993, Ingabo z’Umuryango w’Ubumwe bw’Afurika (GOMN) zamenyesheje uwo muryango ko abasirikari b’Abafaransa barwanye ku ruhande rwa Leta ya Habyarimana bakohereza ibisasu ku birindiro by’ingabo za FPR.

U Bubiligi bwamenyesheje Umuryango w’Abibumbye ko ubutegetsi bw’u Rwanda buteganya ubwicanyi ndengakamere bunasaba ko MINUAR irushaho gucunga umutekano

Tariki 11/02/1994, Minisitiri w’ububanyi n’amahanga w’u Bubiligi, Willy Claes yatangarije Umunyamabanga mukuru w’Umuryango w’Abibumbye, Boutros-Boutros Ghali ko abategetsi bakuru b’u Rwanda bamwemereye ko mu Rwanda hari ibibazo bya politiki byatumaga inzego z’inzibacyuho zateganywaga n’amasezerano y’amahoro y’Arusha zitajyaho, ko kandi kudashyiraho izi nzego bizatera ubwicanyi buremereye mu gihugu.

Minisitiri Willy Claes yasabye Boutros-Boutros Ghali kubwira intumwa yari ihagarariye Umuryango w’Abibumbye mu Rwanda, Jacques Roger Booh-Booh, gusaba ingabo za MINUAR kongera imicungire y’umutekano ku baturage.

Tariki 14/02/1994, Ambasaderi w’u Bubiligi mu Muryango w’Abibumbye yamenyesheje ko Ubunyamabanga bukuru bw’Umuryango w’Abibumbye butakiriye neza inama yatanzwe n’u Bubiligi ngo kubera ko Jenerali Dallaire atari yongeye gusaba muri iyo minsi ko MINUAR yiongererwa ubushobozi nkuko yari yarabisabye mbere.

Umuryango w’Abibumbye wongeyeho ko ubutegetsi bw’u Rwanda bugaragaza ubushake bwiza kuko ngo bwari bwemeye ko Jenerali Dallaire yafatanya nabwo mu gusaka no gufata intwaro zari mu Nterahamwe. Nyamara ibyo byari amagambo gusa kuko nta ntwaro zigeze zisakwa mu Nterahamwe ngo zifatirwe n’ubutegetsi bw’u Rwanda cyangwa se na MINUAR.

Ikinyamakuru Kangura cyerekanye bumwe mu buryo Jenoside izakorwamo

Ikinyamakuru Kangura cyo mu kwezi kwa Gashyantare 1994 cyasohoye igishushanyo kigaragaza Minisitiri w’Intebe Agata Uwilingiyimana na Minisitiri w’imari Marc Rugenera bashyizwe mu gishushanyo kibagereranya n’imbeba. Bombi bari bibasiwe kubera ko bari mu mashyaka ya MDR na PSD mu gice kitari icya Hutu Power cy’intagondwa z’Abahutu zari mu mugambi wa Jenoside.

Icyo gishushanyo kandi cyerekanaga umugabo wari witeguye gukubita abo bayobozi bombi akoresheje ubuhiri burimo imisumari bitaga Ntampongano y’umwanzi, avuga ko nta mpuhwe abanzi bagomba kugirirwa. Ntampongano y’umwanzi ni kimwe mu bikoresho byifashishijwe cyane n’abicanyi mu kwica urubozo abakorerwaga Jenoside.

Umunyamabanga Nshingwabikorwa wa CNLG, Dr Bizimana Jean-Damascène, avuga ko umugambi wa Jenoside wagize ingufu mu ntangiriro z’umwaka wa 1993, ugaragarira mu bikorwa by’ubwicanyi bwakorerwaga Abatutsi hirya no hino mu gihugu.

Avuga ko uwo mugambi washyigikiwe bikomeye n’ingabo z’Abafaransa zarwanaga ku ruhande rwa Leta ya Habyarimana, ari nabyo byatumaga ingabo z’U Rwanda zirara mu baturage zikabica, no kudaha agaciro imishyikirano no kutubahiriza guhagarika intambara. Ingabo z’Umuryango w’Ubumwe bw’Afurika ntizahwemye kubigaragaza no kubyamagana, ariko ntacyo byatanze.

Uruhare rw'u Bufaransa muri Jenoside yakorewe Abatutsi ntirwahwemye kugarukwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .