Umujyi wa Kigali wabonye ikibumbano gishya kigaragaza urugwiro n’ibyishimo by’Abanyarwanda (Amafoto)

Yanditswe na Rabbi Malo Umucunguzi
Kuya 28 Ukuboza 2019 saa 09:29
Yasuwe :
0 0

Mu gihe Umujyi wa Kigali ukomeje kurimbishwa mu bihe by’iminsi mikuru, abawukoreramo ingendo cyane cyane banyura ku masangano y’imihanda ahazwi nka Sonatubes mu Karere ka Kicukiro, babonye ikibumbano gishya kigaragaza abantu batatu bahimbawe, bacinya akadiho.

Ni ikibumbano kigaragaza abantu babiri bashayaya bari kumwe n’umukaraza umwe, imbyino ubusanzwe yifashishwa mu Rwanda mu kwakira abashyitsi.

Umujyi wa Kigali ugaragaza ko iki kibumbano ari ikimenyetso cy’ikaze, ukwisanga kwa buri wese n’ibyishimo.

Mu nyandiko isobanura iki kimenyetso yatangajwe n’Umujyi wa Kigali, igaragaza ko “abantu batatu (umugabo umwe n’abagore babiri) bigaragaza ubumwe no kwimakaza ihame ry’uburinganire. Kugaragaza umugore bigaragaza ko yahawe umwanya mu nzego zose z’ubuzima bw’igihugu harimo inama n’ibirori.”

Witegereje aho aba bantu bareba, umukaraza yitegeye neza umuhanda winjira mu Mujyi wa Kigali uturuka ku Kibuga cy’Indege cya Bugesera ubu kirimo kubakwa, ndetse ari inyuma gato y’aba babyinnyi. Aba bagore bo bareba mu mpande zitandukanye, bituma ubasha kubitegereza neza waba uturuka mu mihanda ya Rwandex cyangwa i Remera.

Ni ikibumbano giteretse ku murambararo wa metero enye, ndetse gifite metero 1.2 z’uburebure kandi kigaragaraho n’imigongo, imaze kumenyerwa mu mitako ya Kinyarwanda. Cyakozwe n’umunyabugeni umaze kubaka izina, Bushayija Pascal.

Uretse iki kibumbano cyashyizwe muri aya masangano y’imihanda, ibikorwa byo kuyarimbisha ibiti byiza n’indabo nabyo birakomeje.

Umuyobozi w’Umujyi wa Kigali, Pudence Rubingisa, yavuze ko iki kibumbano cyakozwe muri gahunda yo kurushaho kurimbisha uyu murwa mukuru w’u Rwanda.

Yagize ati “Biri muri gahunda yo gukomeza kongera ubwiza bw’ibice bihurirwaho n’abantu benshi. Twamaze kubaka ahantu abantu bashobora kwicara bakaganirira imbere y’icyicaro cy’Umujyi wa Kigali, ndetse n’ubundi busitani burimo gutunganywa i Nyandungu ndetse n’ahahoze inganda i Gikondo.”

Yakomeje avuga ko hagishakishwa ingengo y’imari yazatuma n’andi masangano y’imihanda atunganywa kimwe n’ahantu hashobora guhurira abantu benshi, ku buryo hazakurikiraho andi masangano umunani atandukanye, azakorwa mu gihe cya vuba.

Umujyi wa Kigali ukomeje kurimbishwa mu buryo bunyuranye, aho kuri ubu ku masangano y’imihanda ahazwi nka Sonatubes mu Karere ka Kicukiro, hashyizwe ikibumbano gishya kigaragaza abantu batatu bahimbawe, babyina imbyino gakondo
Uyu mukaraza yitegeye umuhanda uturuka mu Bugesera
Ibi bihangano byakozwe n'umunyabugeni Bushayija Pascal
Hashyizwe camera zicunga umutekano
Uyu mukaraza yambaye amayugi yambarwa n'intore
Umushayayo ni imbyino iranga ibyishimo by'Abanyarwanda n'urugwiro bahorana
Aba babyinnyi bareba mu byerekezo binyuranye
Iki kibumbano cyubatswe hagati mu busitani

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .