Umucamanza yanze ko Rtd Major Mudathiru na bagenzi be bo muri P5 boherezwa mu nkiko za gisivili

Yanditswe na Rabbi Malo Umucunguzi
Kuya 14 Ukwakira 2019 saa 05:27
Yasuwe :
0 0

Umucamanza w’Urukiko rwa Gisirikare, yemeje ko uru rukiko rufite ububasha bwo kuburanisha Rtd Major Mudathiru Habib na bagenzi be 24 baregwa kuba mu mutwe witwara gisirikare wa P5, nyuma y’inzitizi z’iburabubasha zari zagaragajwe n’ababunganira.

Baregwa ibyaha bine birimo kwinjira mu mutwe w’ingabo utemewe; kugambirira kugirira nabi ubutegetsi buriho; kugirana umubano na Leta y’amahanga bigiriwe gushoza intambara no kurema umutwe w’abagizi ba nabi.

Ubwo iburanisha ryasubukurwaga kuri uyu wa Mbere, abaregwa bagombaga gutangira kwisobanura ku biheruka kugaragazwa n’Ubushinjacyaha ku buryo ibyaha bakekwaho byakozwe, haburanwa ku ifungwa n’ifungurwa ry’agateganyo.

Umwunganizi wa Rtd Major Mudathiru, Me Umulisa Paola, yateruye avuga ko umukiliya we yasezerewe mu Ngabo z’u Rwanda, bityo hari inzitizi zo kuba yarajyanwe mu rukiko rwa gisirikare kandi atakiri we.

Umushinjacyaha yasubije ko nubwo Mudathiru na bagenzi be ubu ari abasivili, barezwe ibyaha bifitanye isano n’urubanza ruregwamo umusirikare Pte Muhire Dieudoné na bagenzi be batanu, ruri mu Rukiko rukuru rwa Gisirikare. Izi manza zombi ngo zizahuzwa, ari nayo mpamvu aba bantu baregewe urukiko rwa gisirikare.

Abanyamategeko ntibanyuzwe, bahuriza ku kuba igihe cyose izo dosiye zitarahuzwa, abaregwa bakwiye kuburanira mu rukiko rwa gisivile. Ikindi ngo ni uko itegeko rigena ububasha bw’inkiko riteganya ko imanza zidahuje kamere cyangwa zitari ku rwego rumwe rw’iburanisha, zidashobora guhuzwa.

Bityo ngo izo dosiye zombi ntiziri ku rwego rumwe kuko Pte Muhire na bagenzi be bamaze kuregerwa Urukiko rukuru rwa Gisirikare bategereje kuburana mu mizi, mu gihe Rtd Major Mudathiru na bagenzi be bakiburana ifungwa n’ifungurwa ry’agateganyo.

Umushinjacyaha yavuze ko igitekerezo cyo guhuza dosiye gishingiye ku mpamvu z’amategeko, kuko ibyaha baregwa byabereye igihe kimwe n’ahantu hamwe. Yavuze ko Pte Muhire ngo yagiye muri Uganda mu 2017 gushaka abarwanyi ba RNC, mu gihe Mudathiru yumvikanaga na Kapiteni (Captain) Sibo Charles wa RNC, ku mikoranire mu gisirikare cya P5.

Gusa umunyamategeko yavuze ko isobekerana ry’imanza ryemezwa n’icyemezo cya Perezida w’urukiko kandi ngo ntacyo babonye muri dosiye, ngo si umushinjacyaha wemeza ko dosiye zisobekeranye.

Me Rwagasore Jean Claude yongeyeho ko guhuza imanza bikozwe n’Ubushinjacyaha byari gukorwa ari bwo bugifite dosiye zombi, ariko ngo aho zigeze byakwemezwa na Perezida w’urukiko rukuru, ku buryo Pte Muhire na bagenzi be baburanishwa ukwabo, abandi bakaburanishwa ukwabo mu rukiko rutari urwa gisirikare.

Abanyamategeko bagaragaje ko guhuza izi dosiye atari ngombwa, cyane ko abaregwa ibi byaha bari muri RDC bashobora gukomeza gufatwa ndetse bakoherezwa mu Rwanda, ku buryo buri gihe bitajya bisaba ko urubanza ruhagarikwa ngo dosiye zihuzwe.

Major Mudathiru yahawe umwanya avuga ko abo bandi bashobora guhuzwa mu rubanza atabazi, ku buryo ngo afite impungenge ko bashobora no kuzamuhuza na FDLR atazi.

Yavuze ko we n’abo yari ayoboye bari mu mutwe wa P5, ku buryo yumva yaburanishwa ku byaha "nzi nemera, ariko batampekesheje uwo ntigeze mbyara".

Umucamanza Lt Col Charles Madudu yahise avuga ko urukiko rugiye gufata umwanya, rukareba niba rufite ububasha bwo kuburanisha aba basivili baregewe urukiko rwa gisirikare.

Isaha ya saa munani yatanzwe n’umucamanza yageze abaregwa bacyicaye mu cyumba cy’iburanisha, risubukurwa ahagana saa cyenda. Nyuma yo kwiherera, urukiko rwa gisirikare rwanzuye ko inzitizi y’iburabubasha yatanzwe n’abunganira abaregwa nta shingiro ifite.

Umucamanza Lt Col Charles Madudu yavuze ko nk’uko biteganywa n’itegeko rigena ububasha bw’inkiko, Urukiko rwa Gisirikare ruburanisha, mu rwego rwa mbere, imanza z’ibyaha byose byakorewe ku butaka bwa Repubulika y’u Rwanda no hanze yarwo, bikozwe n’abasirikare, ibyitso byabo n’abo bafatanyije hatitawe ku mapeti yabo, uretse igihe babikoranye n’abana n’abantu baburanishwa mu rwego rwa mbere n’urwa nyuma n’Urukiko rw’Ikirenga.

Yakomeje avuga ko habaho imanza zisobekeranye, iyo imanza nyinshi, zifitanye isano ku buryo ikemurwa rya rumwe, rigira ingaruka ku rundi kandi ku buryo ziramutse ziciwe, rumwe ukwarwo, urundi ukwarwo, imikirize yazo ishobora kuvuguruzanya.

Yavuze ko asanga Urukiko rwa Gisirikare rufite ububasha bwo kuburanisha Rtd Mudathiru na bagenzi be, kuko ibyaha baregwa hamwe na Pte Muhire bifite aho bihuriye, kuko nubwo we yavuze ko yakoranye na RNC, ari umwe mu mitwe igize P5.

P5 yubakiye ku mashyaka atanu ari yo Amahoro People’s Congress, Forces Démocratiques Unifieés – Inkingi (FDU-Inkingi); People’s Defence Pact-Imanzi (PDP-Imanzi), Rwanda National Congress (RNC) na PS Imberakuri. Bose ngo bakuriwe na Kayumba Nyamwasa.

Umucamanza uyoboye iburanisha yahise yanzura ko urubanza rusubikwa, rukazasubukurwa ku wa 18 Ukwakira abaregwa bose bakomeza kuburanira mu rukiko rwa gisirikare. Hazaba humvwa ibisobanuro byabo ku mikorere y’ibyaha bashinjwa n’impamvu bumva bashobora kurekurwa by’agateganyo.

Ibyasabwaga n’aba banyamategeko bihura n’uburyo abantu batandukanye bagiye baregwa ibyaha bakoze mu mitwe yitwaye gisirikare nka Callixte Nsabimana wiyise Sankara wari umuvugizi wa FLN; Nkaka Ignace alias La Forge Bazeye Fils wari umuvugizi wa FDLR na Nsekanabo Jean Pierre Alias Abega wari ushinzwe iperereza muri uwo mutwe, bari kuburanira mu nkiko za gisivili.

Kimwe n’inshuro zabanje, Mudathiru kuri uyu wa Mbere yagenderaga ku mbago, ndetse ukuguru kumwe gufunzwe n’ibyuma kubera amasasu yarashwe n’ingabo za RDC ubwo yafatwaga, ku buryo no mu cyumba cy’urukiko aba yahawe intebe iriho umusego akurambikaho.

Abafashwe bose bakuwe mu mashyamba ya Congo nyuma y’igico gikomeye batezwe n’ingabo z’icyo gihugu, FARDC, aho mu iburanisha abenshi bahurije ku kuvuga ko bashyikirijwe u Rwanda ku wa 18 Kamena 2019.

Abantu 25 baregwa kuba abarwanyi ba P5 bagejejwe mu rukiko bari kumwe n'abunganizi babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza