Ukekwaho kwiba muri CHUB yashatse kwiyahura amenye ko akurikiranyweho ibindi byaha

Yanditswe na Ferdinand Maniraguha
Kuya 11 Ugushyingo 2019 saa 04:18
Yasuwe :
0 0

Ntawuhiganayo Narcisse watawe muri yombi n’Urwego rushinzwe Ubugenzacyaha (RIB) akurikiranyweho kwiba amafaranga mu bitaro bya Kaminuza , CHUB i Huye, yatabawe agerageza kwiyahura nyuma yo kumenya ko ari gukorwaho irindi perereza ku bindi byaha birimo no kwica.

RIB yafashe Ntawuhiganayo Narcisse ubwo yageragezaga gusohoka mu gihugu mu mpera z’icyumweru gishize, afatanwa 1.700.000 Frw bikekwa ko ari ayo yari yibye mu bubiko bw’ibitaro bya CHUB.

Amakuru agera kuri IGIHE, ni uko byaje kumenyekana ko hari ibindi byaha Ntawuhiganayo yaba yarakoze, ubugenzacyaha bwatangiye gukoraho iperereza.

Iby byaha birimo icy’ubwicanyi, aho bivugwa ko hari umukozi wakoraga ubucuruzi bw’amakarita yo guhamagara n’ihererekanyamafaranga kuri telefone (agent) uherutse kwicwa, Ntawuhiganayo akaba akekwa kuba ari we wabikoze.

Ikindi cyaha akurikiranyweho ni icyo guha umuntu ikintu gishobora kumwica cyangwa gushegesha ubuzima. Bivugwa ko yaba yarabanje gusinziriza umwe mu bakozi bashinzwe gucunga imari y’ibitaro akoresheje imiti, akabasha kwiba.

Amakuru yizewe IGIHE ifite, ni uko Ntawuhiganayo amaze kumenya ko akurikiranyweho ibindi byaha, yagerageje kwiyahura ariko abashinzwe umutekano bamutabara atarabigeraho ajyanwa kwa muganga.

RIB yemereye IGIHE ko koko hari ibindi byaha Ntawuhiganayo akurikiranyweho birimo ubwicanyi akekwa kuba yarasize akoreye mu bitaro ko kandi aribyo yashatse kwiyambura ubuzima aho yarafungiwe muri kasho, ariko ko ubu ubuzima bwe buri kwitabwaho.

Ingingo ya 166 mu gitabo cy’amategeko ahana ibyaha mu Rwanda, ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Ingingo ya 107 ivuga ko umuntu wica undi abishaka, aba akoze icyaha. Iyo abihamijwe n’urukiko, ahanishwa igihano cy’igifungo cya burundu mu gihe ingingo ya ingingo ya 115 ivuga ko Umuntu wese utera undi indwara cyangwa kudashobora kwikorera umurimo, amuhaye mu buryo ubwo aribwo bwose abishaka, ariko atagendereye kwica, ikintu gishobora kwica cyangwa ibintu n’ubwo bitagira ubushobozi bwo kwica, bifite nyamara ubushobozi bwo gushegesha ubuzima, iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi y’ibihumbi magana atatu ariko atarenze ibihumbi magana atanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza