Umufungwa yabeshye CNLG ko azi icyobo kirimo abishwe muri Jenoside

Yanditswe na HABIMANA James
Kuya 18 Mutarama 2019 saa 11:58
Yasuwe :
0 0

Komisiyo y’Igihugu yo kurwanya Jenoside (CNLG), yatangaje ko gutanga amakuru y’ahari imibiri y’Abatutsi bishwe muri Jenoside bikiri ikibazo, ku buryo hari n’abadatinya kubeshya ko bazi aho imibiri y’abishwe iherereye.

Umukozi muri CNLG ushinzwe ubuvugizi ku ndishyi z’abacitse ku icumu, Ntagengwa Vital, yavuze ko ubwe yavanye umufungwa mu Karere ka Rusizi, amubwiye ko azi icyobo kirimo Abatutsi bishwe i Ndera mu Karere ka Gasabo, yahagera bagasanga yababeshyaga.

Ibi uyu muyobozi yabigarutseho mu kiganiro yahaye urubyiruko 570 ruhagarariye abandi mu Ntara y’Iburasirazuba, ubwo rwari rumaze gusura urwibutso rwa Jenoside rwa Kigali ruri ku Gisozi n’Ingoro iranga amateka yo kubohora igihugu.

Ni muri gahunda ya Minisiteri y’Urubyiruko na CNLG, igamije kwigisha urubyiruko kwigira ku mateka yaranze u Rwanda, ariko banarushaho kwiyubakira igihugu cyabo.

Umwe muri uru rubyiruko yabajije ikibazo cy’imibiri y’abishwe muri Jenoside itaraboneka, abantu bakaba bazi amakuru ariko ntibayatange.

CNLG yavuze ko kwigisha ari ibintu bihoraho, kandi ko n’uru rubyiruko ubwarwo bagomba gukomeza gushishikariza abo baturanye kugira uruhare mu gutanga ayo makuru.

Ntagengwa yagize ati “Harimo abatubeshya ariko ubukangurambaga buhoraho kandi twigisha buri ngarukamwaka. Muri gereza ho hari abaduha amakuru ariko hari n’abatubeshya”.

“Hari uwo njye nigeze kuvana i Rusizi ejobundi mujyanye i Ndera kugira ngo atwereke ahandi hari icyobo twacukuraga, tuhageze aratubeshya tugaruka amara masa, ibaze kuvana umufungwa i Rusizi ukamuzana i Ndera? Harimo abatubeshya rero ariko tuzakomeza tubikore kuko ni inzira yo kwigisha kandi twumva bizagenda neza”.

Hari abatanga amakuru kubera gusinda

Kuva muri Mata 2018, mu murenge wa Ndera mu karere ka Gasabo no mu gasanteri ka Kabuga gahurirwaho n’uturere twa Gasabo na Kicukiro, hatahuwe ibyobo biri ahantu hubatswe inzu, byabaga birimo imibiri y’abishwe muri Jenoside yakorewe Abatutsi, imyaka 24 ikaba yari ishize ayo amakuru ataratanzwe.

Ntagengwa yatangaje ko abatanze ayo makuru ari bantu banyweye bamaze gusinda, umwe avamo undi.

Ati “Ejobundi ubwo twabonaga imibiri i Kabuga na Ndera niko byabaye, hari abantu babiri batonganye banyweye agacupa, umwe akavuga ati nzavuga ko ari wowe wishe abantu ubashyira hariya hantu. Icyo rero tubasaba nk’urubyiruko, nimutubere abavugizi aho muri mu mirenge no mu tugari, abantu bazi aho iyi mibiri iri batubabarire iboneke tuzayishyingure mu cyubahiro nk’uko n’ahandi bisanzwe bigenda.”

CNLG kandi yavuze ko irimo gutegura imfashanyigisho igenewe cyane cyane abantu barangije ibihano, kugira ngo babereke ibyo bagomba kwitwararika bityo ejo batazisanga basubiye mu magereza.

Ntagengwa Vital yabwiye urubyiruko uburyo hari umufungwa wabeshye ko azi ahajugunywe abishwe muri Jenoside
Urubyiruko 570 ruhagarariye abandi mu Ntara y’Iburasirazuba rwasobanurirwe amateka y'u Rwanda ngo ruyahereho rwubaka ejo hazaza heza
Basuye urwibutso rwa Jenoside rwa Kigali ruri ku Gisozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza