00:00:00 IGIHE NETWORK KN KINYARWANDA EN ENGLISH FR FRANCAIS

Umuguzi uzajya ahaha ntahabwe EBM, ibyo yaguze bizajya bitezwa cyamunara

Yanditswe na Umwali Zhuri
Kuya 26 Ugushyingo 2022 saa 01:26
Yasuwe :

Ikigo cy’Igihugu gishinzwe Imisoro n’Amahoro, RRA, cyatangaje ko nyuma y’uko abacuruzi benshi binangiye ntibatange inyemezabuguzi za EBM abandi bagahitishamo umuguzi kuyimuha cyangwa kutayimuha, ubu umuguzi uzajya afatanwa ibicuruzwa adafite inyemezabwishyu, ibyo yaguze bizajya bitezwa cyamunara.

Mu 2019, hasohotse itegeko rigena ko n’abantu batabaruye muri TVA batangira gukoresha EBM mu bikorwa byabo bya buri munsi. Ni ukuvuga ko umucuruzi wese, yaba ubona umusaruro wa miliyoni 20 Frw cyangwa eshatu z’amafaranga y’u Rwanda ku mwaka, afite inshingano zo gukoresha ikoranabuhanga rya EBM atanga inyemezabuguzi.

Ubu RRA yafashe ingamba zikarishye zigamije ko abantu bakoresha EBM uko byagenda kose. Muri zo harimo ko umuguzi wese udafite inyemezabuguzi ya EBM yaguriyeho ibicuruzwa bye, mu gihe azajya afatwa, bikagaragara ko ntayo afite, azajya abyamburwa hanyuma bitezwe cyamunara.

Ni mu gihe kandi umucuruzi wese uzafatwa yacuruje ariko ntatange inyemezabuguzi ya EBM, azajya ahanwa kandi hakorwe n’ubugenzuzi bw’ububiko bw’ibicuruzwa bye kugira ngo ibyo yacuruje byose atabitangiye inyemezabuguzi abitangire umusoro byose.

Ikindi kandi uwo mucuruzi azajya akurikiranwa mu buryo bw’amategeko ku cyaha cyo kunyereza umusoro abigambiriye kandi ubucuruzi bwe bufungwe mu gihe cy’iminsi 30.

Mu kiganiro n’Abanyamakuru, Komiseri ushinzwe Imisoro y’imbere mu gihugu, Batamuriza Hajara, yatangaje ko hari impamvu zatumye ibihano byo kudakoresha EBM bikazwa.

Ati "Mu bihano dutanga harimo iby’ibanze, ibiringaniye n’iby’inyongera, iyo tuvuze ngo tuzafungira umuntu iminsi 30 ni igihano cy’inyongera, iyo tuvuze ngo umuntu tuzamutangaza mu bitangazamakuru birebwa kenshi ni ibihano by’inyongera,"

"Ariko nk’ubu impamvu tuvuga ngo ibihano bigiye gukomera ni ukugira ngo abantu bahindure imyitwarire kuko ni amahitamo bafata kugira ngo badatanga inyemezabuguzi za EBM."

"Wowe utatse inyemezabuguzi z’ibyo waguze nihagira ibyibwa cyangwa se ugahura n’inzego zibishinzwe zirimo na RICA zigenzura ibintu bitandukanye ufite uko uzabisobanura".


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .