00:00:00 IGIHE NETWORK KN KINYARWANDA EN ENGLISH FR FRANCAIS

Umugabo we yicishijwe amabuye ku Kiliziya azira kuvuga Ikinyarwanda: Uko Uwase yavuye muri RDC

Yanditswe na Akayezu Jean de Dieu
Kuya 10 July 2022 saa 07:31
Yasuwe :

Ubwo Jenoside yakorewe Abatutsi yabaga mu 1994, hari Abanyarwanda barenga miliyoni eshatu bahungiye mu bihugu bituranye n’u Rwanda, aho abenshi berekeje muri Repubulika Iharanira Demokarasi ya Congo (RDC).

Icyo gihe Uwase Immaculée yaburaga amezi atatu ngo avuke kubera ko muri Nyakanga 1994, aribwo yabonye izuba, avukira ahitwa i Mushaki muri Kivu y’Amajyaruguru. Ni ukuvuga ko yavukiye mu buhungiro.

Ni umwe mu Banyarwanda 103 bahungutse bavuye muri RDC muri iki cyumweru, aho bari bamaze imyaka ibarirwa muri 28 babeshywa ko u Rwanda ari igihugu kibi, bityo bakijemo bashobora kugirirwa nabi.

IGIHE yaganiriye na Uwase ku wa 7 Nyakanga 2022, aho yari amaze amasaha make mu nkambi y’Agateganyo ya Kijote iri mu Murenge wa Bigogwe, Akarere ka Nyabihu mu Ntara y’Iburengerazuba.

Igikomeye kuri Uwase ni uko ubu yageze mu gihugu cye, akaba yaratunguwe no kuba ibyo yari yarabwiwe ko nakigeramo azagirirwa nabi, atari ko bimeze.

Iyo asobanura uko yakiriwe agira ati “Twageze ku mupaka, dusanga imodoka zidutegereje, abapolisi baza baturinze kugera muri iki kigo cya Kijote, tuhageze batwakira neza, baduha ibyo kurya, baduha amazi n’isabune turakaraba.”

“Njyewe urabona n’aka kana mpetse ni uruhinja, narahageze barampemba, mbese iyi leta ni umubyeyi ubu ndimo kwigaya ku bintu bibi byose natekerezaga, ndimo kwicuza imyaka yose namaze mbayeho nabi.”

Uko yamenye ko ari impunzi…

Ku mwana w’imyaka 10 nka Uwase Immaculée, kumva bagenzi be bamubwira ko igihugu arimo atari icye, rimwe na rimwe bakamubwira ko ari umu-Nomade [umuntu utagira iwabo uhora ugenda], ni bimwe mu byo yibuka bikamushengura.

Kwitwa ‘Peuple nomades’ biri mu byatumye Uwase n’abana batatu bavukana babaza umubyeyi wabo, impamvu ari nabwo yaje kwerura ababwira ko ari impunzi.

Ati “Twabyumvaga mu makuru babivuga, natwe tukajya tubona uko duhora twimuka, tuva hamwe tujya ahandi ku buryo twumvaga Abanye-Congo batubwira ngo turi aba ‘Peuple Nomades’. Noneho twabaza Mama icyo bisobanura akatubwira ngo ni uko mwebwe muri impunzi.”

Yakomeje agira ati “Ubwo nibwo twaje kumenya ko turi impunzi twaturutse mu Rwanda. Mama twajyaga duhora tumubaza amateka y’igihugu cyacu, ukabona abaye nk’ugize ihungabana, yamara gutuza akatubwira amateka y’uko habayeho kwica, haba Jenoside yakorewe Abatutsi.”

Uwase kuri ubu ni umubyeyi ufite abana batatu barimo n’umuto yatashye ahetse ufite amezi atatu. Yashatse umugabo akiri muto kubera ko atabashije kwiga amashuri, ku myaka 14 nibwo yari atangiye mu mwaka wa mbere w’amashuri abanza.

Avuga ko impamvu atabashije kwiga zishingiye ku kuba iwabo bahoraga bimuka buri munsi. Nk’urugero yibuka ko ubwo yatangiraga amashuri bwa mbere, hashize icyumweru kimwe , ahantu hitwa ku Mushaki muri Kivu y’Amajyaruguru, intambara iba irateye barahunga.

Ati “Natangiye ishuri mfite imyaka 14, ubwo nari mazemo icyumweru ahantu twari dutuye hitwaga ku Mushaki haba habaye intambara, turahunga turahava, haza kongera kuba umutekano hashize nk’amezi abiri dusubira mu ishuri, intambara zirongera ziraba, turongera turahunga. Ntabwo nabashije kujya mu ishuri kubera intambara.”

Uwase avuga ko umugabo bashakanye nawe yari Umunyarwanda ndetse bajyaga bategura gahunda yo gushaka uko batahuka mu gihugu cyabo bikagenda byanga bitewe n’amakuru bahabwaga cyangwa indi mibereho mibi.

Ati “Dukomeza kuba muri ubwo buzima bubi bw’intambara, ubwicanyi […] ntabwo nakubwira ngo umuntu uriya hariya abayeho nk’umuntu pe. Nta bumuntu.”

Umugabo we yishwe n’Abanye-Congo bamuziza kuvuga Ikinyarwanda

Uwase avuga ko yatandukanye n’ababyeyi be ubwo yari amaze gushaka umugabo. Icyo gihe ngo yavuye mu nkambi ajya kubana n’umugabo we ahitwa Mweso mu Mujyi wa Kitchanga uri mu Burasirazuba bwa RDC.

Bari bamaze kubyarana abana batatu barimo umukuru wari ugeze igihe cyo kujya kwiga mu mashuri yisumbuye mu gihe umuto afite amezi atatu.

Avuga ko icyo gihe n’ubundi aho i Mweso naho ubuzima bwakomeje kuba bubi bitewe n’uko hahoraga ibikorwa by’intambara.

Ati “Twari tubayeho nabi cyane kuko hariya kwica umuntu bakamucagagura mu maso yawe nta kintu bibabwiye, kwitwa ngo uravuga Ikinyarwanda, ukabona baguciye umutwe batereye hariya bagakomeza, nta kintu biba bibabwiye. Ni ubwo buzima twari tubayemo.”

Yakomeje agira ati “Kumva ngo hano haturutse FDLR, ngo hariya haturutse Nyatura, Raïa Mutomboki, mu kanya mukumva ngo haje n’izindi za Mai Mai […] ni utuntu tw’udutwe twinshi duhora dushoza intambara, bigatuma tubaho mu buzima bwo kwirirwa twimuka duhunga buri munsi.”

Ibintu byaje kuba bibi muri Gicurasi 2022, ubwo hatangiraga intambara hagati y’Ingabo za Leta ya Repubulika Iharanira Demukarasi ya Congo n’umutwe w’abarwanyi wa M23.

Kuva icyo gihe ubuyobozi bw’icyo gihugu bufatanyije n’inzego z’umutekano bwatangiye gushishikariza abaturage kwirara muri bagenzi babo bavuga Ikinyarwanda bakabagirira nabi, bakabirukana mu byabo abandi bakabakorera ibikorwa by’urugomo birimo n’ubusahuzi.

Bamwe mu nsoresore n’abaturage by’umwihariko abo mu Burasirazuba bwa Congo bahise batangira imyigaragambyo no kwirara muri bagenzi babo bavuga Ikinyarwanda by’umwihariko abo mu bwoko bw’Abatutsi.

Umugabo wa Uwase ni umwe mu biciwe muri ibyo bikorwa bigayitse aho ngo bamwishe bamwumvise avuze Ikinyarwanda.

Uwase avuga ko bamwishe nabi kuko bamushyize imbere ya Kiliziya ya Paroisse Sainte-Famille, i Mweso bakamutera amabuye kugeza apfuye.

Ati “Umugabo wanjye baramwishe, yapfuye mu bintu biri aho […] kubera kuvuga Ikinyarwanda, bamukuye ahantu bahita bamwica gutyo, bamwica nabi bamuteye amabuye.”

Yakomeje agira ati “Ni ejo bundi mu myigaragambyo ubwo iriya mirwano yabaga, mu ntambara zabaye ubushize. Yari yagiye bamwicira ahantu utanakeka, imbere ya Kiliziya.”

Uwase ukomoka mu karere ka Gakenke avuga ko ubuzima bwo mu mashyamba ya RDC bwari bushaririye

FDLR mu bikorwa byo gushimuta abarimo Abanyarwanda

Umutwe w’iterabwoba wa FDLR, ugizwe n’abasize bakoze Jenoside yakorewe Abatutsi mu 1994, washinze ibirindiro mu mashyamba ya RDC.

Raporo iheruka ku bibazo by’umutekano muri Repubulika Iharanira Demokarasi ya Congo, yemeje ko umutwe wa FDLR ugenda wisuganya ndetse urimo gukorana n’imitwe mito mito yitwaje intwaro.

Iyi raporo yakozwe n’impuguke yagejejwe ku kanama k’Umuryango w’Abibumbye gashinzwe umutekano ku wa 10 Kamena 2022, ivuga ko FDLR-FOCA ikomeje ibikorwa muri Pariki y’Igihugu ya Virunga.

Ni umutwe udafite agace ubamo kubera ko abawubarizwamo bahora bimuka umunsi ku munsi. Gusa Uwase avuga ko ari abantu baba bafite imiryango yabo, inka, ihene n’indi mitungo bagenda basahura.

Akomeza avuga ko n’ubwo ababarizwa muri uwo mutwe ari Abanyarwanda, ariko bigoye kubabona kubera ko baba mu mashyamba ndetse bahora bimukana n’imiryango yabo.

Uwase yavuze ko bakunze kuba mu duce tw’amashyamba twa Shyangi, Gishishi n’ahandi.

Ati “Turabumva, ukumva ahantu baje kwica nk’umuntu cyangwa baje gusahura ukumva barimo kuvuga Ikinyarwanda, kumva mu baturanyi ngo FDLR zaje gusahura ahantu runaka, ngo zishe umuntu runaka […].”

Yakomeje agira ati “Bajya bafata umuntu bakamumarana nk’icyumweru, bakazamurekura ari uko ab’iwabo batanze amafaranga, ukumva ngo FDLR zamurekuye.”

Uwase avuga ko abantu FDLR ishimuta ari abo baba bazi ko iwabo boroye inka cyangwa bafite ubundi bukire.

Ati “Hari umugabo twari duturanye, wari ufite inka, FDLR zigeze gushimuta, baramutwara kugira ngo bamurekure, umuryango we bagurishije inka icyenda amafaranga bayoherereza FDLR.”

Uwase yaje gufata icyemezo cyo gutaha mu Rwanda ku bushake aho kuri ubu yahageze amahoro ari kumwe n’abana be batatu.

Ni umwe mu bagera kuri 15643 bamaze gutaha ku bushake mu myaka itanu ishize. Barimo 7485 batashye mu 2017.

Muri iyi myaka ishize hagiye habaho gutahuka ku bwinshi kuko mu 2018 hatashye abagera kuri 3072, abandi 1720 bataha mu 2019 naho 719 bataha mu 2020 mu gihe umwaka ushize wa 2021 hatashye Abanyarwanda 1791. Kugeza muri Kamena 2022 hari bamaze gutaha 856.

Umubare w'Abanyarwanda batahutse bava muri Congo mu myaka itanu ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .