Umuhanda Nzove-Ruli-Gakenke ugiye gushyirwamo kaburimbo

Yanditswe na Akayezu Jean de Dieu
Kuya 1 Werurwe 2021 saa 09:00
Yasuwe :
0 0

Minisiteri y’Ibikorwaremezo, Mininfra, yatangaje ko imirimo yo gusana umuhanda Nzove-Ruli-Gakenke wangijwe n’ibiza ku buryo wari umaze igihe utari nyabagendwa by’umwihariko mu bihe by’imvura ugiye gukorwa.

Uyu muhanda wa kilomotero 68,7, uturuka ahazwi nko ku Giti cy’Inyoni ukanyura mu Murenge wa Kanyinya mu Karere ka Nyarugenge werekeza i Shyorongi muri Rulindo ugakomeza mu Mirenge itandukanye y’Akarere ka Gakenke, irimo uwa Ruli.

Ubusanzwe uyu muhanda ni uw’itaka ariko ibiza bikomoka ku mvura byagiye biwusenya bigahagarika ingendo z’abaturage bawukoresha.

Mininfra yatangaje ku rukuta rwa Twitter ko hagiye gutangira ibikorwa byo gusana uyu muhanda yo gushyiramo za laterite mu gihe ibikorwa byo gushyiramo kaburimbo byo biteganyijwe gutangira muri Kamena 2021.

Yagize ati “Guhera muri iki cyumweru imirimo yo gusana umuhanda Nzove-Ruli-Gakenke izatangira, irangire mu mpera za Werurwe.

Ikomeza ivuga ko “Hazibandwa ku gusiba ibinogo, gukemura ikibazo cy’amazi areka no gushyiramo laterite. Gushyiramo kaburimbo bizatangira muri Kamena uyu mwaka”

Minisitiri w’Intebe yari yakemanze ubuziranenge bwawo…

Mu 2019, Minisitiri w’Intebe Dr Ngirente Edouard, yasuye imirimo yo kubaka uyu muhanda icyo gihe Ikigo cy’Igihugu gishinzwe gutunganya Imihanda, RTDA, kimugaragariza ko imirimo yo kubaka icyo gice kigizwe n’itaka laterite cyagombaga kuzura muri uwo mwaka gitwaye asaga miliyari 10 Frw.

Icyo gihe Minisitiri w’Intebe amaze kwitegereza imirimo yakozwe byavugwaga ko igeze kuri 92%, yasabye ko hakorwa igenzura ryimbitse ku buziranenge bwawo nyuma yo gusanga hari aho utari gukorwa uko bikwiye.

Mu bugenzuzi yakoze kandi Minisitiri w’Intebe yabonye imiferege y’amazi yaratangiye gutenguka.

Icyo giye yagize ati “Kuva natangira, uyu umuhanda naje mbona ko byamanyutse n’aho mwubatse vuba byamaze kumanyuka, mfite ubwoba ko hazacamo amezi atandatu byamaze gusenyuka kandi leta iba yabitanzeho amafaranga."

Yabwiye ubuyobozi bwa RTDA ko mu gihe leta iba yatanze amafaranga, iba ikeneye ko akoreshwa mu bikorwa bifitiye akamaro abaturage kandi bizaramba.

Ati "Ubu nkubiseho umugeri cyahita kigwa, niba umuntu mubona atangiye kubaka ibintu bidafite ireme mwamuhagarika kuko leta iba yatanze amafaranga, ubu azazana isima ahome hano hatangiye kumanyuka. Kuki mutamutangira kare ngo amenye ko ari gukora ibidafite ubuziranenge?”

Icyo gihe Umuyobozi Wungirije wa RTDA, Patrick Emile Baganizi, yabwiye IGIHE ko ibyo basabwe na Minisitiri w’Intebe byabahaye umukoro wo gukora ubugenzuzi bwimbitse kandi ko mu mirimo isigaye harimo no gukosora ayo makosa yose.

Uyu muhanda wa Nzove-Ruli-Gakenke wubatswe ku gice kinini kinyura hejuru ya Nyabarongo, waje nk’igisubizo ku baturage bo mu bice by’Akarere ka Gakenke haba mu kubafasha kugeza umusaruro wabo ku masoko ndetse no koroshya imigenderanire n’Umujyi wa Kigali.

Mu 2019, Minisitiri w'Intebe, Dr Ngirente Edouard, yasuye uyu muhanda wa Nzove-Ruli-Gakenke akemanga ubuziranenge bwawo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .