00:00:00 IGIHE NETWORK KN KINYARWANDA EN ENGLISH FR FRANCAIS

Umuhanda uhuza Ngoma na Rwamagana ugendwa n’uhetswe mu mugongo

Yanditswe na Hakizimana Jean Paul
Kuya 26 Ukuboza 2022 saa 08:44
Yasuwe :

Ubuyobozi bw’Akarere ka Rwamagana bwatangaje ko umuhanda uhuza aka Karere n’aka Ngoma unyuze ahazwi nka Cyaruhogo ugahinguka mu Murenge wa Zaza, ugiye gukorwa hashyirwemo ibiraro bishya bizatuma uhinduka nyabagendwa.

Ibi bubitangaje nyuma y’aho uyu muhanda umaze imyaka ibiri warangiritse ku buryo n’imodoka zawukoreragamo za RITCO zavaga i Kigali zijya i Zaza zahagaritse kuwunyuramo.

Muri iki gihe cy’imvura abaturage bavuga ko kugira ngo bambuke ikiraro kiwurimo batanga amafaranga 500 Frw bakabaheka ku migongo bakabona kwambuka bagana mu Karere ka Ngoma.

Bamwe mu batuye muri ibi bice baherutse kubwira itangazamakuru ko babangamiwe n’iyangirika ry’uyu muhanda ngo kuko ryatumye iterambere bari bagezeho risubira inyuma.

Umwe yagize ati “ Ubundi twavaga i Kigali duhita twambuka i Rwamagana tugera iwacu ntibiduhende, none ubu bisaba kuzenguruka i Ngoma, byatumye amafaranga twategeshaga yiyongera cyane.”

Hari undi uheruka kubwira IGIHE ko kuhambuka byatangiye baca 200 Frw none ubu basigaye bishyura 500 Frw ubundi bakaguheka ku mugongo bakakwambutsa hakurya. Uyu muturage yavugaga ko bibabangamiye cyane aho ngo buri gihe ubuyobozi buhora bubabwira ko uzakorwa bagategereza bagaheba.

Umuyobozi w’Akarere ka Rwamagana, Mbonyumuvunyi Radjab, aherutse kubwira itangazamakuru ko Intara yabafashije ikabakorera ubuvugizi, yizeza abaturage ko mu minsi mike imirimo yo kuwukora izatangira hashyirwamo ibiraro bishya.

Yagize ati “ RTDA yamaze gukusanya ibyari bikenewe n’ingengo y’imari yarabonetse ubu bari kumvikana na Minisiteri y’Ingabo kuko ni ikintu cyihutirwa cyane, binyuze mu masoko byatinda cyane, bari kureba uburyo Engineering Brigade na Horizon aribo bakora uyu muhanda mu buryo bwihuse.”

Uyu muyobozi yavuze ko bazakora ibiraro ngo kuko ni byo bibabaje cyane ubundi ngo unatunganywe neza ku buryo wongera kuba nyabagendwa.

Ubuyobozi bwatangaje ko bugiye gukora uyu muhanda ku buryo wongera kuba nyabagendwa
Abaturage benshi bambuka uyu muhanda bateruwe abandi bakagenda mu mazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .