Umujyi wa Kigali washyikirije ibiribwa abaturage bagizweho ingaruka na Covid-19

Yanditswe na Mukahirwa Diane
Kuya 23 Mutarama 2021 saa 08:38
Yasuwe :
0 0

Abaturage batandukanye bo mu Mujyi wa Kigali baryaga ari uko bakoze, batangiye gufashwa kubona amafunguro muri ibi bihe bategetswe kuguma mu rugo nk’imwe mu ngamba zo gukumira ikwirakwira ry’icyorezo cya Coronavirus.

Iki gihe cya guma mu rugo cyatumye imirimo ihagarara usibye zimwe muri serivisi za ngombwa. Uku gutakaza imirimo ni ikibazo kuri bamwe kuko usanga hari abaturage bajya gukora ku munsi ayo bakoreye akaba ariyo bakuramo amafunguro y’imiryango yabo.

Biganjemo abakora ubuyede, ubufundi, abakora mu binamba, abakarani, abamotari, abanyozi ndetse n’abandi usanga barya ari uko bakoze, nubwo hari ho gahunda ya guma. Leta yafashe gahunda yo kubafasha ku buryo batirinda icyorezo ngo bishwe n’inzara.

Abo mu duce dutandukanye bw’Umujyi wa Kigali, bashyikirijwe ibiribwa birimo umuceri n’ibishyimbo aho buri rugo rwagenerwaga ingano ijyanye n’umubare w’abo rutunze.

Hifashishwaga inzego z’ibanze aho ibiribwa byagiye bigezwa mu midugudu bigashyikirizwa ba Mutwarasibo bakagenda babishyikiriza abaturage babigenewe mu ngo zabo.

Umunyabanga Nshingwabikorwa w’Umurenge wa Remera, Karamuzi Godfrey, yabwiye IGIHE ko ba Mutwarasibo aribo bari kugeza ibiribwa mu ngo z’abaturage kugira ngo hirindwe ikwirakwira rya Covid-19.

Ati “Twatanze ibiribwa mu murenge wacu ubu biri kuvanwa ku murenge tukabijyana ku kagari imidugudu ikaza kubifata tukabishyikiriza ba mutwarasibo na bo bakabijyana mu ngo z’abaturage babikeneye.”

Abaturage bahawe ibi biribwa kuri bo ibyishimo ni byose kuko bibazaga uko bazabaho mu gihe batabasha gukora ariko mu gihe kitageze no ku cyumweru bahise bahabwa inyunganizi ya leta.

Umuturage wo mu Karere ka Nyarugenge mu Murenge wa Rwezamenyo, Mukase Asia Diane, ni umwe mu bagizweho ingaruka na Covid-19 kuko amaze igihe kinini adakora bitewe n’uko yari umwarimu mu mashuri y’incuke amaze amezi 11 afunzwe, yavuze ko ashima ubufasha yahawe.

Ati “Twe nk’abarimu bo mashuri y’incuke kuva Covid-19 yakwaduka ntitwongeye gukora, urumva ntitwanahembwaga ubuzima bwagiye butugora, ndashimira ubuyobozi bwacu buba bwadutekerejeho bukaduha amafunguro, Imana isubize aho bakuye.”

Iri shimwe arihuriyeho n’umuturanyi we wari utunzwe no gukora imirimo yo gushakisha akabona ibimutunga uvuga ko iyo hataba leta ngo imuhe ibyo kurya yari kuzicwa n’inzara.

Ati “Ni ukuri turashimira leta kuba idahwema kudutekerezaho kuko ubuzima hano tubamo ni ubwo gushakisha tukabona ibidutunga, iyo habayeho guma mu rugo leta itadufashije twakwica n’inzara, turabashimira cyane aho bakuye Imana ibakubire.”

Si muri Nyarugenge gusa abaturage bashyikirijwe ibiribwa kuko no mu Karere ka Gasabo mu mirenge itandukanye abaturage bagiye bashyikirizwa ibiribwa byo kubunganira igihe batari gukora.

Ku ruhande rw’inzego za leta zivuga ko iki ari igikorwa cyabayeho kugira ngo bakomeze kuba hafi abaturage bagizweho ingaruka na Covid-19 muri iki gihe cya guma mu rugo.

Amafunguro yagiye agezwa mu masibo kugira ngo agezwe ku baturage agenewe
Abaturage bagiye bashyikirizwa ibiryo mu ngo zabo
Ibiribwa bwajyanwe mu masibo kugira ngo bigezwe ku baturage
Mutwarasibo ashyikiriza umuturage ibiribwa
Mutwarasibo ubwo yari ashyiriye umuturage ibiribwa
Mutwarasibo ubwo yari ashyiriye umuturage ibiribwa
Umujyi wa Kigali washyikirije abaturage ibiribwa byiganjemo ibishyimbo n'umuceri
Umunyabanga Nshingwabikorwa w’Umurenge wa Remera, Karamuzi Godfrey, yavuze ko ba mutwarasibo bari gushyikiriza abaturage ibiribwa mu ngo zabo kugira ngo hirindwe Covid-19
Umuturage wabonaga ibiribwa yasinyaga kugira ngo ba mutwarasibo bazatange raporo y'ababihawe
Umuyobozi wungirije w’Akarere ka Nyarugenge, Nshutiraguma Esperance, ubwo yaganiraga n’itangazamakuru

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .